Најважниот договор за иднината на Ливерпул - Канал 5

Фудбал

Најважниот договор за иднината на Ливерпул

Вирџил ван Дајк наскоро ќе влезе во историјата како еден од капитените кои кренале титула со Ливерпул, а во меѓувреме дојде моментот конечно да го продолжи договорот на уште две години. 

Најважниот договор за иднината на Ливерпул

Индепендент, Дејли Мејл

Вирџил ван Дајк наскоро ќе влезе во историјата како еден од капитените кои кренале титула со Ливерпул, а во меѓувреме дојде моментот конечно да го продолжи договорот на уште две години. Холанѓанецот е толку фундаментален дел од тимот што изгледа нереално дека тој не го продолжуваше договорот до неодамна и дека ќе стане слободен агент на лето. Теоретски се уште постоеше можност да ја подигне титулата во Премиер лигата и ова да му биде последен чин како играч на Ливерпул, а управата да го пушти да си замине.

Фудбалерот со својата изјава пред неколку дена направи целата сага да изгледа како обична формалност: „Сè за што Ливерпул се залага е дел од мене, рече веројатно најдобриот централен дефанзивец што клубот некогаш го имал“.

Во пракса, ниту клубот, ниту самиот играч не сакаа разделба. Исходот не е неочекуван, единствено необјасниво е зошто преговорите не беа завршени порано. Но, Вирџил ја носеше својата феноменална смиреност надвор од теренот и ја покажуваше во секое интервју во кое го прашуваа за неговата иднина. Менаџерот Арне Слот не се двоумеше во тоа дека сака да го задржи својот сонародник.

Ван Дајк продолжува да биде најважната фигура во овој тим заедно со Мохамед Салах и тие се двајцата најкористени играчи на Слот во тековната шампионска кампања.

Капитенот веќе има 33 години, но тоа не го спречува да биде на врвно ниво, а досега е број 1 во тимот по минути одиграни во првенството.

И покрај неговите неколку грешки во последните натпревари, тој продолжува да биде речиси беспрекорен – и затоа целосно го заслужува новиот договор што ќе го задржи на „Енфилд“ до неговиот 36-ти роденден. Со новите договори за него и Салах, клубот обезбеди време за повнимателни промени во составот без да предизвика сериозни пресврти.

И ќе мора да има промени и одбраната околу Ван Дајк не може да остане иста. Трент Александер-Арнолд очигледно нема повторно да потпише и ќе се пресели во Реал Мадрид, а на позицијата лев бек мора да се најде долгогодишен наследник на Енди Робертсон.

Додека се случуваат потребните трансфери и се прилагодуваат новите играчи, Вирџил ќе ја обезбеди толку важната стабилност и континуитет. Тој одамна докажа дека ги прави подобри оние околу него. Дејан Ловрен, Џоел Матип и Џо Гомез беа во животна форма додека играа покрај него.

Сега истото се случува и со Ибрахима Конате во неговата најсилна сезона досега. Дали Французинот ќе биде исто толку убедлив без присуството на колосот покрај него?

Ливерпул повеќе би сакал да не го знае одговорот, или барем не уште.

Порано или подоцна, дури и ѕвездите како Салах и Ван Дајк ќе почнат да опаѓаат и ќе треба да бидат заменети, но времето сè уште не е дојдено - и да се најдат еквивалентни замени е речиси невозможно.

Вирџил беше прашан за договорот што му истекува уште во јануари 2024 година, кога останаа 18 месеци од договорот.

„Тоа е големо прашање, сè уште не знам“, одговори тој, признавајќи дека најпрвин сака да види во која насока ќе оди Ливерпул без Јирген Клоп.

Набргу по доаѓањето на Слот, стана јасно дека на играчите, вклучувајќи го и Ван Дајк, им се допаѓа новиот тренер.

Медиумите на Островот шпекулираа дека интерес за дефанзивецот имало и од други клубови, меѓу кои и од Челзи, но добиле индикации дека тој ќе остане на „Енфилд“.

Се зборува дека искуството со репрезентацијата на ЕП 2024 влијаело и на односот на Холанѓанецот. Ван Дајк болно ја прифати елиминацијата од Англија во полуфиналето и му требаше малку време да го преболи разочарувањето – но како резултат се врати помотивиран да ја одржи својата прекрасна форма уште неколку години.

Играчот ќе има 35 години до финалето на Светското првенство во 2026 година следната година, но годините не го спречуваат во неговите планови да ги води „лалињата“ со капитенската лента на уште еден голем турнир.

- Пред да работам со Вирџил, секогаш велев дека повеќе не верувам во целиот концепт на лидер. Но, тој е момче кое постојано се грижи момците да бидат на вистинскиот пат и тој е лидер и во тренерскиот процес. Тој дава добар пример на тренинзите и во салата, вели Слот за него.

Ван Дајк крајно сериозно ја сфаќа капитенската улога и смета дека е негова должност да се грижи за односите во целиот тим.

Тешко е да се прецени неговата улога во успехот на Ливерпул, а тој останува, според сите пресметки, најдобриот дефанзивец во Премиер лигата и можеби во светот.

Раководството на клубот немаше дилеми дека сака да го задржи, но за расчистување на сите детали од новиот договор беше потребно време. Првата понуда од спортскиот директор Ричард Хјуз до претставниците на играчот беше дадена во летото минатата година.

По неколкумесечно разјаснување, напредок беше постигнат во март, но целиот процес не ја наруши концентрацијата на Ван Дајк, кој верува дека е способен да го одржи своето ниво уште 3-4 години.

Ѕвездата има голема верба во спортската наука и современите методи на подготовка и закрепнување, а има и личен тим кој се грижи за неговата исхрана, фитнес тренинзите и процесот на закрепнување.

Исто така, познато е дека Вирџил и неговото семејство го сакаат животот во Ливерпул и немале намера да се преселат на друго место. И сето тоа се предуслови за дефанзивецот да продолжи да биде толку сигурен и значаен за тимот во следните две години.

Со новиот договор, Ливерпул обезбеди задржување не само на најдобриот дефанзивец, туку и на најдобриот капитен - а кога имате таква бројка, возраста едноставно престанува да биде одлучувачки фактор.

Затоа, не е ни чудо што овој договор ќе се покаже како најзначаен за краткорочната иднина на „црвените“ и нивните шанси за трофеи следната сезона.

Тагови: Ливерпул Премиер лигата

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Технологија

Колекционерско издание на „GTA 6“: За 400 долари добивате сè освен самата игра

Ако се суди според огромната возбуда околу „Grand Theft Auto VI“, брзо се приближуваме кон еден од најголемите настани во светот на видеоигрите во последните неколку години.

Колекционерско издание на „GTA 6“: За 400 долари добивате сè освен самата игра

Новата „GTA“ ветува враќање на сè што ги направи автомобилите клучен дел од серијалот – од брзи потери и трки до уште подетални опции за прилагодување на возилата. Сето ова доаѓа со препознатливата мешавина од криминал, хаос и судири со законот, по кои станаа познати „Rockstar Games“.

Сепак, иако очекувањата се огромни, најновата одлука на „Rockstar“ може да разочара дел од фановите.

Компанијата претстави колекционерско издание насловено „The Goodtime State - Vice City Collection“, со висока цена од 399,99 долари. Проблемот е што во пакетот недостасува најважниот елемент: самата игра.

Што добивате?

„Rockstar“ ја претставува колекцијата како луксузен пакет со предмети за колекционери, инспириран од светот на „Vice City“. Таа содржи разновидни предмети, вклучувајќи очила за сонце „Oakley“, налепници, значки и мапа на Леонида – измислениот регион во кој се одвива дејството на „GTA VI“.

Купувачите добиваат и бејзбол капа, фигура на маскотата на „Vice City“, чашка за жесток пијалак, торба за носење преку тело, приврзок за клучеви, стапче за мешање коктели и магнетно огледало.

Иако колекцијата е очигледно наменета за сериозни колекционери, во кутијата нема да го најдете најважниот предмет: „GTA VI“.

За самата игра, ќе треба да издвоите дополнителни 79,99 долари за стандардното издание или 99 долари за „Ultimate“ верзијата. Тоа значи дека купувачот што го сака целиот пакет ќе мора да плати речиси 480 или 500 долари, во зависност од изданието на играта.

„GTA VI“ без физички диск

Колекционерскиот сет пристигнува во време кога „Rockstar“ веќе предизвика реакции со одлуката „GTA VI“ да биде првиот голем AAA наслов на компанијата без традиционално издание на физички диск.

Играта ќе биде достапна дигитално преку продавниците на „PlayStation“ и „Xbox“, додека физичките примероци во продавниците ќе содржат само код за преземање. Оваа одлука предизвика негативни реакции во дел од гејмерската заедница. Извршниот директор на „Take-Two Interactive“, Штраус Зелник, го бранеше овој пристап, тврдејќи дека физичките дискови веќе немаат голема смисла за потрошувачите.

Ситуацијата е особено интересна за колекционерите. Тие сега можат да потрошат речиси 400 долари за кутија полна со предмети поврзани со играта, а сепак да не ја добијат самата игра во таа кутија.

„Rockstar“ има направено нешто слично и претходно

Сепак, ова не е првпат „Rockstar“ да продава колекционерска кутија без самата игра. Компанијата направи сличен потег во 2018 година со „Red Dead Redemption 2“, изданието „Collector's Box“ објавено тогаш, исто така, не содржеше примерок од играта.

Разликата, сепак, беше во цената. Таа колекционерска кутија чинеше 99 долари – помалку од една четвртина од цената на новата „Vice City Collection“. Денес, оригиналните колекционерски кутии за „Red Dead Redemption 2“ можат да се најдат на „eBay“ по цени што надминуваат 700 долари, што покажува дека вредноста на ваквите производи може да порасне кај колекционерите со текот на времето.

Сепак, останува фактот дека фановите на „GTA VI“, кои ги сакаат и колекционерските предмети и самата игра, ќе мора да ги купат одделно.

Со цена од речиси 400 долари само за колекционерските предмети, „Rockstar“ очигледно цели кон најпосветените фанови на серијалот и кон колекционерите кои се подготвени да платат висока цена за предмети поврзани со еден од најочекуваните наслови во историјата на видеоигрите.

Извор: Б92

Тагови: GTA 6

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

„Многу те сакам“: Лука Модриќ им ги разнежни срцата на фановите со нова објава

Лука Модриќ преку социјалните мрежи ѝ го честиташе деветтиот роденден на својата најмлада ќерка, Софија.

„Многу те сакам“: Лука Модриќ им ги разнежни срцата на фановите со нова објава

По тој повод, хрватскиот фудбалер сподели неколку фотографии на кои се заедно, придружени со кратка и емотивна порака.

На една од фотографиите, таткото и ќерката се насмеани додека позираат заедно, додека другите прикажуваат опуштени моменти од семејниот живот. На пример, на една фотографија се гледа како Софија седи на рамениците на татко ѝ, а на друга Модриќ ѝ помага да си ја исуши косата.

„Среќен роденден на мојата прекрасна и многу посебна мала принцеза! Многу те сакам!“, напиша Модриќ.

Најмладото од трите деца

Софија е најмладото дете на Лука и неговата сопруга, Вања Модриќ. Покрај неа, тие имаат син, Иван, и ќерка, Ема. Лука и Вања стапија во брак во 2010 година, а една година подоцна ја прославија и црковната венчавка во Загреб.

Модриќ честопати преку социјалните мрежи ги одбележува важните моменти од животот на своите деца, особено нивните родендени. Неговото семејство често го придружува на фудбалски настани. Сопругата и децата честопати го бодреле од трибините за време на клучни натпревари и му се придружувале во прославите по големите победи.

Извор: Индекс.хр

Тагови: Лука Модриќ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Нов потег на Путин: Русите вежбаат со Кинезите, пристигна нуклеарно предупредување

Рускиот претседател Владимир Путин вчера присуствуваше на воена вежба на планините Урал, во која учествуваа војници од Кина и од неколку други земји.

Нов потег на Путин: Русите вежбаат со Кинезите, пристигна нуклеарно предупредување

Путин го посети воениот полигон во регионот Чељабинск за да ја следи завршната фаза од вежбата „Центар-2026“. Вежбата се одржа во склоп на вежбата „Интеракција-2026“, спроведена од членките на Организацијата на Договорот за колективна безбедност – безбедносен сојуз предводен од Москва, составен од неколку поранешни советски републики.

Путин изјави дека 47.000 војници учествуваат во вежбата „Центар-2026“, вежбајќи одбивање напади на 11 полигони и во Каспиското Море. Вежбата започна во понеделникот, а завршува денес.

Путин предупреди дека нема да се двоуми да употреби нуклеарно оружје за одбрана на Калининград.

„Околу 6.000 војници од Русија и од други земји учествуваа во завршната фаза на полигонот Чебаркул“, рече Путин.

YouTube video

Тој додаде дека делегации од 55 земји учествувале како набљудувачи.

Според извештаите на руските медиуми, во вежбата учествуваат воени единици од Белорусија, Киргистан и Таџикистан, заедно со војници од Кина, Монголија и Пакистан. За време на посетата, Путин изврши увид во различни видови вооружување, вклучително и новите беспилотни летала „Геран“ на млазен погон, кои руската војска ги користи во нападите врз Украина.

Посетата на Путин уследи еден ден откако Русија го предупреди НАТО дека нема да се двоуми да употреби нуклеарно оружје за одбрана на Калининград, доколку некоја членка на воениот сојуз се обиде да ја отсече таа руска ексклава на западот на земјата од остатокот на Русија.

Извор: Б92

Тагови: Владимир Путин

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер