Нарцизмот е особина на личноста опишана како тенденција кон егоцентричност, претерано високо мислење за сопствената важност, недостаток на емпатија и постојана потреба oд восхит. Бројни студии покажале дека луѓето кои покажуваат нарцисоидни особини на личноста се повеќе склони кон ментални тешкотии, проблеми во врските и зависности.

Ново истражување открива едноставен начин да препознаете дали вие, или некој ваш близок имате такви особини: обрнете внимание дали лицето компулсивно ги користи социјалните мрежи и има тешкотии да се откаже од навиката. Според научниците од Универзитетот во Гдањск, овие две однесувања укажуваат на можна зависност од социјалните мрежи, која е поврзана со одредени форми на нарцизам.

Врската помеѓу нарцизмот и зависноста од социјалните мрежи

За да ја истражат оваа поврзаност, научниците спровеле две анкети со вкупно 665 корисници на социјалните мрежи, во период од осум месеци. Резултатите покажале дека луѓето со одредени нарцистички тенденции почесто развиваат зависност од социјалните мрежи. Некои од најизразените особини им биле желбата да им се восхитуваат, натпреварувачкиот дух и потребата да се бидат „херој“ во очите на другите луѓе.

Од друга страна, особините како што се непријателството кон другите и емоционалната дистанца почесто се развивале како последица на сè почестата употреба на социјалните мрежи, што укажува дека овие особини може да бидат несакан ефект од зависноста.

Научниците веруваат дека врската лежи во фактот дека нарцисоидните луѓе се исклучително преокупирани со својот имиџ, а социјалните мрежи се токму платформите што поттикнуваат постојано споредување и потреба за добивање потврда од другите.

Пошироката слика: Ризиците од зависноста од социјалните мрежи

Истражувачите, исто така, предупредија за поширокиот контекст на проблемот - луѓето кои се зависни од социјалните мрежи честопати имаат намалена социјална интеракција во живо, нарушен сон и послаби академски или деловни резултати.

Симптомите вклучуваат: постојано проверување на мрежите без контрола, емоционална зависност од онлајн интеракциите и неможност да престанат и покрај негативните последици.

Зависноста е почеста кај луѓе со ниска самодоверба, чувство на осаменост и изразен страв да се пропушти нешто важно (т.н. FOMO-Fear of missing out - страв од пропуштање), пишува “Journal of Research in Personality“.

Во истражувањето, научниците забележале шест форми на нарцизам: желба за восхит, натпревар, непријателство, изолација, херојство и т.н. самопромоција. Сите форми, освен самопромоцијата, покажаа поврзаност со зависноста од социјалните мрежи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.