Македонија

Муцунски: Сакаме рационално решение за деблокада на пристапниот процес

Македонската Влада ќе биде непоколеблива и крајно посветена на реформите што ги вети и знае дека тие не може да се спроведат преку ноќ и ќе биде потребно време, но нема да дозволи тоа да одземе бескрајно многу време.

Македонската Влада ќе биде непоколеблива и крајно посветена на реформите што ги вети и знае дека тие не може да се спроведат преку ноќ и ќе биде потребно време, но нема да дозволи тоа да одземе бескрајно многу време, истакна попладнево министерот за надворешни работи и надворешна трговија Тимчо Муцунски во обраќањето во бриселскиот Центар за европска политика (ЕПЦ) на тема „Проширувањето на ЕУ во новата ера: Перспективата на Македонија“.

- Ако некој заслужува модел во кој јасно ќе го знаеме нашиот пат и ќе се движиме напред, тоа е нашата земја. Многу често потсетувам со кого и да разговарам дека државата врз основа на ветувањата за европска иднина ги смени своето знаме, својата валута, го промени Уставот неколку пати, дури и го смени и своето името заради европските ветувања. Така што ако некој заслужува флексибилност во таа смисла, тоа е нашата земја, рече Муцунски.

Тој нагласи дека Владата е целосно посветена на интеграција на земјата во ЕУ и ќе се ангажира со Брисел и со Бугарија да се изнајде рационално решение за деблокада на нашиот пристапен процес, со кое решение откако ќе ги спроведеме уставните измени, нема да бидеме блокирани и враќани назад и преговорите нема да бидат оптоварени со прашања поврзани со идентитетот, историјата, јазикот, национализмот или етничката припадност, туку конечно ќе ни биде дозволено да се движиме напред врз основа на принципот на заслуги.

- Кога станува збор за политиката има еден многу важен принцип – ако има волја има и начин, истакна Муцунски, додавајќи дека неколку пати во изминатиов период ЕУ носеше одлуки по моделот „консензус минус еден“, па ако постои волја и посветеност може да се најде и решение.

Тој потенцира дека користењето на ветото поради билатерални прашања не ни нанесува штети само нам, туку и на легитимитетот на целиот процес на проширување на ЕУ.

- Mислам дека постојат патишта по кои би можеле да се насочиме, по кои на сите би ни било удобно и кои би обезбедиле кредибилна европска иднина не само за нас, туку верувам и за целиот регион, додаде Муцунски.

Според него, постои јаз помеѓу она што се испорачува од страна на Европската Унија и што се очекува да биде испорачано од неа, за што еден од примерите е нашата земја за која оваа е годината кога се навршуваат 20 години откако го доби кандидатскиот статус.

- Годината кога го добивме кандидатскиот статус Црна Гора не беше ни независна земја, а во меѓувреме се уште ги немаме отворено пристапните преговори. Хрватска која го започна патот заедно со нас преку т.н. процес за стабилизација и асоцијација, сега е дел од Шенген и го користи еврото како национална валута. Дозволете ми уште еднаш да истакнам дека ние се уште не сме ги отвориле пристапните преговори. Има некои кругови во Брисел кои се шегуваат со мене и велат вие сте толку добар кандидат што сакаме да ве задржиме како такви, изјави Муцунски.

Во врска со често споменуваниот термин дека сега е моментумот за проширување, Муцунски нагласи дека и во 2018 година кога го склучувавме Преспанскиот договор со Грција, доаѓаа западни лидер кои велеа дека тој е „нашиот прозорец на можности“ и дека треба „да го искористиме моментумот“ за членство во НАТО и за зачленување во ЕУ кога ќе заврши целиот процес за четири или пет години, а тие пет години изминаа пред година или година и половина.

- Кога станува збор за проширувањето, не сакам само чисто да критикуван, велам дека има нешто одлично, многу паметно што се случува од пред некое време. Тоа е т.н. План за раст на ЕУ и Реформската агенда кој е интегрален дел него. Тој е стимулативен модел кој ги стимулира земјите од регионот да одат напред на европскиот пат, нагласи шефот на македонската дипломатија.

Тој додаде дека на ова не гледаме како алтернатива на преговорите, тука како начин за да им докажавме на земјите членки дека сме посветени на европскиот пат без разлика колку и да е тежок, бидејќи многу од реформите предвидени со Реформската агенда ќе бидат тешки за остварување и ќе бараат трансформативни промени на нашето општество.

- Ние бевме првата Влада од регионот што ја доби првата транша преку Планот за раст пред една недела. Ние сме многу горди што бевме прва земја во регионот што склучи партнерство за безбедност и одбрана со ЕУ... и на него гледаме како на многу корисна алатка особено во сегашните геополитички случувања и во улогата на безбедноста и одбраната во евроинтегративниот процес, рече Муцунски.

Шефот на дипломатијата изрази и благодарност до Европската Унија и земјите членки за покажаната солидарност и брзата реакција по трагичната несреќа во Кочани, оценувајќи ја како автентичен пример за европската солидарност и европските вредности на дело.

Муцунски нагласи дека настанот во Кочани беше и аларм за потребата од справување со корупцијата, на што Владата посветено работи во изминативе 10 месеци, како и дека со реакцијата по него со приведувањето на лица без разлика на нивната партиска припадност се испраќа јасна порака дека правдата не може да биде селективна.

- Воспоставувањето кредибилна борба против корупцијата и воспоставувањето на систем на владеење на правото не е обврска само на власта, туку е потребен пристап на целото општество. Тоа значи дека покрај Владата, потребно е вклучување и на обвинителскиот и на судскиот систем, на граѓанското општество, на Академијата. Тоа треба да биде систем во кој секој придонесува во процесот не само во креирањето, туку и во спроведувањето на реформите. Тоа не е само изработка и усвојување на добри закони, туку и промена на културата, нашата општествена, политичка и ментална култура, како ќе им пристапуваме на институциите и како ќе се однесуваме, потенцира Муцунски.

Министерот Муцински во рамки на престојот во Брисел, утре и в петок ќе учествува на состанокот на шефовите на дипломатиите на земјите членки на НАТО.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Вечерта јадела суши, утредента се борела за живот- Јулија поминала 23 дена во болница и повторно учела да оди (ВИДЕО)

Мислела дека јаде обичен оброк со пријатели, но неколку дена подоцна нејзиниот живот се променил засекогаш.

Млада мајка од Еквадор по име Јулија Варгас била хоспитализирана откако доживеала сериозни здравствени компликации кои започнале по оброк со суши, а лекарите подоцна ја откриле дијагнозата што го објаснува нејзиното ненадејно влошување - лупус, кој зафатил повеќе делови од нејзиното тело, објави Екстра.

Јулија рекла дека сè започнало со гастроинтестинални симптоми кои првично изгледале како едноставна инфекција. Таа завршила во болница, каде што поминала 23 дена, од кои 16 не ѝ било дозволено да јаде или пие ништо.

На несреќната жена ѝ рекле дека ѝ е потребна итна операција и знаела дека има голема веројатност дека нема да се разбуди по тоа.

- Изминатиот месец беше здравствено патување какво што никогаш не можев да замислам. Сè започна кога јадев суши кое ми предизвика салмонела и тифус, што предизвика низа компликации и нови дијагнози. Поминав низ безброј тестови, процедури и на крајот екстремно ризична операција, за време на која морав да се соочам со реалноста дека шансите да ја напуштам операционата сала жива биле мали, рекла таа.

Исто така, морала да го оперира и жолчното кесе.

- Бев подложена на операција на жолчното кесе, додека ензимите на панкреасот ми беа многу високи, што ја направи операцијата многу ризична. Не сакаа да ме оперираат, а јас морав да ја прифатам можноста дека можеби нема да преживеам. Истата недела ми направија и ендоскопија и колоноскопија. Болката и стравот што ги чувствував за време на престојот во болницата се нешто што не знам ни како да го опишам, - вели Јулија.

Поминала ноќи во постојана болка, а никакви лекови не делувале, дури ни силните седации не можеле да ја смират.

View this post on Instagram

A post shared by Diario Expreso (@expresoec)

Беше на интензивна нега бидејќи лекарите мораа постојано да ја следат. Два часа по операцијата, доживеа парализа што ја зафати десната страна од телото и лицето. Во тие моменти, помеѓу болката и очајот, не можела да спие ниту да пие вода. Не можела правилно да дише поради болката, а 16 дена не јадела бидејќи добивала исхрана преку инфузија.

- За време на третманот, мораше да добива исхрана преку инфузија, а компликациите доведоа до дополнителни интервенции. Неколку дена подоцна се појави инфекција, па мораа итно да ја отстранат - рече Јулија.

По бројни клинички прегледи и консултации со специјалисти, лекарите успеаја да постават дијагноза што ја објаснува необичната комбинација на симптоми: системски лупус еритематозус (СЛЕ).

- Лекарите не знаеја што да прават. По бројни тестови и прегледи, поставија дијагнози за пангастритис, умерен до тежок улцерозен колитис и системски лупус еритематозус што ги зафаќаше нервниот систем и панкреасот. Конечно добив дијагноза што објаснуваше зошто ми се влошуваше секој ден, и од тој момент лекарите знаеја како да ме третираат - ја објасни таа својата ситуација.

Јулија рече дека полека се опоравува откако ја започнала својата целна терапија. Младата мајка сега мора повторно да научи како да оди и да се движи нормално.

- Моментално се опоравувам од операција и парализа; се обидувам повторно да научам како да одам, да јадам и да се движам. Учам сè повеќе и повеќе за лупусот и се обидувам да го живеам животот до максимум, бидејќи кога боли, навистина боли. Се лекувам со разни лекови, вклучувајќи ги и оние што го блокираат чувството на болка во мозокот - рече таа.

Она што го нагласи е дека верува во Бог „кој има специфична цел за неа“.

- Плачев и Го молев да биде онака како што Тој сака и јас да го прифатам, а сега сум тука, ви ја раскажувам мојата приказна и се соочувам со нова фаза од мојот живот - заклучи Јулија.

Внимавајте со живата риба

Иако сушито се смета за омилен деликатес на многумина, приказната на младата Јулија нè потсетува колку опасна може да биде суровата и недоволно зготвена риба. Овој случај е потсетник дека симптомите по консумирање сурова храна не треба да се игнорираат и дека навремената реакција е важна.

Европа

Над 2.500 илјади уапсени во Лондон- ги ловат со камери за препознавање лица

На широкиот тротоар на плоштадот Слоун во лондонскиот кварт Челзи се наоѓа комбе за достава.

На покривот има камери за надзор. Веднаш зад аголот има скеле со дополнителни камери. Неколку униформирани полицајци стојат пред комбето.

На таа шопинг-улица секогаш има многу луѓе. На комбето има предупредување дека спроведува експеримент за автоматско препознавање: камерите ги скенираат лицата на минувачите, а софтверот веднаш ги споредува сликите со базата на податоци во која се регистрирани барани лица. Ако системот вклучи аларм, фотографијата се појавува на мобилните телефони на полицајците на терен. Апсењата се случуваат речиси секој ден, пишува Дојче Веле.

Бен Расел, директорот на разузнавањето на полицијата, смета дека тоа е голем успех. Од 2024 година, уапсени се околу 2.500 луѓе, од кои речиси 900 само оваа година. Технологијата, вели тој, е многу ефикасна.

За време на интервјуто со Расел, еден човек бил уапсен на блискиот агол на улицата. Алармот бил вклучен бидејќи се сомнева дека нападнал полицаец пред неколку години.

Полициските службеници му ставија лисици на мажот откако го утврдија неговиот идентитет, а потоа го одведоа. Веднаш зад аголот, една жена беше запрена затоа што не се јавила на тест за дрога нареден од судот.

Лажните тревоги се исклучително ретки, тврди полицијата. Дури и самото совпаѓање на базата на податоци не е доволно за апсење. Идентитетот на лицето прво мора да се потврди, вклучително и преку лични документи.

Каде е приватноста?

Меѓу минувачите, таквата практика предизвикува поделени реакции. Една млада жена верува дека присуството на полицијата ја прави да се чувствува побезбедно. Една постара жена, поминувајќи покрај комбе, вели дека мора да се одмери рамнотежата помеѓу ограничувањето на граѓанските слободи и борбата против криминалот во град како Лондон. Друга жена се жали дека има премногу надзор.

Во Лондон, камери се поставени на речиси секој агол. За време на истрагите, полицијата користи снимен материјал за да ги пронајде сторителите на кривични дела. Сепак, ова е различно од системот за препознавање лица во реално време што се воведува сега. Досега, мораше да има посебна истрага за пристап до снимките, додека системот за препознавање лица во реално време бара луѓе регистрирани во базата на податоци.

Критичарите веруваат дека ова е сериозно нарушување на приватноста. Дали е тоа почеток на полициска држава? Џек Колсон од организацијата „Голем брат воч“ предупредува дека сè уште не е јасно како полицијата може да користи препознавање лица.

Нема закон

Колсон предупредува дека скенирањето на лица е многу чувствително бидејќи овозможува недвосмислена идентификација на лице, а податоците би можеле да се складираат. „Овие податоци би можеле да се користат за различни цели. Тоа е многу сериозна мерка и моќна алатка за секоја влада“, вели активистот.

Организации како „Голем брат“ бараат јасни правила за да се утврди кога, каде и од кои причини полицијата може да користи препознавање лица во реално време. Тие исто така бараат законска забрана за складирање на собраните податоци.

Нацрт-законот е планиран за есен. Во меѓувреме, полицијата веќе набавува дополнителни камери и комбиња за достава.

Тагови: Лондон

Европа

Масовна тепачка во авион- пилотот принудно слетал на Тенерифе

Тепачка во која учествувале десетина патници го принудила авионот на „ИзиЏет“, кој летал за Ливерпул, да се врати на Тенерифе.

Пилотот одлучил да го сврти авионот и да се врати на шпанскиот остров околу 30 минути по полетувањето поради опасноста што насилството ја претставувало за безбедноста на летот, соопшти контролата на воздушниот сообраќај. На барање на екипажот, полицијата го пречекала летот EZY3352 по слетувањето на аеродромот „Јужен Тенерифе“ , објави Би-Би-Си.

„ИзиЏет“ објави дека авионот се вратил поради „група патници кои се однесувале несоодветно и го прекинале летот“. „Ние ги сфаќаме ваквите инциденти многу сериозно и не толерираме несоодветно однесување кон нашиот персонал“, соопшти авиокомпанијата.

Портпаролот на „ИзиЏет“ истакна дека „членовите на персоналот во кабината и на земјата се обучени да ја проценат секоја ситуација и да реагираат брзо и соодветно, така што безбедноста на летот и другите патници не е загрозена во ниту еден момент“.

Доцнење во пристигнувањето од речиси два часа

Откако полицијата ги отстранила патниците кои го предизвикале инцидентот, авионот со вкупно 186 патници го продолжил својот лет кон Ливерпул. Според достапните информации, сите учесници во конфликтот биле британски државјани, а Шпанската цивилна гарда не уапсила никого.

Контролата на воздушниот сообраќај во соопштението наведува: „Изразуваме целосна поддршка на екипажите и патниците кои се принудени сè повеќе да минуваат низ вакви ситуации“.

Во соопштението за медиумите се наведува дека екипажот побарал присуство на полицијата при слетувањето и дека контролорите на летот „го забрзале враќањето на авионот колку што е можно повеќе, додека се координирале со аеродромот за полицијата да биде подготвена по пристигнувањето“.

Според услугата Flightradar24, авионот слета во Ливерпул еден час и 54 минути по закажаното време на пристигнување.

Тагови: авион Тенерифе