На денешен ден - Канал 5

Живот

На денешен ден

25 февруари

На денешен ден

1707.- Роден е италијанскиот писател Карло Голдони, обновител на италијанската комедија. Дела: комедиите „Мирандолина“, „Рибарски караници“, „Коцкар“, драмата „Далматинка“.

1723.- Умрел англискиот архитект Кристофер Рен, основач на Кралското друштво во Лондон (академија на науките) и негов прв претседател од 1680 до 1682 година. По пожарот кој го опустошил Лондон во 1666 година, вклучувајќи и 53 цркви, проектирал низа зданија, меѓу кои и монументалната катедрала „Свети Павле“.

1778.- Роден е аргентинскиот генерал и национален херој Хосе де Сан Мартин, ослободотел на Аргентина, Чиле и Перу од шпанските колонијални власти. Заедно со Симон Боливар го предводел јужноамериканското движење за независност. Го укинал ропството, ја прокламирал слободата на печатот, основал библиотеки и настојувал културно да ја прероди својата земја.

1841.- Во Лимож е роден Огист Реноар, француски сликар, еден од најистакнатите претставници на импресионизмот. Во последниот период од своето творештво се занимавал и со скулпторство. Најпознати негови слики се „Капачки“, „Мулен“ и „Лулашка“. Со своите слики првпат се појавил на изложбата на импресионистите во Париз, во 1874 година. Умре во Кан, на 17 декември 1919 година.

1842.- Роден е Карл Мај, германски писател. Бил најтиражниот германски автор. Дела: „Винету“, „Богатство во сребреното езеро“, „Синот на ловецот на мечки“, „Од Багдад до Стамбол“.

1866.- Во Пескасерол е роден Бенедикт Кроче, италијански филозоф, историчар, литературен критичар и државник. Се обидел да го ревидира макрсизмот и отворено истапувал против него, а бил и противник на фашизмот. Најпознати негови дела се „Филозофијата како наука“, „Филозофијата на практиката, економијата и етиката“ и „Историјата како приказна за слободата“. Умрел во Неапол, на 20 ноември 1952 година.

1873.- Роден е Енрико Карузо, прочуен италијански оперски пејач. Со незаборавните интерпретации на оперите на Верди, Маскањи, Леонкавало и Пучини на сцените низ целиот свет, станал најславен тенор на своето време. Умрел во 1921 година.

1899.- Умрел основачот на британската новинска агенција Ројтер - Паул Јулиус фон Ројтер, по потекло германски Евреин и со вистинско име - Израел Бир Јосафат. Исвесно време работел во новинската агенција Авас во Париз, а потоа ја основал новинската агенција Ројтер кој и денес го носи неговото име. Ројтер по француската Авас (денес Франс прес) е втора најстара новинска агенција во светот.

1923.- Во Струмица е роден Александар Думов, доајен на Народниот театар во Струмица и еден од основоположниците на театарската култура во Македонија. Освен во театарот во Струмица, како артист и режисер, работел и во театрите во Велес, Битола и Штип. Умрел во Скопје, на 25 ноември 1989 година.

1925.- Во Свиленград, Бугарија, од ванчомихајловистите бил убиен Георги Скрижовски (Георги Радев Иванов), македонски револуционер, учител и војвода и член на ВМРО. За време на Младотурската револуција бил еден од раководителите на НФП. Учесник бил во Балканските војни и во Првата светска војна. Роден бил во селото Скрижово, Драмско, во 1880 година.

1944.- Во Скопје, при пробивањето на блокадата на бугарската полиција бил убиен Кузман Јосифовски - Питу, народен херој на Македонија. Роден бил во Прилеп, на 23 јуни 1915 година.

1949.- Со закон на Народното собрание на НР Македонија бил основан Универзитетот во Скопје. Со одржувањето на првото Универзитетско собрание на 24 април 1949 година, било означено раѓањето на Универзитетот како највисока научна и образовна институција во Македонија. Во 1969 година, при одбележувањето на 20-годишнината од работата го добил името Универзитет „Кирил и Методиј“, а на 12 ноември 1992 година, со одлука на Универзитетскиот совет, станал „Свети Кирил и Методиј“.

1972.- Советскиот вселенски брод „Луна 20“ се вартила на Земјата со примероци од тлото на Месечината.

1983.- Во Њујорк умрел Тенеси Вилијамс, американски драмски писател, добитник на две Пулицерови награди и автор на многу познати драмски дела како што се „Мачка на вжештениот ламаринен покрив“, „Нежна птица на младоста“, „Трамвајот наречен желба“ и други. Роден бил во Колумбос, во државата Мисисипи, на 26 март 1911 година.

1991.- Во Будимпешта, Унгарија, министрите за надворешни работи и за одбрана на шест земји-членки на Варшавскиот договор (Советскиот Сојуз, Полска, Чехословачка, Романија, Бугарија и Унгарија) потпишале Протокол за укинување на таа воена организација. Варшавскиот договор бил основан на 14 мај 1955 година.

1994.- Во Брисел официјално започнала да работи Амбасадата на Република Македонија.

1999.- Народна Република Кина ставила вето за продолжување на мандатот на УНПРЕДЕП уште шест месеци во Република Македонија. Од 1 март 1999 година УНПРЕДЕП ги прекинал активностите во Република Македонија.

2003.- Умрел италијанскиот филмски актер и режисер Алберто Сорди. Играл во повеќе од 200 филмови од кои 20 ги режирал. Филмови: „Под Римското сонце“ „Белиот шеик“, „Денгуби“, „Херој на нашето време“, „Мојот син Нерон“, „Големата војна“, „Меид ин Итали“, „Мал, сосема мал граѓанин, „Извинете, дали сте за или против?“, „Италијанец во Америка“.

2005.- Умрел британскиот правник Питер Бененсон, основач на меѓународната организација за заштита на човековите права - Амнести интернешнл.

2007.- Иран успешно ја лансирал првата ракета со сателитски носач, дело на домашни научници. Во соработка со Русија, Иран, две години порано, во вселената го лансирал и сателитот „Сина 1“.

2020.- На 91-годишна возраст почина поранешниот долгогодишен египетски претседател Хосни Мубарак. Мубарак беше политичар и поранешен претседател на Република Египет во периодот од 1981 до 2011 година. Тој беше соборен од власта во протестите на арапската пролет, а подоцна и осуден на затворска казна. Но, по воениот преврат и доаѓањето на власт на актуелниот претседател Абдел Фатех Ал Сиси, инаку поранешен генерал и командант на египетската армија, Мубарак беше ослободен од затвор.

2022.- На 89-годишна возраст почина универзитетскиот професор Љупчо Филиповски. Филиповски е роден на 22.9.1933 година во Белград. Дипломирал на Архитектонскиот отсек на Техничкиот факултет во Скопје во 1958 година. Во 1961 година бил примен за асистент по предметот Архитектонски конструкции на Архитектонскиот отсек во Скопје. Завршил постдипломски студии во Ротердам, Холандија во 1966 година. Својата професионална кариера ја завршил во 1998 година како редовен професор. Меѓу позабележителните негови индивидуални и тимски проекти се: Детската градинка на ул. „Димитрие Туцовиќ ” во Скопје (1972), станбените 17-катни кули во Нерези (1975), станбени блокови во населбата „Јане Сандански” (1985), административен деловно-продажен центар во Скопје. Го изработил главниот и изведбен проект за Електромашинскиот факултет со лабораториите во Скопје. Проектирал објекти и надвор од нашата земја, а учествувал во реконструкција и изведба и на црковни објекти. Во сферата на публицистиката се јавува како автор на 36 публикувани единици и бројни научни и стручни книги и статии. Позначајни се книгиите: „Основи на градежништвото“ (1988) „Сонце, енергија и архитектура“ (1995), „Современи технологии на градење” и „Префабрикација и монтажа кај станбени објекти“ (1997) „Хидроизолации кај рамните кровови-тераси” (1998) и последниот труд-учебник „Хидроизолации кај рамни кровови и подруми” (2007). /MИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Трамп размислува да ги објави документите за Саудиска Арабија и нападот на 11 септември

Американскиот претседател Доналд Трамп вчера изјави дека ќе го разгледа барањето на семејствата на жртвите од нападите на 11 септември .

Трамп размислува да ги објави документите за Саудиска Арабија и нападот на 11 септември

Американскиот претседател Доналд Трамп вчера изјави дека ќе го разгледа барањето на семејствата на жртвите од нападите на 11 септември за објавување на документи за наводната улога на Саудиска Арабија во терористичките напади што се случија пред 25 години, пишува „Гардијан“.

Семејствата долго време тврдат дека влијателна група религиозни екстремисти во Саудиска Арабија имала силно влијание во владата и им помагала на киднаперите. Петнаесет од деветнаесетте напаѓачи биле саудиски државјани, но официјален Ријад упорно негира каква било вмешаност во нападите.

Трамп: „Ќе го разгледам тоа“

Семејствата бараат од Трамп да ги декласифицира и објави релевантните документи. Кога беше прашан за ова за време на неговата посета на Ирска, претседателот одговори дека ќе го проучи барањето. „Ќе го разгледам кога ќе се вратам“, рече Трамп кратко пред да се качи на „Ер Форс Уан“ за да се врати во Вашингтон. „Знам дека ме прашаа тоа во петокот“.

Порака од комеморацијата

Членовите на семејствата на жртвите водат долгогодишен судски случај против Саудиска Арабија. Една од нив, Тери Страда, на комеморацијата во Њујорк во петокот, го повика Трамп да „им каже на Саудијците да престанат да лажат“. Страда, чиј сопруг Том беше убиен во нападот, верува дека досега американските претседатели одлучиле „да ги заштитат Саудијците наместо да стојат покрај семејствата на жртвите од 11 септември“.

Таа беше меѓу членовите на семејството кои ги прочитаа имињата на загинатите на 25-годишнината од нападот. Таа рече дека сегашната администрација треба „да застане во одбрана на семејствата и преживеаните“. „Тоа беше предавство по предавство“, рече таа. „Претседателот Трамп сè уште може да го промени тоа“.

Тагови: 11 септември Саудиска Арабија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Здравје

Кина оставила вештачка интелигенција да води очна клиника, еве како функционираше

Вештачката интелигенција сè повеќе се користи во медицината за анализа на слики и развој на лекови, но научниците во Кина спроведоа експеримент во кој отидоа уште подалеку.

Кина оставила вештачка интелигенција да води очна клиника, еве како функционираше

Тим од Пекиншкиот институт за визуелни науки и транслационо истражување на очите (BERI) го предаде управувањето со офталмолошката клиника на систем за вештачка интелигенција, со човечки надзор. Целта беше да се тестира како вештачката интелигенција се справува во реална клиничка средина, пишува ScienceAlert.

Како работеше клиниката за вештачка интелигенција

Клиниката, наречена AI-TEC (AI-Agent Augmented Tsinghua Eye Clinic), беше дизајнирана така што вештачката интелигенција ќе биде основа на целиот процес, а не само додаток на постојната пракса.

Лекарите сè уште беа присутни и ја надгледуваа работата, но вештачката интелигенција ги управуваше сите фази, од подготовка на пациентите за преглед, преку самата дијагноза, до следењето по прегледот.

Лажните позитивни резултати беа значително намалени кога сликите прегледани од експерти беа додадени во податоците за обука. (Yan et al., Nat. Med., 2026.)

„Нашата работа нуди први лекции за тоа како да се примени вештачката интелигенција надвор од обичната алгоритамска ефикасност и да се насочи кон трансформација на клиничката работа и интеграција на целиот систем, што на крајот создава вистинска клиничка вредност“, наведуваат истражувачите во својот труд.

Учење од грешките и прилагодување на системот

Првите резултати покажаа дека системот првично имал релативно ниска стапка на успех во препознавањето на болести како што се глауком и макуларна дегенерација.

Сепак, точноста значително се подобри откако искусни офталмолози внесоа 1.426 висококвалитетни слики со точни дијагнози во базата на податоци. Тој збир на податоци се покажа како покорисен од почетниот, кој содржеше речиси 27.000 снимки со понизок квалитет.

Со новите податоци, точноста на системот со вештачка интелигенција надмина 0,93 на стандардизираната дијагностичка скала на AUROC, што е на исто ниво со другите напредни системи за анализа на медицински слики.

Вештачката интелигенција беше делумно одговорна за препознавање на болести на слики од мрежницата. (Mikael Häggström/CC0 преку Wikimedia Commons/Јавен домен)

Научниците, исто така, забележаа интересен тренд во употребата на алатки. По почетната интензивна употреба, нејзината примена опадна. Анализата покажа дека во еден момент процесот на вештачка интелигенција се користел само во 3,8 проценти од прегледите. Веќе следниот месец, тој удел се зголеми на 23 проценти, откако истражувачите го оптимизираа системот, правејќи го побрз и полесен за употреба со намалување на бројот на потребни кликови.

Клучни фактори за успех

„Нашето рано искуство покажа дека имплементацијата на здравствена заштита базирана на вештачка интелигенција е всушност предизвик за целиот екосистем“, истакнуваат истражувачите.

Тие додаваат дека ефикасноста не зависела само од перформансите на алгоритмот, туку и „од квалитетот на податоците, интеракцијата во рамките на работниот процес, ангажманот на лекарот, соодветното управување и мерливата клиничка вредност“.

Тие ја истакнаа брзината како трет клучен фактор. Повратните информации од лекарите мораа да дојдат веднаш за да може системот да се подобри во реално време, а не неколку недели подоцна. Затоа, како што велат, е неопходна тесна соработка помеѓу клиницистите и експертите за вештачка интелигенција во оваа област.

Мерењето на успехот не е само бројки

Иако ваквите клиники се сè уште ретки, резултатите од тестовите покажуваат дека тие можат да бидат успешни ако се исполнети соодветните услови. Сепак, остануваат специфични предизвици, како што се разликите во пристапот. Имено, вештачката интелигенција се фокусира на конечниот исход - дали пациентот ја има болеста или не - додека лекарите првенствено се справуваат со симптомите, на пример, жалбата на пациентот за заматен вид.

Самиот факт дека вештачката интелигенција точно ги анализира сликите не гарантира автоматски подобра грижа за пациентите. Затоа, авторите на студијата предлагаат идните испитувања да се фокусираат помалку на статистичката моќ.

„Успехот на здравствениот систем базиран на вештачка интелигенција треба да се мери според тоа дали ја трансформира клиничката работа и ги подобрува резултатите од третманот, а не според тоа дали постигнува супериорни резултати од тестовите“, заклучуваат истражувачите.

Истражувањето е објавено во списанието Nature Medicine.

Тагови: вештачка интелигенција

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Најмалку 21 жртва во страшна сообраќајна несреќа во Јужна Африка

Два минибус-такси се судрија челно, а потоа беа удрени од трето возило на голем автопат во Јужна Африка, при што загинаа најмалку 21 лице, а уште четири лица беа сериозно повредени, соопштија денеска властите.

Најмалку 21 жртва во страшна сообраќајна несреќа во Јужна Африка

Несреќата се случи во недела навечер во покраината Западен Кејп помеѓу малите градови Принц Алберт и Лиу-Гамка, околу 380 километри источно од Кејптаун, соопшти Корпорацијата за управување со патниот сообраќај, пренесува АП.

Агенцијата додаде дека бројот на жртви „може да се промени бидејќи службите за итни случаи и властите на Западен Кејп продолжуваат да го истражуваат местото на настанот“.

Минибусите-такси се главна форма на јавен превоз за милиони луѓе во Јужна Африка и често се вклучени во фатални сообраќајни несреќи. Најмалку 25 лица, меѓу кои 14 деца, загинаа во две одделни несреќи во јануари во кои учествуваа минибуси-такси.

Три жртви од несреќата во недела навечер беа итно префрлени во болница, но беа прогласени за мртви по пристигнувањето, соопшти полицијата.

Властите веруваат дека несреќата започнала кога две минибуси-такси се судриле челно, пред да бидат удрени од теренско возило, соопшти Секретаријатот за мобилност на покраината Западен Кејп.

Автопатот N1 беше затворен на местото на настанот додека Корпорацијата за управување со патниот сообраќај започна истрага.

Тагови: Јужна Африка

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер