Македонија уште еднаш ќе биде повикана да ги направи уставните измени за да може да продолжи со преговарачкиот процес - штом го направи тоа, Советот на ЕУ е подготвен да свика меѓувладина конференција а потоа и да го отвори првиот преговарачки кластер - РСЕ објави увид во нацрт-заклучоците на Советот на Европската Унија за проширувањето кои се очекува да бидат усвоени на 16ти декември во Брисел.

„Советот нотира дека Македонија сè уште не ги завршила уставните измени на кои се обврзала. Советот ја потврдува својата подготвеност да свика уште една меѓувладина конференција, без понатамошни одложувања или дополнителни политички одлуки, штом С. Македонија ја спроведе оваа обврска, во согласност со своите внатрешни процедури.„се забележува во -Нацрт-заклучок за проширување од Совет на Европска Унија.

За аналитичарот Петар Арсовски, формулацијата на овој заклучок треба да ја увери Владата дека усвојувањето на уставните измени директно носи кон втората меѓувладина конференција, без дополнителни чекори, за што и соседна Бугарија е свесна.

-Тој вординг укажува на тоа дека нема да има меѓучекори помеѓу усвојувањето на уставните измени и закажувањето на втората меѓувладина конференција. Можеби бидејќи уставните измени во меѓувреме станаа жешка политичка тема можеби чуствува Советот дека е потребно да се реафирмира таа позиција и дека нема да има меѓучекор дека усвојувањето на уставните измени директно без дополнително гласање или потврдување носи до втората меѓувладина конференција. Тоа е можеби повеќе политички потстрек дома да не се користат изговори како дополнителни услови,- -Петар Арсовски, ЕУ аналитичар.

Освен уставните измени, според нацрт-заклучоците, Советот ќе и укаже на Македонија дека мора брзо да ги спроведува реформите првенствено во областа на владеење на правото и борбата со корупцијата. Ова е суштинска порака за Владата бидејќи само уставни измени нема да ни ги започнат преговорите, реформите се клучни и се всушност вториот услов, оценува Арсовски.

-Имајќи предвид дека ние немаме напредок по правосудството и владеењето на правото, ова е суптилен начин да се каже дека веднаш штом ќе има некаков напредок по тоа прашање подготвени се да го отворат кластерот “fundamentals”. Мислам дека тоа треба да се чита како порака дека не смеат реформите да застанат зашто уставните измени не се спроведуваат. За нас е најдобро ние да се сме што е можно поподготвени. За жал, во заклучоците ова не го читам така, ова го читам дека сега веќе и уставните измени се еден критериум но и недостатокот на реформи се втор критериум,- -Петар Арсовски, ЕУ аналитичар.

Во документот со нацрт-заклучоци што се предлагаат се посочува укинување на роамингот за Украина и Молдавија од 1 јануари 2026та, додека за земјите од Западен Балкан се нагласува дека треба да го добијат истото во текот на 2026 година.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.