Првичната согласност за предизборната коалиција паднала викендов на средба меѓу високи партиски функционери, но деталите за идната коалициска соработка ќе треба да се прецизираат деновиве на средба на партиските лидери, во присуство на партиските генерални секретари.
Неофицијално лидерот на Беса би ја предводел листата во шестата изборна единица а партијата може да смета на добитни места на листите и во останатите изборни единици.
-СДСМ е отворен, инклузивен политички субјект, предводник на моделот едно општество за сите, оттаму можеме растеретени да разговараме со сите политички субјекти , освен со ВМРО-ДПМНЕ за можности за предизборно или постизборно коалицирање, велат од владејачката партија, сепак и од СДСМ и од Беса не откриваат повеќе детали.
Дека СДСМ разговара и со нови коалициски партнери деновиве потврди и Заев.
Тој најави дека исходот би бил познат најдоцна до деветти март за кога е закажан Конгресот на СДСМ..
Иако во игра за предизборната коалиција освен Беса беше и ДПА, Мендух Тачи викендов од Тетово потврди дека тие за предизборна коалиција разговараат само со НДП на Весел Мемеди и оти не очекува соработка ниту со Заев ниту со Мицкоски. Лидерот на ВМРО-ДПМНЕ потврди дека за нив основен принцип за коалицирање ќе бидат изборните програми.
Иако се чини дека Заев му го врти грбот на Ахмети од ДУИ се оптимисти дека немаат конкуренција во албанскиот блок. За нив и натаму важи принципот победник со победник.
Села и Гаши пред неколку дена ја официјализираа предизборната коалиција.