Првичната студија на примероците стари 4,5 милијарди години од астероидот Бену, собрани во вселената со сондата Озирис-Рекс, покажа висока содржина на јаглерод и вода, што заедно може да биде показател дека оваа карпа содржи градежен материјал кој е основа на животот на Земјата, објави американската агенција НАСА.

Ова е прелиминарна проценка на научниците кои учествуваат во истражувањето на материјалот донесен на Земјата со леталото Озирис-Рекс по мисијата од 7 години и поминати 6,21 милијарди километри.

- Примероците што ги врати Озирис-Рекс се најбогатите со јаглерод примероци од астероиди собрани досега и ќе им помогнат на научниците да го истражат потеклото на животот на нашата планета за многу генерации што доаѓаат. Речиси сè што правиме во НАСА е обид да одговориме на прашања за тоа кои сме и од каде доаѓаме. Мисиите како Озирис-Рекс го подобруваат нашето разбирање за астероидите кои можат да претставуваат закана за Земјата, а исто така ни даваат увид на она што се наоѓа далеку. Примерокот стигна до Земјата, но се уште чекаме научни тестови кои досега не се видени - изјави Бил Нелсон, администратор на НАСА.

Иако е потребна многу работа за да се разбере природата на пронајдените јаглеродни соединенија, првичното откритие е важно за идните анализи. Тајните во каменот и прашината од астероидите ќе се испитуваат со децении и ќе дадат увид во формирањето на Сончевиот систем, за тоа како материјалите неопходни за живот стигнале до Земјата и какви мерки треба да преземеме за да избегнеме удар на астероид на нашата планета , објави НАСА.

Целта на мисијата била да се соберат 60 грама материјал од астероидот, но се верува дека има повеќе. Кога била отворена сондата за материјал, на неа бил откриен дополнителен материјал.

- Нашата лабораторија е подготвена за сѐ што ни подготви Бену. Имаме научници и инженери кои со години работеа на развој на специјални ракавици и алатки за зачувување на материјалот од астероидот и за зачувување за да може да се проучува со децении во иднина - изјави Ванеса Виши, директорка на вселенскиот центар Џонсон во Хјустон.

Во текот на првите две недели, научниците направиле само кратки анализи на првичниот материјал, фотографирале и го скенирале на различни начини. Со помош на рендген и компјутерска томографија, создаден е 3Д модел на една од честичките, покажувајќи ја нејзината неверојатна внатрешност. Раните истражувања покажале дека има докази за јаглерод и вода во примерокот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.