Цунамито беше предизвикано од земјотрес што се почувствува во Јапонија и делови од Русија, на Хаваите и преку Пацификот сè до Калифорнија. Засега не се пријавени значителни штети или жртви, но властите ги предупредија луѓето да се држат подалеку од брегот и нагласија дека ризикот може да трае подолго од еден ден.

Цунами со висина од 3 до 4 метри е забележано на Камчатка во Русија, 60 сантиметри на северниот јапонски остров Хокаидо, а до под 30 сантиметри над нивото на плимата е забележано на Алеутските Острови на Алјаска.

Руските власти соопштија дека неколку лица се повредени, без да наведат точен број. Во Јапонија е повредено најмалку едно лице.

Генерал-мајор Стивен Логан, главен аѓутант на Министерството за одбрана на државата Хаваи, рече дека предупредувањето значи дека постои можност за силни струи и опасни бранови, како и поплави на плажите или во пристаништата.

Влијанието на цунамито би можело да трае со часови, или можеби и подолго од еден ден, изјави Дејв Снајдер, координатор за предупредување на цунами во Националниот центар за предупредување на цунами на Алјаска.

Одделот за вонредни состојби на Орегон соопшти дека се очекуваат мали бранови на цунами долж брегот почнувајќи од 23:40 часот по локално време, со висина на брановите меѓу 30 и 100 сантиметри. Тие ги повикаа луѓето да се држат подалеку од плажите, пристаништата и марините додека не се укине предупредувањето.

Поголемиот дел од западниот брег на САД, кој ги опфаќа Калифорнија, државата Вашингтон и канадската провинција Британска Колумбија, исто така беше под предупредување за цунами.

Епицентарот на земјотресот бил околу 119 километри југоисточно од рускиот град Петропавловск-Камчатски, на полуостровот Камчатка. Следеа повеќе последователни потреси со јачина до 6,9 степени по Рихтерова скала.

Градоначалникот на Северокурилск, Александар Овсејников, изјави дека пристаништето во градот е поплавено од цунамито, кое однело рибарски бродови во морето. Тој рече дека не е забележана поголема штета. Снабдувањето со електрична енергија е прекинато и властите ја проверуваат електричната мрежа по поплавата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.