Автомобилизам

Најмалиот електричен СУВ на Фолксваген ќе чини околу 30.000 евра (ФОТО)

Volkswagen ја објави и првата официјална фотографија од кросовер верзијата на својот нов, најмал електричен автомобил наречен ID.2 SUV.

Мора да се признае, тоа е само сенка која дава навестување на страничната силуета, но тоа е доволно за да се заклучи дека финалната верзија на автомобилот нема премногу да се разликува од концептниот модел ID.2all, кој беше претставен во септември оваа година .

Да потсетиме, ова е најмалиот модел од серијата ID, кој - очигледно - ќе биде збогатен со различни каросериски верзии, поради што овој веќе ја доби наставката SUV.

Сликата ги потврдува компактните димензии на финалната верзија и силниот дизајн со кратки настрешници и нагласени лакови околу тркалата. Од сликата може да се погоди колку тенки LED светла ќе се пренесат од концептот, додека задниот дел би требало да изгледа како оној на моделот ID.Buzz.

Инаку, автомобилот изграден на новата платформа MEB ќе има избор од две верзии на батерии - со капацитет од 38 или 58 kWh, а со помош на брз полнач од 125 kW, тие треба да се полнат до 80% капацитет за помалку од 30 минути.

Конечно, со оглед на тоа дека класичната верзија на моделот ID.2 ќе чини околу 20.000 евра, за очекување е SUV варијантата да биде многу поскапа, но секако поевтина од поголемиот модел ID.3. Се очекува цифра од околу 30 илјади евра. Сепак, треба да се каже дека допрва ќе треба да ја почекаме финалната верзија на овој модел. ID.2 ќе биде лансиран на почетокот на 2025 година, а неговата SUV верзија можеби една година подоцна.

Фудбал

ПСЖ ќе му понуди нов договор на Донарума

Пари Сен-Жермен има намера да го продолжи договорот со голманот Џанлуиџи Донарума, пренесува новинарот Џанлука Ди Марцио.

Според изворот, парижаните ќе преговараат со 25-годишниот Италијанец по завршувањето на сезоната 2023/24. Управата на клубот сака да го направи голманот капитен на тимот.

Донарума игра за ПСЖ од јули 2021 година. Во сезоната 2023/24 Донарума учествуваше на 40 натпревари во сите натпреварувања, прими 36 гола и ја зачува мрежата чиста 16 пати.

Актуелниот договор на голманот со францускиот клуб е со важност до крајот на јуни 2026 година.

Свет

Скај Њуз: Кина го хакирала платниот систем на британското Министерство за одбрана

Британскиот портал Скај њуз денеска објави дека кинеската влада извршила неколку кибер напади врз платниот систем на британското Министерство за одбрана, кој содржи приватни информации за воениот персонал.

Членовите на Долниот дом на британскиот Парламент денеска ќе бидат информирани за овој инцидент.

Пратеникот на Конзервативната партија Тобијас Елвуд изјави дека Кина „најверојатно бара финансиски слабости“ кај воениот персонал за да натера некои припадници да соработуваат со Кина во замена за пари.

„На потешкиот начин учиме како уметноста на војување брзо се менува со напредокот на технологијата. Одбраната на дигиталниот терен сега е исто толку важна како и одбраната на физичкиот. Доколку овој вид на кибер напад се случува во Велика Британија, можеме да претпоставиме дека ќе бидат нападнати и други земји-членки на НАТО“, рече Елвуд.

Истрагата на Министерството за одбрана досега не покажала дека се украдени некои податоци.

Свет

Катовице: Во салата каде попладнево ќе заседава полската влада пронајден апарат за прислушување

Во салата во седиштето на Шлезискиот регион во Катовице, пред попладневната седница на чешката влада, откриен е и демонтиран апарат за прислушување, соопшти портпаролот на министерот координатор на полските безбедносни служби, Јацек Добжињски.

Службата за државна безбедност и Агенцијата за внатрешна безбедност ја демонтирале направата и покрената е истрага за тоа кој ја поставил.

Полската влада попладнево ќе одржи вонредна седница во Катовице бидејќи премиерот Доналд Туск и претседателката на Европската комисија Урсула фон дер Лајен се главни гости на меѓународниот економски форум во тој град на југот на Полска.

Владата нема „чувствителни“ теми на дневниот ред на денешната седница, најавено е дека ќе одлучува за помош на граѓаните за плаќање на енергетски производи и предлогот за Законот за дигитални комуникации со кој во полските закони се воведува кодот на Европската унија во таа област.