Ова произлегува од извештајот објавен од група реномирани научници собрани од Британското Кралско друштво, најстарата независна научна академија во светот.

Според Би-Би-Си, вакцината за коронавирус јавноста често ја доживува како еден вид свет грал што ќе стави крај на пандемијата на короната.

Но, сите ограничувања што беа воведени, може само постепено да се ублажат и може да почекаме уште една година за ефективна вакцина.

Во моментов, се работи на дури 200 можни вакцини против коронавирус ширум светот, а самиот процес се случува со невидена брзина во светот на науката.

„Вакцината ни дава голема надеж за потенцијален крај на пандемијата, но во исто време знаеме дека историјата на развој на вакцините е проследена со неуспех“, рече др. Фиона Кали од Националниот институт за срце и бели дробови во лондонскиот Империјал колеџ, еден од најпрестижните универзитети во светот.

Би-Би-Си наведува дека има оптимистички најави, дури и оние кои доаѓаат од научни советници на британската влада, според кои некои луѓе би можеле да се вакцинираат оваа година, додека масовната вакцинација може да започне на почетокот на 2021 година.

Но, научниците од Кралското друштво предупредуваат дека тоа ќе биде долг процес.

"Дури и ако вакцината е достапна, тоа не значи дека сите ќе бидат вакцинирани во рок од еден месец. Зборуваме за шест месеци, девет месеци ... година", вели Нилај Шах, професор по хемиско инженерство на Империјал колеџ.

„Животот нема одеднаш да се врати во нормала во март“, додава Шах.

Во извештајот на Кралското друштво се наведува дека научниците сè уште се соочуваат со „огромни“ предизвици.

Некои од експерименталните пристапи на кои се работи, како што е РНК вакцината, никогаш не поминале низ процесот на масовно производство.

Тука е и прашањето на суровините, од самите вакцини, преку контејнерите за вакцини, сè до капацитетот за ладење, имајќи предвид дека некои вакцини мора да се чуваат на температура од минус 80 степени Целзиусови.

Проф. Шах проценува дека процесот на вакцинација ќе мора да се одвива постепено. Само во Велика Британија, вакцинацијата против корона треба да се одвива 10 пати побрзо од годишната вакцинација против грип, со 30 000 обучени здравствени работници да мораат да работат цело време.

Резултатите од првите студии сугерираат дека вакцините предизвикуваат одговор на имунолошкиот систем, но студиите сè уште не покажале дали тој одговор е доволен за да обезбеди целосна заштита или ублажување на симптомите на ковид-19, според Би-Би-Си.

„Ние едноставно не знаеме кога ќе биде достапна ефективната вакцина против коронавирус, колку навистина ќе биде ефективна и, што е клучно, колку брзо може да се дистрибуира“, рече професорот Чарлс Бангам, шеф на Одделот за имунологија на Империјал колеџ.

„Дури и да е ефективна, малку е веројатно дека ќе можеме целосно да се вратиме во нормала, па веројатно е дека дури и ако имаме вакцина за која знаеме дека е ефикасна, ќе мора постепено да ги ублажуваме ограничувањата“, додаде тој.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.