На денешен ден - Канал 5

Живот

На денешен ден

20 јули 2024 

На денешен ден

1304.- Во Арецо е роден Франциско Петрарка, голем лирски поет на италијанската предренесанса. Се смета за основач на модерната европска поезија. Светска славa стекна со делото „Канцониер“ - зборник од 366 сонети, канцони и мадригали. За епот „Африка“ добил „Ловоров венец“. Умрел во Арква, во близина на Падова, на 18 јули 1374 година.

1785.- Роден е турскиот султан Махмуд Втори, кој во текот на владеењето од 1808 година до смртта во 1839 година спровел реформи во обидот да го централизира феудално-апсолутистичкиот поредок на Отоманската империја.

1819.- Република Колумбија добила независност. Била шпанска колонија од 1509 година. - Национален празник на Колумбија.

1847.- Роден е германскиот сликар и графичар Макс Либерман, најзначаен претставник на германскиот импресионизам.

1890.- Родена е американската филмска актерка Теодосија Гудман, позната како Теда Бара, прв „вамп“ во историјата на кинематографијата. Филмови: „Клеопатра“, „Кармен“, „Салома“, „Жена - тигар“, „Дамата со камелии“.

1913.- Во текот на Балканските војни (1912-1913), во близина на селото Бел Камен, Леринско, во борба против грчката војска загинал Васил Чакаларов, македонски војвода и деец на ВМРО. Учесник бил на Смилевскиот конгрес (1903) и во Илинденското востание (1903). Роден бил во селото Смрдеш, Костурско, во 1874 година.

1929.- Во Ремс, Франција, е роден Жан Бодријар, еден од највлијателните француски мислители на 20. век, филозоф, социолог, познат по својата критика на потрошувачкото општество. Познат е по делата „Симулакруми и симулации“, „Симболична размена и смрт“, „За заведувањето“, „Фатални стратегии“ и други дела. Умрел во март 2007 година.

1937.- Умрел италијанскиот електроинжинер и пронаоѓач Гуљермо Маркони, еден од пионерите на безжичната телеграфија, кој во 1909 година ја поделил Нобеловата награда за физика со германскиот физичар Карл Фердинанд Браун.

1938.- Родена е американската филмска актерка Наташа Гардин, позната како Натали Вуд, една од ретките која станала филмска ѕвезда како дете со филмот „Чудо на 34-та улица“ и успеала да оствари успешна филмска кариера. Таа играла во филмовите „Бунтовник без причина“, „Сјај во тревата“, „Трагачи“ и „Приказна за западната страна“.

1944.- Во „Волчја јама“ во Источна Прусија германскиот полковник фон Штауфенберг се обидел да изврши атентат врз Адолф Хитлер, но водачот на Третиот рајх во експлозијата бил само полесно ранет. Неуспешниот атентат главно го платиле мноштво луѓе, вклучувајќи и повеќе германски високи офицери, како фелдмаршалот Ервин Ромел кој бил принуден да изврши самоубиство.

1945.- Умрел Пол Валери, француски писател, еден од најголемите лиричари на Франција. Ја продолжил поезијата на симболистите, давајќи и нови тонови и построга форма. Најпознати дела му се поемите „Морнарски гробишта“ и „Младата Парка“, како и есеите „Вовед во методот на Леонардо да Винчи“ и „Танецот“. Роден бил на 30 октомври 1871 година.

1969.- Лунарното возило „Орел“ на американскиот вселенски брод „Аполо 11“, со астронаутите Нил Армстронг и Едвин Олдрин, се упатило на површината на Месечината, додека Мајкл Колинс го продолжил кружењето околу Месечевата орбита со матичниот брод „Аполо 11“.

1974.- Турската армија почнала инвазија на Кипар, под изговор за заштита на турската национална заедица на островот. По инвазијата на третина од овој остров била формирана самопрокламираната „Турска Република Северен Кипар“.

1976.- Американскиот вселенски брод без човечки екипаж „Викинг 1“ се спуштил после 11 месеци летање на Марс и почнал да испраќа на Земјата јасни снимки од оваа планета.

1982.- Во експлозијата која ја предизвикала Ирската републиканска армија во „Хајд паркот“ и „Риџентс парк“ во центарот на Лондон загинале 10 британски војници.

1988.- Јужна Африка, Ангола и Куба прифатиле Договор за повлекување на странските трупи од Ангола и признавање на независноста на Југозападна Африка.

1994.- Шефот на израелската дипломатија Шимон Перес пристигнал во посета на Јордан како највисок израелски функционер кој дотогаш ја посетил оваа соседна арапска земја.

1996.- Во Бурунди бунтовниците од племето Хуту го нападнале бегалскиот камп на ривалското племе Тутси, усмртувајќи околу 320 луѓе.

1997.- Умрела Лилјана Чаловска, македонска писателка. Автор е на книгите „Бдение за Виетнам“, „Антидневник“, „Пребир“ и други. Родена била во Софија, во 1920 година.

2006.- Умрел Жерар Ури, еден од најпопуларните француски режисери. Бил познат по урнебесните комедии, снимени во 60-ите и 70-ите години од 20. век, во кои играа легендарните француски комичари Бурвил и Луј де Фин. Неговата комедија „Големата аванатура“ ја виделе 17 милиони гледачи во Франција и повеќе од 30 години била најпопуларен филм во земјата, се до 1998 година кога приматот му го одзел филмот „Титаник“ на режисерот Џејмс Камерон. Снимил 17 филмови. Роден бил во Париз во 1919 година. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Економија

Рекордна цена на гасот во Европа, прв пат од 2022.

Цената на гасот во Европа во понеделникот надмина 100 евра за мегават-час за прв пат од 2022 година, зголемена поради конфликтот на Блискиот Исток и ниските залихи пред зимата.

Рекордна цена на гасот во Европа, прв пат од 2022.

Според податоците од берзата TTF, цената на фјучерсите за гас во еден момент достигна 100,785 евра за мегават-час, или околу 1.058 евра за 1.000 кубни метри, што е највисоко од енергетската криза поврзана со војната во Украина.

Стапката на зафатеност на европските капацитети за складирање гас на крајот на октомври беше 74,6 проценти, што е далеку под вообичаеното ниво за овој период, а компанијата „Катар енерџи“ го продолжи прекинот на испораките до некои клиенти до крајот на декември, објави „Ројтерс“.

Европските влади засега избегнуваат враќање кон скапи мерки како што се ограничувања на цените и намалување на даноците, бидејќи буџетите се оптоварени, а трошоците за позајмување се високи.

Трговците стравуваат дека европските земји ќе се најдат во конкуренција со азиските земји за ограничени залихи на течен природен гас (LNG) како што се приближува зимата, објави „Блумберг“.

Побарувачката од Азија би можела дополнително да ја засили конкуренцијата и да ги зголеми цените на бензинот, предупредуваат пазарните експерти.

Тагови: Европа гасот

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Паника на лет од Приштина: Маж го скршил прозорецот во авионот, жена се онесвестила- доктор ги решавал проблемите

Необичен инцидент се случил во понеделник вечерта на летот на EasyJet од Приштина до Базел, кога меѓу патниците се случиле две последователни ситуации што предизвикале паника и страв во авионот.

Паника на лет од Приштина: Маж го скршил прозорецот во авионот, жена се онесвестила- доктор ги решавал проблемите

Според информациите што ги добил порталот KosovaNews од неколку патници, сè започнало околу половина час по полетувањето од меѓународниот аеродром во Приштина. Летот за Базел бил закажан за 20:05 часот, пишува Telegrafi.com.

Прво, крвниот притисок на жена, за која се верува дека има околу 40 години, одеднаш ѝ паднал, а таа била во исклучително вознемирена состојба и на работ на несвестица.

Екипажот на авионот веднаш побарал помош од патниците, прашувајќи дали меѓу нив има лекар.

За среќа, во авионот бил и неврохирургот д-р Валон Баралиу, кој работи во болница во Германија. По неговата интервенција и пружање прва помош, состојбата на патникот се стабилизирала.

Порталот KosovaNews го контактирал Баралиу, кој потврдил дека инцидентот се случил и дека му помогнал на патникот.

„Да, бев, заедно со стотици други патници, на летот на „ИзиЏет“ од Приштина до Базел, кој полета во 20:05 часот. Околу половина час по полетувањето, патничка во 40-тите години доживеа сериозна акутна аритмија, придружена со хипервентилација, вртоглавица, силна анксиозност и напад на паника“, рече тој, додавајќи:

„Екипажот и пилотите побараа помош преку системот за јавно обраќање, прашувајќи дали има лекар во авионот. Без двоумење, станав и му пружив на пациентот стручна помош, во согласност со моите должности и професија. Во авионот имаше и млада медицинска сестра, која ни се придружи, заедно со екипажот, кои беа подготвени да ни помогнат и да не поддржат во секое време. По мојата интервенција, состојбата на пациентката се стабилизираше, па му предложив на екипажот да можеме да го продолжиме нашето патување без потреба од итно слетување.“ Сепак, ситуацијата во авионот не заврши тука.

Околу половина час по првиот инцидент, втор патник, на возраст од околу 42 години, швајцарски државјанин по потекло од Косово , наводно одеднаш почнал да се однесува агресивно и насилно, без очигледна причина.

Според сведоштвата на патниците, тој насилно го скршил внатрешното стакло на прозорецот до неговото седиште, што предизвикало страв и вознемиреност кај другите патници.

Овој настан го потврдил и неврохирургот Валон Баралиу, на кого екипажот повторно се обратил за помош при проценка на состојбата на патникот.

„Кратко по инцидентот со патникот за кој ви раскажав, слушнав бучава во задниот дел од авионот, кога еден патник, без очигледна причина, го скрши внатрешното стакло на прозорецот. Патниците во тој дел од авионот се исплашија. Маж, на околу 42 години, го скрши внатрешното стакло на прозорецот на авионот. Екипажот повторно ме замоли да ја проценам неговата психофизичка состојба. Кога му се приближив, иако изгледаше физички стабилен, не проговори ниту збор, ниту одговори на моите прашања“, рече Баралиу, продолжувајќи:

„Не можам да потврдам дали во тој момент бил под дејство на некакви лекови или бил во состојба на ментално растројство или преоптоварување, без претходно да бидат извршени соодветни анализи. Потоа патникот бил следен од неколку други патници сè додека авионот не слетал на аеродромот во Базел, по што бил преземен од жандармеријата на аеродромот. Морам да нагласам дека екипажот на easyJet покажал исклучителен професионализам, човечност и подготвеност да помогне за време на двата инциденти. И покрај ситуацијата, членовите на екипажот „успеале да ја држат под контрола, дејствувајќи мирно и посветено“.

Сведоци ја опишаа атмосферата во авионот како исклучително напната. Многу патници, вклучувајќи ги и семејствата со деца, доживеаа моменти на паника поради два последователни инциденти за време на летот.

Брзата реакција на неврохирургот д-р Валон Баралиу, кој му помогна на патникот на кој му се слоши, беше пофалена од екипажот, капетанот на авионот и другите патници.

Тагови: Авионот паника

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Клое Кардашијан во проѕирен фустан на роденденската забава на сестра ѝ Ким (ФОТО)

Клое Кардашијан се појави во издание кое привлече посебно внимание во прославата на 46-тиот роденден на нејзината сестра Ким Кардашијан. 

Клое Кардашијан во проѕирен фустан на роденденската забава на сестра ѝ Ким (ФОТО)

За луксузната семејна вечера во Беверли Хилс, таа избра полупроѕирен фустан во боја на кожа кој ја истакнуваше нејзината фигура.

Под тесната креација носеше боди, а комбинацијата ја комплетираше со долги чевли во иста нијанса и елегантна бела чанта. Клое самоуверено позираше за фотографите пред да влезе во ресторанот Балди, сместен во хотелот Валдорф Асторија, каде што се одржа прославата.

Семеен собир

Сестрите Кортни Кардашијан (47) и Кајли Џенер (29) и мајката Крис Џенер (70) беа на вечерата со славеникот Ким. Им се придружи и братот Роб Кардашијан (39), кој ретко се појавува во јавноста во последните години. Единствениот член од најблискиот семеен круг кој не дојде на прославата беше Кендал Џенер.

Честитки на социјалните мрежи

Ким објави фотографија на Инстаграм како дува свеќи на голема црвена торта, а Кортни откри повеќе детали од раскошната прослава, вклучувајќи мени на кое пишуваше „Среќен роденден Ким“.

Социјалните мрежи беа исполнети и со емотивни честитки. Клое посвети серија заеднички фотографии од патувања и разни настани на својата постара сестра. „Те сакам тебе и нашите авантури! Луди сме, но барем сме луди заедно“, напиша таа покрај една објава. На друга, додаде: „Засекогаш моја девојка! Засекогаш сум благодарна“.

Особено емотивна порака ѝ испрати нивната мајка Крис Џенер, која нагласи колку е горда на своите достигнувања и посветеност на своето семејство. „Ти си неверојатна мајка, и гледањето колку ги сакаш своите деца ми го прави срцето толку среќно“, ѝ рече таа.

Нејзината ќерка Норт Вест објави забавна фотографија од Ким како спие на фотелја. ѝ честитаа и многу познати личности, вклучувајќи ги Лорен Санчез Безос и Викторија Бекам.

Тагови: Ким Кардашијан

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер