Живот

На денешен ден

Во Ферари умрел Лодовико Ариосто, прославен италијански епски поет, чиј витешки еп „Бесниот Роналдо“ станал блескав поетски израз на духот на уметничките и на модерните тенденции на италијанската ренесанса.

7 јули 2024

1533.- Во Ферари умрел Лодовико Ариосто, прославен италијански епски поет, чиј витешки еп „Бесниот Роналдо“ станал блескав поетски израз на духот на уметничките и на модерните тенденции на италијанската ренесанса. Пишувал и лирски песни, комедии и сатири. Роден бил на 8 септември 1474 година.

1854.- Умре германскиот физичар Георг Симон Ом, кој го открил односот на струјата на електромоторните сили и отпорот во електирчното коло, наречен по него Омов закон. Единицата за мрење на електричниот отпор во меѓународниот систем на мерки во негова чест е наречена Оm.

1860.- Во Калиш, во Чешка, е роден Густав Малер, австриски композитор. Бил директор на Државната опера во Виена. Дела: десет симфонии, циклуси соло песни за глас и оркестар „Песна за земјата“, „Песна за момчето-патник“, „Песна за мртвите деца“. Умрел во Виена, на 18 мај 1911 година.

1887.- Во Витебск, во Русија, е роден Марк Шагал, еден од најоргиналните европски сликари. Создал фантастични композиции од животот на Евреите и на руските селани. Се занимавал со графика и сценографија. Умрел во Ница, во Франција, на 28 март 1985 година.

1893.- Во Загреб е роден Мирослав Крлежа, хрватски писател, еден од најзначајните личности на културно-книжевните случувања во периодот по Првата светска војна. Неговиот книжевен опус опфаќа поезија, критики, полемики, драми, есеи, студии, романи и друго. Најзначајни негови дела се „Хрватскиот бог Марс“, „На работ од умот“, „Господа Глембаеви“, „Во агонија“ и други. Умрел во Загреб, на 29 декември 1981 година.

1898.- САД ги анектирале Хавајските Острови. Во прво време Хаваи имале статус на колонија, а во 1959 година станале педесетта сојузна држава во САД.

1899.- Во Њујорк е роден Џорџ Кјукор, познат американски режисер. Автор бил на многубројни филмови кои влегле во антологијата на светската кинематографија, меѓу кои најпознати се „Вчера во осум“, „Плинска светлина“, „Ѕвездата е родена“ и други. Умрел во Лос Анџелес, на 24 јануари 1983 година.

1911.- Роден е италијанскиот композитор Џан Карло Меноти, Дела: оперите „Конзул“, „Медиум“, „Амелија на бал“, радио-операта „Девојка и арамија“, „Телефон“, балетот „Себастијан“.

1921.- Во селото Брусник, Битолско, е роден Васко Карангелески, народен херој на Македонија. Загинал во несреќен случај, на 3 февруари 1977 година.

1930.- Умре англискиот писател Артур Конан Дојл, лекар по професија, кој се прославил со криминалистичките романи и раскази во кои главните јунаци се измислениот детектив Шерлок Холмс и неговиот пријател д-р Вотсон. Дела: романите „Гримизна студија“, „Спомените на Шерлок Холмс“, „Баскервилски пес“, „Белиот одред“, „Изгубен свет“, „Големата бурска војна“, историската студија „Историја на британскиот поход во Франција и Фландрија“.

1937.- Јапонската армија го нападнала кинескиот гарнизон кај Лучиоа, во близина на Пекинг. Кинеските сили се спротивставиле, па Јапонија тоа го искористила како повод за агресија врз Кина. Кинеско-јапонската војна траела се до капитулацијата на Јапонија во септември 1945 година.

1978.- Соломонските острови во југозападниот дел на Тихиот Океан се стекнале со независност и влегле во Британскиот комонвелт по 85 години британска колонијална управа.

1992.- Со 91 глас „против“, 7 „воздржани“ и 2 гласа „за“, пратениците на Собранието на Република Македонија не и изгласале доверба на Владата на Република Македонија. Првпат во историјата на Македонија „паднала“ влада.

1995.- Поранешниот шеф на италијанската дипломатија Џани де Микелис бил осуден на четири години затвор поради корупција.

2005.- Во серија експлозии кои го потресле лондонското метро и разнесле еден градски автобус загинале 52, а биле повредени околу 700 луѓе. Терористичката мрежа Ал-Каида-Џихад во Европа ја презела одговорноста за овие бомбашки напади во самиот центар на бритнаската престолнина.

2007.- Прогласени биле „новите“ седум светски чуда во текот на свеченоста која се одржала на стадионот „Бенфика“ во Лисабон: Големиот ѕид во Кина, Петра во Јордан, Статуата на Христос Спасителот во Бразил, Мачу Пикчу во Перу, пирамидата Чичен-ица во Мексико, Колосеумот во Рим и Таџ Махал во Индија. До овој избор дошло по гласовите на околу 100 милиони луѓе ширум светот на Интернет и по мобилни телефони. Критичарите на овој избор меѓу кои и УНЕСКО сметале дека светските чуда не треба да се избираат со јавно гласање. Египетските пирамиди во Гиза се единствените кои останале на првата листа на седумте светски чуда на стариот век.

2014.- Во Тбилиси по долго боледување починал поранешниот претседател на Грузија Едуард Шеварнадѕе. Шеварнадѕе бил претседател на Грузија од 1995 до 2003 година. Тој бил роден на 25 јануари 1928 година.

2014.- Во Мадрид на 88-годишна возраст починал легендарниот фудбалер Алфредо Ди Стефано. Најдобриот фудбалер во историјата на Реал Мадрид и почесен претседател на „кралскиот тим’’ родум од Аргентина. Својата богата фудбалска кариера ја започнал во родната земја, во редовите на Ривер Плата. Потоа бил фудбалер на Милионариос, од каде преминал во Шпанија и 11 години бил лидер на Реал Мадрид, а кариерата ја завршил во Еспањол. Ди Стефано бил прогласен за најдобар играч во историјата на Реал за кого одиграл 392 официјални натпревари и притоа постигнал 305 голови, што долг период преставувал и рекорд на клубот. Ди Стефано двапати го освоил престижното признание „Златна топка“, а во Лигата на шампионите или поранешниот Куп на шампиони дури пет пати се радувал на трофејот наменет за најдобриот тим во Европа. Алфредо Ди Стефано светот го познавал и како единствениот фудбалер кој настапувал за три репрезентации: Аргентина, Колумбија и Шпанија. Во кариерата одиграл вкупно 510 официјални натпревари и постигна 418 погодоци.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Мицкоски: Македонија и САД, сојузништво засновано на доверба, поддршка и пријателство

Премиерот Христијан Мицкоски на ФБ објави фотографија со американскиот претседател Доналд Трамп при неодамнешното учество на Генералното собрание на Обединетите нации во Њујорк.

„Македонија и САД, сојузништво засновано на доверба, поддршка и пријателство.“, објави Мицкоски во описот на фотографијата.

Здравје

Деветмина пациенти добиле персонализирана вакцина против рак, кај сите болеста се повлекла и не се вратила

Во мало клиничко испитување на персонализирана вакцина против рак на бубрег, болеста не се вратила кај ниту еден од деветте пациенти кои ја примиле.

Учесниците биле следени во просек три години и четири месеци по операцијата, а резултатите се сметаат за охрабрувачки, иако поради малиот број испитаници не може со сигурност да се каже дека вакцината спречила болеста да се врати.

Персонализирана вакцина против рак

Научниците развија експериментална вакцина која го учи имунолошкиот систем да ги препознава клетките на ракот. Процедурата вклучува анализа на туморот на секој пациент, избирање уникатни делови од протеинот, таканаречените неоантигени и нивно користење за да се направи вакцина. Целта е да се стимулира одбранбениот систем на телото да нападне рак кој е специфичен за таа индивидуа.

Охрабрувачки резултати од мало истражување

Во истражувањето учествувале девет лица со проѕирно клеточен карцином на бубрегот, најчеста форма на оваа болест кај возрасните. Седум пациенти биле во трета и двајца во четврта фаза на болеста.

На сите им беа целосно отстранети туморите и во моментот на вакцинацијата немаа видливи знаци на болеста, но беа изложени на висок ризик за нејзино враќање. Научниците се надеваа дека ќе ја искористат вакцината за да го обучат имунолошкиот систем да ги уништи преостанатите клетки на ракот кои се премногу мали за да бидат откриени со стандардни тестови. Сите девет пациенти развиле имунолошки одговор, а кај седум од нив Т-клетките активирани со вакцината успеале да го препознаат сопствениот тумор на пациентот.

Потребна е претпазливост при толкувањето

Истражувачите предупредуваат дека резултатите мора да се толкуваат со претпазливост. „Со оглед на ограничениот број на пациенти, мора да бидеме претпазливи во понатамошните толкувања“, велат Дејвид Браун од Универзитетот Јеил и Тони Чуеири од Институтот за рак Дана-Фарбер, кој ја водел студијата.

Бидејќи студијата немала контролна група, не е можно да се одреди колку пациенти би имале релапс доколку не ја примеле вакцината. Исто така, оваа студија не може да потврди дали додавањето на лекот за имунотерапија ipilimumab, кој го примиле пет пациенти, дополнително го подобрил исходот.

Предизвици во развојот на вакцините

Развивањето вакцина за рак на бубрезите е посебен предизвик бидејќи овие тумори обично имаат помалку мутации од, на пример, меланомот, што значи помал број на потенцијални цели на вакцината. И покрај тоа, научниот тим успеа да произведе вакцина за секој учесник. „Нашата цел беше да изградиме траен имунитет на антигени специфични за туморот, што на крајот ќе доведе до имунолошки одговор против самиот тумор“, велат Браун и Чуеири.

Следењето покажа дека имунолошкиот одговор трае со години. Клучен чекор беше да се потврди дека Т-клетките активирани со вакцина може да ги препознаат вистинските туморски клетки, а не само делови од нив во лабораторија. Во седум од девет случаи успеале да го потврдат токму тоа. „Истражувавме дали Т-клетките активирани од вакцината се способни да го препознаат сопствениот тумор на пациентот“, велат истражувачите, објаснувајќи дека ова е голем технички предизвик бидејќи тие морале да ги зачуваат виталните туморски клетки за секој пациент.

Безбедност и идни истражувања

Студијата од првата фаза се фокусираше првенствено на безбедноста и подносливоста. Најчестите несакани ефекти беа благи, како што се реакции на местото на инјектирање и привремени симптоми слични на грип. Ниту еден од учесниците немал сериозни несакани ефекти. Иако наодите покажуваат дека е можно да се развијат вакцини кои создаваат траен имунолошки одговор за овој тип на рак, останува нејасно дали тие навистина ги подобруваат резултатите од лекувањето.

„Треба да тестираме персонализирани вакцини кај многу поголем број пациенти и да се увериме дека тие навистина ги подобруваат резултатите во споредба со сегашниот стандарден третман“, заклучија Браун и Чуеири. Во тек е поголема студија, INTerpath-004, која тестира друга персонализирана вакцина базирана на технологијата на mRNA во комбинација со имунотерапија. Студијата е објавена во списанието Nature.

Тагови: вакцина рак

Македонија

Обвинителството побара притвор за газда Деко, сега го гонат за давање поткуп во Министерството за економија

Основното јавно обвинителство за гонење на организиран криминал и корупција донесе Наредба за спроведување истражна постапка против едно лице за кривично дело - Давање поткуп од член 358 став 1 од Кривичниот законик.

Осомничениот дал поткуп на службено лице во Министерството за економија за да изврши службено дејствие што не смеел да го изврши, односно да му обезбеди лиценца за вршење угостителска дејност, без воопшто да поднесе барање за лиценца и во услови кога знаел дека неговиот објект не исполнувал законски услови.

Поради опасност од бегство на осомничениот за ова кривично дело за кое е предвидена казна затвор од 1 до 10 години, како и фактот дека против него се води уште една кривична постапка за Тешки дела против општата сигурност, јавниот обвинител до Основниот кривичен суд Скопје достави предлог за определување мерка притвор.

Имено, осомничениот до сега беше обезбеден како обвинет во друга постапка. Но, со оглед на тоа што во однос на тоа дело истекуваат законските рокови за обезбедување, а јавниот обвинител од ОЈОГОКК продолжува да прибира докази во однос на дејствијата на поткуп, тој процени дека ризиците за обезбедување на осомничениот се големи и побара да му биде определена притворска мерка.

Јавното обвинителство оценува дека притворот е апсолутно неопходна мерка за обезбедување на присуството на овој осомничен, ценејќи ги сите околности и основи.

Службеното лице кое го примило поткупот веќе е обвинето и против него се води судска постапка за дејствија на примање поткуп, соопштуваат од Обвинителството.

Инаку денеска беше последниот ден кога Обвинителството требаше да се произнесе по укинувањето на притворот на Дејан Јованов- Деко, сопственик на дискотеката Пулс и првоосомничен во случајот. Претходно неговата одбрана понуди 200.000 евра како гаранција, за газда Деко на 3 октомври да се брани од слобода.