Нема лекарска грешка во случајот со 37 -годишната Елена Ѓорѓиевска која почина дома по направени две операции на Дигестивна хирургија пред еден месец, на истиот ден кога била пуштена од болница, стои во Извештајот на стручната комисија која ја формираше Министерот Азир Алиу. Во него пишува дека пациентката се лекувала од кронова болест уште од 2013 година и имала комплицирана форма на умерена и тешка состојба, па третманот од страна на лекарите како конзервативно, така и оперативно бил соодветно спроведен, согласно најновите медицински протоколи, велат за Канал 5 од Министерството за здравство.

-Заради компликации од кронова болест, пациентката била примена за болничко лекување на Клиниката за дигестивна хирургија, каде бил извршен оперативен зафат. Кроновата болести носи двапати поголем ризик од појава на тромбоза на крвните садови, во споредба со здрави индивидуи, која може да доведе до нарушување на циркулацијата во засегнатиот анатомски сегмент со сите последици кои ги носи, вклучително и перфорација на црево и белодробна емболија,- - Министерство за здравство.

Семејството на починатата Елена не е изненадено од исходот на последниот извештај и остануваат на ставот дека нивната блиска која инаку била мајка на две мали дечиња починала од лекарска грешка при првата операција и лекарска негрижа во постоперативниот период. Тие сметаат дека најголем пропуст е тоа што хирургот што ја оперирал не му ја препуштил пациентката на друг свој колега специјалист хирург.

-Како што тој велеше нас како што ни кажуваше дека по шведски систем работел. Говорам за првата операција и верувам дека во Шведска не ги умираат вака луѓето како во Македонија. Не ги оставаат на практиканти. Тоа добро го знаат и шефот на одделот и Директорот Костовски, дека Елена не е оставена на специјалист на време, туку била оставена на неговиот тим од специјализанти. Очекувам надлежните од Клиниката, познавајќи ги пропустите од докторот, дека ќе направат нешто за да не се повторуваат вакви грешки и да се губат млади животи. Јас сметам дека тој човек не треба повеќе да оперира во сала,- Ирена Димовска – роднина.

Директорот на Дигестивна хирургија Д-р Огнен Костовски вели дека очекува интерната комисија при Клиниката да си ја заврши работата, по што ќе има Извештај по кој ќе може да постапи доколку се утврдат недостатоци.

-Интерната комисија што е формирана, а која има задача да констатира и евентуални дисциплинки постапки за случајот има законски има рок од 60 дена да си ја заврши работата и следствено ќе мора да изготви сопствен Извештај, настрана од оние на Министерството и ДСЗИ иако и нив ќе ги има на увид. Комисијата со која раководи Д-р Реџеп Селмани сè уште постапува,- Проф. д-р Огнен Костовски - Директор на ЈЗУ Универзитетска клиника за дигестивна хирургија – Скопје.

Инаку, за овој случај постапуваше и Државниот здравствен инспекторат кој исто така во медицинската евиденција не најде недостатоци и пропусти од својата надлежност.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.