Шминката би требало да биде сојузник во освежување на изгледот, особено кога станува збор за зрела кожа. Со правилен избор на нијансите и текстурата можно е да ги ублажите трагите од времето, да ја нагласите природната убавина и да постигнете ефект на подмладен изглед, но само ако шминката ја користите правилно.

За жал, многу дами во желба да изгледаат подобро, прават кардинални грешки постигнувајќи сосема спротивен ефект. Наместо сјајно и негувано лице, шминката ги истакнува брчките, сувата кожа, спуштените капаци и уморниот изглед. Еве кои најчести грешки може да направат да изгледате и 10 г. постаро.

Лоша рутина за нега на кожата

Ни најскапата шминка не може да ја прикрие лошата нега. Сувата и дехидрирана кожа прави шминката да изгледа нерамномерно нанесено, се лупи и ги истакнува знаците на стареење.

Правилната рутина подразбира миење, хидрирање и користење на крема со заштитен фактор која претставува основа за секоја добра шминка.

Изоставање на подлогата/прајмерот

Прајмерот не е луксуз туку клучен чекор за изедначен тен и долготраен ефект. Без него пудрата влегува во порите и фините брчки, нагласувајќи го сето она што сакате да го прикриете.

Исто така, без добра подлога, шминката трае пократко и изгледа неуредно. Подлогата ја измазнува површината на кожата и создава совршена основа за останатата шминка.

Погрешно нанесен коректор

Наместо да ги прикрие подочниците, погрешно нанесениот коректор честопати ги нагласува уште повеќе. Ако нијансата е премногу светла или премногу темна, создава ефект на „маскирање“, кој изгледа неприродно и го прави лицето визуелно постаро.

Коректорот треба лесно да се натапка, не треба да се размачкува и втрива. Секогаш избирајте кремасти и хидрирачки формули.

Претемно моливче или ајлајнер

Јаките црни и темнокафени линии околу очите може визуелно да го затворат погледот и да направат очите да изгледаат уморно. Кај зрелата кожа, тоа особено доаѓа до израз поради спуштените капаци.

Наместо дебели тешки линии, подобар избор се меките нијанси во сива, кафена или темно виолетова боја кои нежно го дефинираат окото. Важно е добро да ги блендирате за да добиете помек изглед.

Несоодветна боја на кармин

Прејаките темни или ладни нијанси може да направат да изгледате строго, а усните да изгледаат потенко. Исто така, ако карминот има премногу мат текстура, ги истакнува линиите и сувоста на усните.

Кај зрелите дами, повеќе одговараат кремасти текстури на кармин со топли и природни нијанси кои го освежуваат тенот. Не заборавајте го моливот за усни во природен тон, кој ги прави усните пополни.

Занемарување на веѓите

Веѓите имаат моќ да го подигнат лицето, но кога се претенки, неуредни или пресветли, лицето губи дефиниција и делува уморно. Правилно обликуваните веѓи ја враќаат структурата на лицето и го освежуваат погледот.

Избегнувајте премногу остри линии.

Неправилно користење на хајлајтерот

Иако овој производ може да го осветли лицето, погрешно нанесен тој често ги нагласува порите, брчките и текстурата на кожата. Премногу сјај на места каде кожата не е затегната, на пример, јаболчниците, или челото, може да направи лицето да изгледа масно и неуредно. Изберете дискретен сјај и нанесете го внимателно, само на високите точки на лицето.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.