Наградата „Прозарт“ за хрватската писателка Даша Дрндиќ

Писателката од Хрватска Даша Дрндиќ ја доби наградата „Прозарт” за 2014 година, која меѓународниот фестивал на прозата „ПРО-ЗА Балкан“ ја доделува на истакнат автор од Балканот за авторски придонес во развојот на балканската книжевност.

Одлуката едногласно ја донел Одборот за доделување на наградата, а на Дрндиќ ќе и биде врачена на свеченото затворање на фестивалот, кој ќе се одржува од 27-ми до 29 мај во Скопје.

- Иако верувам дека нема претерано разумни причини било чие постоење да се ограничува на негова/нејзина национална, регионална или било која друга припадност, оваа награда ме радува бидејќи промовира литература напишана на јазиците кои при проценувањето на книжевните вредности често се заобиколуваат или запоставуваат со оглед на тоа дека не спаѓаат во таканаречените големи светски јазици. Така, се случува (било поради предрасуди, било поради тоа што процесот на промовирање и преведување на средноевропска, северноевропска или американска книжевност е полесна и помалку ризична работа) понекогаш просечни, па дури и книжевно ирелевантни дела да бидат незаслужено високо валоризирани. Оваа награда затоа можеби нуди можност и делата напишани на јазиците „од Балканот“ некако да се пробијат до поголем број на читатели, изјави Дрндиќ за наградата.

Дрндиќ е родена во Загреб. Од 1999 година работи како професор на Филозофскиот факултет во Риека, и предава модерна британска литература, американска и британска модерна драма, литература и филм, и креативно пишување. Предавала и на Универзитетот во Торонто. Активна е и како преведувач, пишува радиодрами, литературна критика, есеи... Учествувала на бројни книжевни резиденции низ Европа. Објавила десетина книги од областа на прозата и литературната критика.

За документарниот роман „Sonnenschein“ ги доби наградите „Фран Галовиќ“ и „Киклоп“ - двете за најдобра прозна книга во 2007 година, а беше номинирана и за книжевната награда на Јутарњи лист. Докторската дисертација на Даша Дрндиќ е на тема „Феминистички ракопис или политичка парабола: идеите за феминизмот и левицата во драмите на Лилиан Хелман”.

Фестивалот „ПРО-ЗА Балкан“ го организира издавачката куќа „Икона“. Првото издание се одржа од 4-ти до 6 март 2013 кога наградата „Прозарт“ ја доби српскиот писател Владислав Бајац. Гости писатели лани беа Андреј Блатник од Словнија, Алек Попов од Бугарија, Андреј Николаидис од Црна Гора и Миљенко Јерговиќ од Хрватска. /МИА

Левица ја поднесе инцијативата за Референдум до ДИК

До петок да се соберат сто потписи, а собраниската процедура да помине без опструкции- ова се очекувањата на лидерот на Левица, Димитар Апасиев, кој формално ја достави иницијативата за референдум во ДИК.

Првичната процедура ќе се спроведува во 30 општини, а првопотпишан ќе биде тој. Целта на опозициската партија е со граѓанско изјаснување да се укине преговарачката рамка и да се отфрлат бугарските барања преку референдумско прашање “Дали сте за продолжување на преговорите со ЕУ, со прифаќање на собраниските заклучоци од 16 јули 2022 година”.

Народот треба да го каже последниот збор за ова прашање од национален интерес, вели Апасиев, кој смета дека иницијативата е по примерот на Преспанскиот договор, па затоа не очекува оваа да заврши како претходната на ВМРО-ДПМНЕ. Тој најави дека следната недела ќе ја достави во Собрание, а доколку Џафери ја прогласи за неуставна, следува целосна блокада на законодавниот дом.

-Доколку во некое сценарио тоа се случи ние најавивме дека целосно ќе го блокираме собранието и мислам дека тој нема да се дрзне тоа да го направи. Ќе видиме затоа што не можеме да претпоставиме, тој силеџиски го толкува и Уставот и деловникот. Тој не е надлежен за тоа што го прави, тој е надлежен само да ја прими, да види титулари, адресари. Референдумот не е анти ЕУ, туку бојкотот на референдумот или недавањето да се случи референдум е чин на анти ЕУ бидејќи демократското изјаснување на граѓаните не може да биде анти ЕУ. – Димитар Апасиев – претседател на Левица.

Планот на Левица е до крајот на оваа година да се соберат и неопходните 150 илјади граѓански потписи, а поддршка очекуваат од сите опозициски партии. Досега немале разговарано на оваа тема со другите опозиционери, за што потврди и претседателот на ВМРО-ДПМНЕ Христијан Мицкоски.

Дали неговата партија ќе ја поддржи рече дека ќе одговори тогаш кога официјално ќе пристигне во Собранието, но според досегашните информации од пратениците, ќе се приклучат на секоја иницијатива која е во насока на поништување на Договорот за добрососедство.

Обидот на ВМРО-ДПМНЕ преку референдум да се поништи Договорот од 2017та пред две недели заврши неуспешно со образложение од собранискиот спикер Џафери дека ратификуваните меѓународни договори се дел од внатрешниот правен поредок и не можат да се менуваат со закон.

Глобален клуб на жени лидерки Г100: Жените припаѓаат на секоја маса каде што се носат одлуки

„Сестринството е тоа кое генерира позитивна енергија и тука лежи нашата моќ“.

Жените припаѓаат на секоја маса каде што се носат одлуки. Сестринството е тоа кое генерира позитивна енергија и тука лежи нашата моќ, порача основачката на Глобалниот клуб на жени лидерки Г100 Харбин Арора на настан организиран од нивниот огранок во Скопје.

-Тоа е семето, тоа е изворот и тоа е лепилото на љубовта што ја става сета љубов во срцата на жените заедно во една концентрирана форма. Затоа што тука лежи нашата моќ. Г100 има визија, има мисија сето тоа е таму. Но, пред сè, тоа е место на кое треба да се припаѓа. Тоа е место каде што ние, жените, од целиот свет, соочувајќи се со истите борби, сонувајќи ги истите аспирации да се исполниме, бараме поддршка, сила. Секако дека имаме сила, ние сме жени, вели Арора која заедно со нејзиниот тим, престојува во земјава во рамки на проектот за посета на жените лидерки во регионот.

Во Индија, се вели, затоа што Бог не можел да биде секаде затоа ги создал жените, нема недостиг на сила во нас. Но, тогаш, нагласува Арора, дури и за најсилната личност, на сите ни е потребна таа рака за помош во областите што се оставени на страна, за кои не можевме да се грижиме.

-Значи, зошто воспитуваме деца, зошто треба да останеме зад економскиот мејнстрим, зошто всушност да бидеме казнети. Тоа не го правиме за себе, ние го правиме за нашите семејства, за нашите народи, за нашите заедници, всушност треба да бидеме почестени и почитувани поради тоа. Затоа што даваме живот на нешто друго освен на нас самите. Време е жените во светот да припаѓаат на просторот што ги почитува жените, кој ги обединува жените во светот како едно, а исто така ни кажува да ги надминеме сопствените бариери, да се гледаме една со друга со очи на сестринството. Жените припаѓаат на секоја маса каде што се носат одлуки. Треба да бараме почит, со почит, вели Арора

Ленка Угриновска, претседателка на Здружението на жени менаџери „Елит“ и дел од овој Глобален клуб, истакна дека нивното Здружение веќе има изградено силна мрежа посветена на родовата еднаквост.

– Нашата организација има мисија да го потикнува и промовира женското претприемништво и бизнис лидерство, работи на зголемување на бројот на жените на одлучувачки позиции, на тоа да ги направиме жените важен фактор во економијата, на креирање нови работни места и подобрување на квалитетот на животот. Живееме во мала земја, но полна со храбри жени. Уверена сум дека ги избрав најдобрите, ние сме 35 и сум многу горда на нив. Благодарение на нив, лидерството полека станува се повеќе родово еднакво, а се повеќе жени се на раководни позиции во институциите со своите компетенцции и одговорноси, вели Угриновска.

Како крило, додаде таа, не сме фокусирани само на проширување на мрежата туку и на развој на локални стратегии и активности за поддршка на целите на Глобалниот клуб на жени лидерки Г100. Имаме неколку иницијативи покренати од членките и се надевам, вели Угриновска, дека многу скоро ќе разговараат за резултатите од нив.

Даниела Димитриевска извршен директор на Македонското женско лоби истакна дека Северна Македонија е организирана земја со организирани институции кои се посветени на родовата еднаквост.

-Македонија од 2006 година има закон за еднакви можности на мажите и жените и тој отвори пат за многу промени во законодавството, а тоа беше и основа за формирање на посебна Парламентарна група од пратенички од сите политички партии. Од 2006 постои и посебен оддел во МТСП кој работи на областа на родова еднаквост и еднакви можности, а во секоја од општините во земјата формирани се времени комисии за родова еднаквост кои одлучуваат за родовата еднаквост на локално ниво. Постојат и многу други форми на невладини организации, а во Владата постои меѓусекторска група за советување на владата во делот на правото. Ова е повеќе или помалку структура која функционира, вели Димитриевска.

Имаме развиен систем и поредок, ги има сите институции, но, додава таа, можеби е потребен притисок за да побараме од нив да одговорат на нашите потреби.

-Реалноста е дека не гледаме многу помош од нив, дека не ги притискаме и дека не очекуваме многу помош од никого, бидејќи според нашата традиција веруваме дека можеме се сами, а со тоа ги пропуштаме нашите можности. Можеби овој и други форуми можат да ни обезбедат информации и размена на искуства како да работиме подобро, вели Димитриевска.

Во Глобалниот клуб Г100 членуваат најистакнатите светски жени лидерки кои го споделуваат своето знаење и искуство. Глобалниот клуб Г100 има 100 секторски крила и претставнички од сите земји и свои канцеларии во Брисел, Њујорк, Њу Делхи и Женева и брои околу 1.000.000 членки ширум светот.

Стратегијата на Глобалната мрежа Г100 е во корелација со целите за одржлив развој на Обединетите Нации, поконкретно родова еднаквост и еманципација на жените и девојчињата. Во овој контекст членките на глобалната мрежа Г100 со заеднички сили работат на изнаоѓање на применливи решенија кои ќе овозможат вистинска инклузија и економско и социјално зајакнување на жените и девојчињата ширум светот. /МИА

Лидерот на ВМРО-ДПМНЕ Мицкоски презентираше план за справување со енергетската криза

Лидерот на ВМРО-ДПМНЕ, Христијан Мицкоски, ги нуди сите контакти со кои располага за да се набават енергенси за потребите на стопанството. 

Од каде и по која цена не откри, но посочи дека ќе бидат доволни за да се стават сите домашни капацитети во функција. Според неговите проценки, на овој начин фирмите ќе плаќаат двојно помалку за струја.

Мицкоски предлогот им го соопшти и лично на компаниите.. За првиот човек на Сојузот на стопански комори, Трајан Ангелоски, добар дел од предлозите на опозицијата се конструктивни и добри. Засега нема сознанија колку фирми запреле со работа поради скапата струја и колкави ќе бидат штетите. Вели, потешкотиите во работата се уште од летово, но не сака уште сега да прогнозира како ќе се истурка зимата.

До крајот на неделава или најдоцна почетокот на следната, ВМРО-ДПМНЕ ќе поднесе и предлог за измени на Законот за енергетика во Собранието, со кои се предвидува комуналните претпријатија, водостопанството, училиштата, градинките и болниците да се префрлат од отворен на регулиран пазар и на таков начин да плаќаат сметки како домаќинствата, а не како индустрија...

Од Владата истакнаа дека ќе ги разгледаат предлог-мерките на опозоцијата и ќе се произнесат по нив.

притисни ентер