Пораката ќе биде објавена во научно списание, но допрва треба да биде подложена на стручна проверка.

Научниците со векови се ангажирани во слични обиди за комуникација.

На почетокот на 19 век, австрискиот астроном Џозеф Јохан Фон Литроу предложил да се ископаат ровови со одредена геометриска форма во Сахара, а потоа да се полнат со керозин и да се запалат за можните интелигентни цивилизации во вселената да разберат дека има интелигентни суштества на Земјата.

Обидите за комуникација со вонземјаните продолжија особено интензивно во текот на 20 век. Во 1962 година, советските научници насочија радио предавател кон Венера и испратија честитки во форма на Морзеова шифра.

Следниот обид за контакт со вонземјаните беше далеку поамбициозен, барем во однос на далечината. Во 1974 година, тим од научници, вклучително и астрономите Френк Дрејк и Карл Саган, испратија радио порака од опсерваторијата Аресибо во Порторико до Месиер 13, консталација од ѕвезди оддалечени околу 25.000 светлосни години. Сликата испратена во бинарен код ја покажува човечката фигура, структурата на ДНК, моделот на јаглеродниот атом и дијаграмот на телескопот. Кога ќе стигне до ѕвезденото јато, пораката веројатно нема директно да ја погоди населената планета, дури и да постои, но хипотетичките вонземјани сепак би можеле да ја откријат бидејќи испратениот сигнал е 10 милиони пати посилен од радио сигналите што ги емитува нашето Сонце.

Во 1977 година, вселенските летала Војаџер 1 и 2 лансираа порака која содржи звуци и слики избрани да ја претстават различноста на животот и културата на Земјата, врежани во позлатен бакарен диск. Моментално се наоѓа во меѓуѕвездениот простор на работ на Сончевиот систем.

Според Scientific American, новата порака, наречена Beacon in the Galaxy (BITG), била осмислена од научникот од млазната лабораторија на НАСА Џонатан Џијанг и неговите колеги.

„Направена е ажурирана, бинарно-кодирана порака за вонземска интелигенција во нашата галаксија Млечен Пат“, напишаа авторите на студијата.

Предложената порака вклучува основни математички и физички концепти кои треба да послужат како универзално средство за комуникација.

Вклучува и мала симпатична графика на две човечки суштества со лекција за анатомија и детали за ДНК, периодична табела на елементи и повик за одговор.

Луѓето природно сакаат да знаат дали има живот на друго место во универзумот, а особено други интелигентни суштества покрај нас. Потврдата дека тие постојат веројатно би била едно од најголемите откритија и би имало голем број сериозни филозофски, етички, религиозни и други импликации.

Но, научниците се уште се поделени околу одговорот на прашањето дали е паметно да се испраќаат пораки до вонземјаните или не. На пример, познатиот британски физичар Стивен Хокинг предупреди дека вонземската цивилизација не мора нужно да биде пријателска само затоа што е интелигентна и технолошки напредна

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.