Живот

Надуеност, умор, непријатно чувство после оброкот – што е скриена нетолерантност на храна?

Дали некогаш сте се чувствувале уморно, подуено или без концентрација после јадење, иако не сте јаделе ништо „тешко“?

Иако можеби веднаш не помисливте дека причината може да биде храната, вашето тело често пред вас забележува кога нешто не му одговара и испраќа сигнали.

Скриената нетолерантност не е нужно медицински потврдена преку тестови, но има вистинско влијание врз секојдневниот живот на една личност. Во овој контекст, многу луѓе исфрлаат одредени состојки од нивната исхрана, не затоа што мораат, туку затоа што нивниот живот е поедноставен и полесен без нив.

Една таква состојка е лактозата, а производите без неа се ново секојдневие за секој што сака поголема леснотија и помалку оптоварување.

Лактоза - тивка непријатност

Лактозата е природен шеќер што се наоѓа во млекото и млечните производи, а нетолерантноста на лактоза е неможност на телото да ја свари, што се јавува кога тенкото црево не произведува доволно од дигестивниот ензим лактаза. Овој ензим ја разградува лактозата во храната за да може телото да ја апсорбира во крвотокот.

Луѓето кои имаат нетолеранција на лактоза чувствуваат непријатни симптоми по консумирање млеко или млечни производи, а најчестите симптоми се надуеност, дијареја и гасови.

За разлика од нетолерантноста на лактоза, која е добро позната и медицински дефинирана, многу луѓе без потврдена дијагноза откриваат дека се чувствуваат подобро кога ја избегнуваат. Ова не е тренд од досада, туку промена што ги прави луѓето да се чувствуваат полесно и да функционираат подобро во текот на денот.

Затоа производите без лактоза повеќе не се резервирани за луѓе со дијагностицирана нетолерантност, туку денес нив ги избира секој што сака да живее без непријатности и со повеќе енергија, а тоа го потврдуваат и пазарните трендови - според истражувачката агенција Euromonitor International, продажбата на производи без лактоза расте во последните години, а полиците во продавниците нудат сè поразновиден избор.

Како се прави млекото без лактоза?

Безлактозното млеко се прави од обично кравјо млеко, но лактозата – природниот млечен шеќер што предизвикува дигестивни проблеми кај многу луѓе - се разградува ензимски. За време на производството, се додава ензимот лактаза, кој ја разградува лактозата на поедноставни шеќери - гликоза и галактоза - кои телото полесно ги апсорбира. Затоа млекото без лактоза не предизвикува непријатност кај чувствителните луѓе и ги задржува сите хранливи вредности, како што се калциум, протеини и витамини од групата Б. Освен што е полесно за варење, често има малку посладок вкус поради природно присутните едноставни шеќери, иако нема додаден шеќер. Во пракса, разликата е само во тоа што полесно се вари, а хранливата вредност останува иста.

Слушајте го вашето тело

Иако науката сè уште дебатира за разликата помеѓу клиничката нетолеранција и осетливоста на лактоза, факт е дека многу луѓе едноставно се чувствуваат подобро кога ја исфрлаат од нивната исхрана.

За некои работи не е потребна потврда од лекар за да знаете како се чувствувате. Сè повеќе луѓе стануваат свесни за тоа како храната влијае на нивната енергија, расположение и варење. И додека медицината бара објаснувања, практиката покажува дека животот без лактоза, барем повремено, може да донесе вистински придобивки.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Вечерва се отвора 26. Скопје филм фестивал: Филмската елита пристигнува на црвениот тепих пред МНТ

Вечерва, во Македонскиот народен театар (МНТ), официјално ќе биде отворено 26. издание на Скопје Филм Фестивал, кое годинава носи модернизиран концепт, збогатена програма и силно меѓународно присуство.

Програмата започнува во 19:30 часот со дефилето на црвениот тепих, каде што ќе пристигнат голем број филмски автори, актери, гости од странство и истакнати културно-уметнички дејци. Почетокот на официјалната церемонија е закажан за 20:00 часот. Во рамките на отворањето, за првпат ќе биде доделена фестивалската награда „Златна Скополија“ за исклучителен придонес кон светската кинематографија. Оваа година признанието им припаѓа на полските автори: режисерката Малгоржата Шумовска (Małgorzata Szumowska) и снимателот и режисер Михал Енглерт (Michał Englert). По доделувањето на наградата, фестивалот ќе биде отворен со проекцијата на нивниот најнов филм „ИДИОТ(и)“ (The Idiot(s)), во кој главните улоги ги толкуваат Џони Флин и Ејми Лу Вуд.

Годинашното издание на фестивалот привлече истакнати професионалци од европската и регионалната филмска индустрија. Во Скопје веќе престојуваат членовите на меѓународното жири и на Фестивалскиот совет: британскиот филмски критичар и селектор Филип Бергсон (Philip Bergson), британскиот продуцент Стив Абот (Steve Abbott), регионалниот продуцент Мирослав Могоровиќ (Miroslav Mogorović), српскиот режисер Павле Вучковиќ (Pavle Vučković), германската филмска селекторка Даниела Вебер (Daniela Weber), како и македонската актерка и продуцентка Лабина Митевска и режисерот Даријан Пејовски. Помеѓу специјалните гости на церемонијата, се очекува и присуството на познатиот актер, режисер и продуцент Драган Бјелогрлиќ.

Заедно со нив, на фестивалот ќе присуствуваат и авторите кои лично ќе и ги претстават своите остварувања на скопската публика: Халкавт Мустафа (Halkawt Mustafa), режисер на филмот „No Paradise If You Are Killed by a Woman“; Лоренс Фахардо (Lawrence Fajardo), режисер на филмот „Silenced Nights“; Димитрис Накос (Dimitris Nakos), режисер на филмот „Life in a Beat“; Габор Холтаи (Gábor Holtai), режисер на филмот „Feels Like Home“; Сузане Хајнрих (Susanne Heinrich), режисер и сценарист, и Марчело Бусе (Marcelo Busse), кои го претставуваат филмот „The Miserable Mother“.

Во деновите што следат, од денес до 9 ноември, Скопје Филм Фестивал ќе понуди исклучително богата и разновидна филмска програма исполнета со премиери на истакнати авторски остварувања, фестивалски фаворити, динамични филмски разговори и ексклузивни мастерклас сесии со предавачи-гости. Фестивалскиот Центар е лоциран во Младинскиот Културен Центар, додека проекциите ќе се одвиваат на две препознатливи културни локации во градот — Македонскиот народен театар (МНТ) и киното „Фросина“ во МКЦ. Билетите за сите проекции, вклучително и за свеченото отворање, се веќе достапни во продажба преку мрежата на MK Tickets

Тагови: Скопје филм фестивал

Свет

Прва реакција на Москва на резултатите од изборите во САД

Сергеј Рјабков ги коментираше резултатите од среднорочните избори во Соединетите Држави.

Насоката на надворешната политика на Русија – вклучително и нејзиниот став за решавањето на украинското прашање – не е диктирана од тековните политички околности, ниту пак зависи од политичките промени во други земји, изјави заменик-шефот на руското Министерство за надворешни работи.

Сергеј Рјабков ги коментираше резултатите од среднорочните избори во Соединетите Држави.

„Да ги почекаме конечните резултати. Ставовите на претставниците на Демократската партија кон Русија се изразито негативни. Во тоа нема ништо ново“, изјави Рјабков за „Спутник“.

Тој го даде овој коментар како одговор на прашањето дали резултатите од среднорочните избори би можеле да ги искомплицираат односите со САД, особено во однос на решавањето на украинското прашање.

„Нашиот принципиелен и доследен став за Украина, како и нашата надворешна политика во целина, не се диктирани од тековните политички околности и, природно, не зависат од политичките промени во други земји. Ќе постапуваме во согласност со насоките на претседателот на Русија“, заклучи Рјабков.

Според прелиминарните резултати и проекциите, демократите излегоа како победници на среднорочните избори во САД, одржани на 3 ноември. Во јануари, тие ќе обезбедат мнозинство и во Претставничкиот дом и во Сенатот на американскиот Конгрес, со што ќе добијат контрола врз двата дома на законодавниот орган.

Извор: Б92

Тагови: москва

Македонија

ВМРО-ДПМНЕ: Фабриката на предизвикување страв и паника на СДС, под водство на Филипче нема да успее

Фабриката на предизвикување страв и паника на СДС, под водство на Филипче нема да успее како што не успеа ни за мигрантите, ни за водата, ниту за пензиите.

РЕАКЦИЈА НА ПРЕСКОНФЕРЕНЦИЈАТА НА ВЕНКО ФИЛИПЧЕ

СДС и Венко Филипче никако да ја напуштат матрицата да ја користат која било тема и состојба во државата со кревање хистерија да предизвикаат страв и паника кај граѓаните.

Така беше со темата мигранти во Македонија, со водата во Гостивар, следно ширеа паника дека водата за пиење во Скопје е небезбедна, потоа дека ПИОМ бил загрозен, а пензионерите нема да можат пензиите да си ги земат и што ли уште не.

Сега најново се фатија и за состојбата со банкарскиот систем, како нов обид за да стигнат до медиумски простор и да спечалат некој беден политички поен, зошто со план, програма и понуда до граѓаните, очигледно не можат.

Ниту банкарскиот систем во државата е доведен во прашање, ниту незадоволство има, ниту немир или паника.

Единствено СДС и Венко Филипче сакаат вештачки да предизвикаат немир и паника кај граѓаните и нивна недоверба во банкарскиот сектор и државните институции.

Нафрлените тези на Венко Филипче во завиена прашална форма не го спасуваат од одговорноста за обидот да креира страв, паника и несигурност кај граѓаните дека им се загрозени парите.

Државата, вклучително и Народна банка ги преземаат сите мерки за заштита на интересите на државата, граѓаните, штедачите, инвеститорите.

Фабриката за креирање страв и паника на СДС, под водството со Филипче нема да успее, како што не им успеа ни со мигрантите, ни со водата, ниту пак со пензиите.

Центар за комуникации на ВМРО-ДПМНЕ