Додека повеќето веруваат дека станува збор за природна комета, астроном од Харвард сугерира дека неговите необични карактеристики би можеле да укажуваат на вонземска технологија, пишува Euronews.

Што знаеме за мистериозниот посетител?

Сè започна на 1 јули 2025 година, кога астрономите што го користеа телескопот ATLAS (Asteroid Terrestrial-impact Last Alert System) во Чиле забележаа слаб, брзо движечки објект што никогаш порано не бил виден. Официјално именуван 3I/ATLAS (C/2025 N1), ова е само третиот потврден меѓуѕвезден објект што некогаш е забележан, по „Оумуамуа“ од 2017 година и 2I/Борисов од 2019 година.

Името го открива неговото потекло: „3I“ е за третиот меѓуѕвезден објект, а „ATLAS“ за мрежата на телескопи што го открила. Она што го прави посебен е неговата траекторија - брзината и насоката на движење покажуваат дека не е гравитационо врзана за нашето Сонце. Тоа значи дека мора да дошла од друг ѕвезден систем и случајно да долетала во нашето соседство.

Повеќето научници се согласуваат дека 3I/ATLAS е комета. Има опашка, станува посветла како што се приближува кон Сонцето и покажува знаци на исфрлање прашина и гас, класични карактеристики на комета.

Траекторија низ Сончевиот систем

Според пресметките на астрономите, 3I/ATLAS патува низ вселената со брзина од повеќе од 200.000 километри на час (околу 61 км/с), а нејзината брзина се зголемува како што се приближува кон Сонцето. Се движи во хиперболична орбита, што значи дека патува премногу брзо за гравитацијата на Сонцето да ја фати.

„Ќе помине низ внатрешниот Сончев систем - помеѓу орбитите на Марс и Земјата - а потоа ќе прелета покрај Сонцето“, изјави за „Гардијан“ Кон Стојцис, директор на комети и метеори во Астрономското друштво на Викторија. „Оваа орбита е на она што го нарекуваме хиперболична орбита.

Затоа, не е гравитационо врзана за Сонцето. Патува пребрзо и затоа едноставно ќе одлета на другата страна од Сончевиот систем“, додаде тој. Според НАСА, објектот ќе се приближи до Земјата на растојание од околу 270 милиони километри.

Природен феномен или вонземска технологија?

Иако за повеќето астрономи 3I/ATLAS е возбудлив, но природен феномен, еден истакнат научник повикува на претпазливост. Професорот Ави Лоеб, теоретски астрофизичар од Универзитетот Харвард, преку својот проект Галилео, ја истражува можноста дека тоа е доказ за вонземска технологија.

Во серија есеи, Лоеб постави провокативно прашање - дали научниците треба да ја разгледаат можноста објектот всушност да е вештачка сонда или артефакт од друга цивилизација? Во еден од есеите тој праша „Дали 3I/ATLAS генерира сопствена светлина?“, сугерирајќи дека неговата светлина можеби не доаѓа од рефлектираната сончева светлина, што би била карактеристика што ниедна позната комета ја нема.

„Хипотезата за која станува збор е дека неодамнешниот меѓуѕвезден посетител на нашиот Сончев систем, 3I/ATLAS, е технолошки артефакт и, згора на тоа, поседува активна интелигенција. Ако е тоа случај, тогаш следат две можности: прво, дека неговите намери се целосно бенигни, и второ, дека се злонамерни, или некаде помеѓу“, напиша Лоеб.

Тој, исто така, предупреди дека последиците, доколку хипотезата се покаже како точна, „би можеле да бидат потенцијално ужасни за човештвото и веројатно би барале одбранбени мерки“.

НАСА ги отфрла шпекулациите

Сепак, НАСА цврсто ги отфрли шпекулациите на Лоеб. „Изгледа како комета. Прави кометни работи. Многу, многу силно наликува, во речиси секој поглед, на кометите што ги знаеме“, изјави за „Гардијан“ Том Статлер, водечки научник на НАСА за мали тела во Сончевиот систем.

Лоеб подоцна го разјасни својот став, признавајќи дека „наједноставната хипотеза е дека 3I/ATLAS е комета“. Тој нагласи дека неговата цел е да ги оспори научните претпоставки, а не да дава дефинитивни тврдења. „Наместо тоа, да ја задржиме нашата детска љубопитност и да бараме докази, наместо да се преправаме дека сме возрасни во просторијата кои веќе ги знаат одговорите“, напиша тој.

Кога и како да се набљудува објектот?

Се очекува кометата да се доближи најмногу до Сонцето околу 30 октомври, на растојание од околу 210 милиони километри, што е веднаш во орбитата на Марс. Нејзината точна големина и својства сè уште се изучуваат, но НАСА предвидува дека таа треба повторно да стане видлива за телескопите на Земјата на почетокот на декември, откако ќе се појави зад Сонцето.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.