Евроинтегративниот процес не смее да биде заложник на билатерални спорови, туку мора да биде заснован на заслуги и јасни критериуми - ова е пораката која шефот на македонската дипоматија Муцунски ја упатил на работниот појадок со министрите за надворешни работи од регионот во Блед. Муцунски како што соопштија од македонското МНР, нагласил дека земјава останува посветена на европскиот пат и активно работи на реформите и спроведување на планот за раст. Интеграцијата во Унијата пак, оценил дека е клучна за регионалната стабилност.

„Проширувањето не смее да биде заложник на билатерални спорови или прашања на идентитет. Ако тоа се дозволи, се ризикува не само застој на една земја, туку и губење на кредибилитетот на целиот процес“– истакнал Муцунски

Евроинтегративниот процес беше главна тема и на неформалната средба на министрите за европски прашања од земјите – членки и земјите-кандаидатки во Копенхаген каде земјава беше претставувана од министерот Муртезани. Пред почетокот на состанокот тој повтори дека земјава останува посветена на европската агенда и покрај тоа што предолго е во чекалната на Унијата.

-Тоа што треба да го направиме сега е да се осигураме дека нашите напори во кои инвестираме сега ќе бидат завршени во најскоро време. Гледам дека во рамката 2030 година, сите земји-кандидатки од западен Балкан ќе бидат членки на ЕУ.- Орхан Муртезани – Министер за европски прашања

Дека процесот на проширување во Брисел се гледа како на безбедносно прашање потврди и еврокомесарката Марта Кос. Данската министерка Бјере пак, која е домаќинска на состанокот истакна дека покрај земјите-кандидатки, обврски има и самата ЕУ, која мора да биде јасна околу барањата за членство.

-Нема да можеме да имаме безбедност во Европа, доколку не го стабилизираме континентот и проширувањето има голема улога во ова.- Марта Кос – Еврокомесарка за проширување

-Проширувањето стана ништо помалку од геополитичка потреба. Да не се испорача на оваа агенда ќе биде стратешка грешка. Испорачувањето на оваа агенда е заедничка задача. За потенцијалните членки, тука е големиот напор да се достигнат „копенхашките критериуми“ за ЕУ, задачата е подеднакво комплексна. ЕУ мора да биде јасна околу барањата за членство. - Мари Бјере – Министерка за европски прашања

Дека проширувањето е геополитичка неопходност пред неколку месеци во Скопје порача и европскиот двоец Кошта и Калас кои во таа прилика повторија дека за Македонија нема план „Б“, како одговор на македонската иницијатива за уставни измени со одложено дејство.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.