Просечната каматна стапка на вкупните депозити бележи месечен пад од 0,02 п.п., при годишен раст од 0,23 п.п. и изнесува 2,19 отсто, информира Народната банка (НБ).

При тоа, како што се посочува, просечната каматна стапка на новоодобрените кредити е повисока за 0,06 п.п. на месечна основа и изнесува 4,48 отсто, додека на годишна основа е намалена за 0,56 п.п. Просечната каматна стапка на новопримените депозити изнесува 2,06 отсто и оствари месечен пад од 0,29 п.п. и годишен од 0,37 п.п..

-Во август 2025 година, просечната каматна стапка на вкупните кредити на корпоративниот сектор изнесува 4,52 отсто и е намалена за 0,02 п.п. на месечна основа. Месечниот пад се должи на пониските каматни стапки на денарските кредити без валутна клаузула и каматните стапки на кредитите во странска валута (за 0,04 на месечно и 0,03 п.п. на годишно ниво), во услови на раст на каматните стапки на денарските кредити со валутна клаузула (за 0,23 п.п.). На годишна основа, оваа каматна стапка е намалена за 0,68 п.п., соопшти НБ.

Како што се посочува во соопштението, каматната стапка на новоодобрените кредити на корпоративниот сектор е зголемена за 0,11 п.п. во споредба со претходниот месец и изнесува 4,33 отсто. Притоа, растот е резултат на повисоките каматни стапки на денарските кредити со и без валутна клаузула (за 0,19 п.п. на месечно и 0,14 п.п. на годишно ниво), додека каматните стапки на кредитите во странска валута се намалени (за 0,31 п.п.). Анализирано на годишно ниво, каматната стапка на новоодобрените кредити на корпоративниот сектор бележи пад од 0,57 п.п..

-Просечната каматна стапка на вкупните депозити на корпоративниот сектор, пак, оствари месечен пад од 0,13 п.п. и изнесува 2,53 отсто. Надолната промена се должи на намалените каматни стапки на денарските депозити без валутна клаузула и каматните стапки на депозитите во странска валута (за 0,13 п.п. на месечно и 0,10 п.п. на годишно ниво), во услови на непроменети каматни стапки на денарските депозити со валутна клаузула. Во споредба со август претходната година, просечната каматна стапка на вкупните депозити на корпоративниот сектор е зголемена за 0,33 п.п., се истакнува во соопштението од НБ .

Каматната стапка на новопримените депозити на корпоративниот сектор, овој август годинава, изнесува 1,86 отсто и забележа месечно намалување од 0,53 п.п.. Притоа, како што велат од НБ, падот произлегува од пониските каматни стапки на депозитите во странска валута и каматните стапки на денарските депозити без валутна клаузула (за 1,08 п.п. на месечно и 0,31 п.п. на годишно ниво). Во август, банките и штедилниците не евидентирале новопримени денарски депозити со валутна клаузула. На годишна основа, оваа каматна стапка бележи пад за 0,13 п.п..

-Во август 2025 година, каматната стапка на вкупните кредити на домаќинствата оствари пад од 0,01 п.п. на месечна основа и изнесува 5,27 отсто. Промената во целост се должи на намалените каматни стапки на денарските кредити без валутна клаузула (за 0,03 п.п.), додека каматните стапки на останатите категории кредити се непроменети. Каматната стапка на вкупните кредити на домаќинствата е пониска за 0,39 п.п. на годишна основа, прецизираат од НБ.

Просечната каматна стапка на новоодобрените кредити на домаќинствата во август годинава изнесува 4,68 отсто и е зголемена за 0,01 п.п. на месечно ниво. Месечната промена е резултат на повисоките каматни стапки на денарските кредити со валутна клаузула (за 0,07 п.п.), во услови на пад на каматните стапки на денарските кредити без валутна клаузула и на каматните стапки на кредитите во странска валута (за 0,02 п.п. на месечно и 0,01 п.п. на годишно ниво). Оваа каматна стапка е пониска за 0,60 п.п. на годишно ниво.

-Во август годинава кај каматната стапка на вкупните депозити на домаќинствата е забележан месечен пад од 0,01 п.п. и изнесува 2,14 отсто. Притоа, падот произлегува од намалените каматни стапки на денарските депозити без валутна клаузула (за 0,02 п.п.), во услови на раст на каматните стапки на денарските депозити со валутна клаузула (за 0,01 п.п.) и непроменети каматни стапки на депозитите во странска валута. Споредено со август претходната година, каматната стапка на вкупните депозити на домаќинствата е зголемена за 0,21 п.п., нагласуваат од НБ.

Каматната стапка на новопримените депозити на домаќинствата, пак, изнесува 2,18 отсто и бележи пад од 0,15 п.п. на месечна основа. Надолната промена се должи на падот на каматните стапки на денарските депозити без валутна клаузула и на каматните стапки на депозитите во странска валута (за 0,14 п.п. на месечно ниво и 0,06 п.п.на годишно ниво). Овој месец, кај банките и штедилниците не се евидентирани новопримени денарски депозити со валутна клаузула. Годишниот пад на оваа каматна стапка изнесува 0,58 п.п.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.