Иако не откри многу детали, шефицата на европската дипломатија Каја Калас, прашана дали има механизми за деблокада на македонскиот пат за членство упати порака дека има простор за работа. На заедничката прес-конференицја со премиерот Мицкоски во владата, побара Македонија да продолжи по досегашниот курс, но и дека остануваат очекувањата земјава да ги направи потребните чекори во поглед на уставните измени. Според неа, за Македонија како за Украина, нема план „Б“ и го повтори ставот на претседателот на ЕС дека фокусот на Брисел е реализација на досега договореното, а доколку тоа не успее, ќе се премине кон следната фаза.
Премиерот Мицкоски пак, официјалната посета на Калас на земјава ја оцени како порака дека Унијата останува зад Македонија која како што кажа, е посветена на евроинетгративниот пат бидејќи тоа е децениска заложба на земјава. Откри и дека на самитот на НАТО во Хаг ќе се случи средба на високо ниво од македонска и бугарска страна, каде очекува да се соочат меѓусебните аргументи.
Високата претставничка на ЕУ во МНР го отвори и првиот дијалот меѓу Македонија и Унијата за одбрана, каде ја пофали досегашната целосна усогласеност на земјава со надворешната и безбедносна политика на Брисел. За шефот на дипломатијата Муцунски пак, оцени дека средбата отвора ново поглавје во односите меѓу земјава и Унијата.
Калас посетата на земјава ја заврши на средба со минситерот за одбрана Мисајловски со кого ја посетија балканската медицинска работна група, а попладнето имаше средба и со претставници на младинските и студентски организации во земјава. Нејзината посета инаку доаѓа една недела по таа на претседателот на ЕС Антонио Кошта кој побара од властите во земјава да го искористат моментумот за членство.