Заменик директорот за инфективни болести во Центрите за контрола и превенција на болести на САД (ЦДЦ) и водачот на истражувањето, Џеј Батлер изјавил дека резултатите од нивната студија ја поддржуваат важноста на носењето маски и придржувањето кон физичката оддалеченост.

За студијата, истражувачите ги класифицирале потенцијалните вектори на коронавируси во три групи: симптоматски, пресимптоматски (оние кои сè уште немаат симптоми, но ќе ги развијат) и асимптоматски.

Тие потоа развиле модел за тоа колку секоја група ќе го шири коронавирусот врз основа на денот кога луѓето се најмногу заразни. Тие го утврдиле петтиот ден на изложеност на коронавирус како основна вредност, бидејќи било утврдено дека тоа е просечно времетраење на инкубацијата. Ова е време кога повеќето луѓе развиваат симптоми.

Моделот првично вклучувал претпоставки дека 30 проценти од заразените се асимптоматски и дека нивната количина на инфективност е малку помала (75 проценти) во споредба со оние кои покажуваат или ќе развијат симптоми.

Според овие претпоставки, резултатите покажале дека асимптоматските луѓе се одговорни за дури 24 проценти од инфекциите.

Но, научниците создале и сценарија во кои врвот на инфективноста била на третиот, четвртиот, шестиот и седмиот ден, во кои тие го зголемиле и спуштиле процентот на асимптоматски луѓе, како и нивната стапка на инфективност во споредба со другите групи.

Во огромното мнозинство на овие сценарија, асимптоматските луѓе (асимптоматски и пресимптоматски) се покажало дека пренесуваат најмалку 50 проценти од новите инфекции.

„Стапките на пренос беа генерално над 50 проценти, без оглед на широкиот опсег на почетните вредности“, рече Батлер, додавајќи дека аналитичарите се изненадени од постојаноста на резултатите.

Дури и во најконзервативната проценка, во која врвот на инфекцијата е седмиот ден по изложувањето на вирусот, а асимптоматските пациенти предизвикуваат 0 проценти од инфекциите, пресимптоматските сепак предизвикале една четвртина од новите инфекции.

Батлер и неговите соработници истовремено предупредуваат дека нивните модели веројатно ќе ја потценат реалната стапка на ширење во која учествуваат асимптоматските луѓе, бидејќи стапките се пресметуваат како секој да се движи слободно каде што сака.

Но, во реалноста, на влезот во многу ресторани и други установи се мери температура за да се спречи влегување на лица со симптоми. Покрај тоа, многу луѓе со симптоми се веќе во самоизолација дома, што значи дека е помалку веројатно да ја шират инфекцијата како оние кои се чувствуваат здрави.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.