По сведочењето на претеникот Ферид Мухиќ и вработениот во Собранието Сашко Коцевски рочиштето за настаните во Парламентот за 27ми април се одложи затоа што му се слоши на обвинетиот Мумир Пепиќ, по што со возило од итната помош беше пренесен во болница.
Прв сведочеше Коцевски кој во Собранието го регулира системот за електронско гласање. Тој детално ги опиша настаните на 27ми април минатата година и потенцираше дека е член на ВМРО ДПМНЕ.
Раскажа дека тогашниот спикер Трајко Велјановски ја прекинал седницата во 18 часот, а слушнал како неколку пратеници од ВМРО ДПМНЕ меѓу себе зборуваат дека не смее да се избере нов претседател на Собранието. Коцевски и неговите колеги се криеле во техничката режија од каде што се вршат телевизиските преноси, а излегле надвор од објектот по два часа со помош на собраниското обезбедување.
Тој посочи дека до 20ти март учествувал и на протестите За заедничка Македонија, на кои на мирен начин се протестирало против тиранската платформа .Втор сведочеше пратеникот Мухиќ, кој се криел во една галеријата во прес центарот. Рече дека од луѓето кои ги слушал дошол до заклучот дека биле договарани од команден центар.
Во текот на рочиштето, адвокатот на Јохан Тарчуловски, побара изземање на судијката Добрила Кацарска поради сомнение дека таа е во роднинаска врска со некој од оштетените. Ова барање беше одбиено од претсеателот на судот Џолев под образложение дека во оваа постапка никој не се сослушува како оштетен.