Муцунски на затворањето на македонското претседателство со AII/EUSAIR - Канал 5

Македонија

Муцунски на затворањето на македонското претседателство со AII/EUSAIR

„Напредокот од ова претседателство покажа дека кога дејствуваме заедно, можеме да испорачаме резултати“.

Муцунски на затворањето на македонското претседателство со AII/EUSAIR

Со одржувањето на 11-от Форум на Јадранско-јонската иницијатива (AII) и Стратегијата на ЕУ за Јадранско-јонскиот регион (EUSAIR), што се одржа во Скопје, државата успешно го заокружи своето едногодишно претседателство со AII/EUSAIR за периодот 2025–2026 година.

Форумот, кој обедини високи претставници на владите, европските институции, регионалните организации, академската заедница, граѓанскиот сектор и младите, претставуваше значајна можност за потврдување на заедничката посветеност кон европската интеграција, регионалната соработка и одржливиот развој на Јадранско-јонскиот регион.

Во текот на претседателството, Македонија работеше под мотото „Зајакнување на регионалното единство, унапредување на европската иднина“, ставајќи посебен акцент на проширувањето на Европската Унија, подобрувањето на регионалната поврзаност и продлабочувањето на соработката меѓу земјите членки на ЕУ и земјите кандидати.

Усвојувањето на денешната декларација испрати силна политичка порака за значењето на политиката на проширување како геостратешки приоритет на Европската Унија. Декларацијата ја потврдува потребата од кредибилен, предвидлив и на заслуги заснован процес на пристапување, како и од продолжување на реформските процеси и усогласувањето со европските стандарди.

Во рамки на претседателството беше постигнат и конкретен напредок во унапредувањето на транспортната, енергетската и дигиталната поврзаност на регионот, со што се создаваат подобри услови за економски развој, инвестиции и поголема мобилност на граѓаните и бизнисите.

Државата во текот на својот мандат посвети особено внимание и на инклузивноста и учеството на младите, граѓанското општество и академската заедница, препознавајќи ги како важни чинители во градењето на долгорочна регионална стабилност и соработка.

Во рамки на Форумот свое обраќање имаше министерот за надворешни работи и надворешна трговија, Тимчо Муцунски, кој истакна дека претседателството било „за континуитет и одговорност, но пред сè – за резултати“, додавајќи дека она што започнало во Њујорк прераснало во претседателство фокусирано на реализација, практична соработка и конкретни резултати.

Осврнувајќи се на клучните достигнувања за време на претседателството, министерот Муцунски истакна дека е зајакната европската перспектива на регионот преку континуиран дијалог и координирано дејствување, при што дополнително била потврдена улогата на AII и EUSAIR како важни платформи за поврзување на Европската Унија со земјите кандидати. Воедно, бил постигнат напредок во транспортната, енергетската и дигиталната поврзаност, како и во интегрирањето на приоритети поврзани со дигиталната трансформација, циркуларната економија и отпорноста на регионот. Посебен акцент бил ставен и на инклузивноста, учеството на младите и улогата на граѓанското општество и академската заедница во процесите на одлучување.

Говорејќи за усвоената декларација, министерот Муцунски порача дека таа „не е само резиме на дискусиите, туку израз на заедничка решителност“, потврдувајќи ја посветеноста кон меѓународното право, европските вредности и заедничкото справување со геополитичките предизвици.

На крајот од обраќањето, министерот истакна дека претседателството завршува „со чувство на исполнетост, но и со јасна свест дека работата продолжува“, изразувајќи уверување дека Италија успешно ќе го продолжи процесот во периодот 2026–2027 година. Тој упати благодарност до сите партнери, колеги и пријатели за соработката и посветеноста во текот на годината, нагласувајќи дека „регионот не е поврзан само географски, туку и преку заеднички вредности, заедничка цел и заедничка европска амбиција“.

Со завршувањето на претседателството, Македонија испраќа јасна порака дека регионалната соработка носи конкретни резултати и дека заедничката европска иднина на регионот останува заедничка стратешка определба.

Претседателството со AII/EUSAIR официјално преминува кај Италија за периодот 2026–2027 година. Македонија останува целосно посветена на натамошната поддршка и унапредување на јадранско-јонската соработка и европската перспектива на регионот.

Тагови: Тимчо Муцунски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Тимоти Шаламе и Кајли Џенер се бакнуваат на трибините на финалето на СП

Тимоти Шаламе и Кајли Џенер го привлекоа вниманието на финалето на Светското првенство помеѓу Аргентина и Шпанија.

Тимоти Шаламе и Кајли Џенер се бакнуваат на трибините на финалето на СП

Двојката го гледаше натпреварот од трибините, а фотографите го забележаа моментот кога разменија бакнеж.

Шаламе носеше сина маица со долги ракави од Адидас за таа пригода, додека Џенер носеше црна облека и очила за сонце. За време на средбата, тие седеа еден до друг и не ја криеја својата нежност.

Својата врска ја покажуваат сè почесто во јавноста

Актерот и ријалити ѕвездата ја држеа својата врска подалеку од јавноста долго време, но во последно време сè почесто се појавуваат заедно на големи настани. Фотографиите од нивниот бакнеж од финалето брзо се проширија на социјалните мрежи.

Финалето на Светското првенство привлече многу познати гости, а Шаламе и Џенер беа меѓу паровите кои предизвикаа најголемо внимание на трибините.

Тагови: кајли џенер Тимоти Шаламе

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Македонскиот КИЦ во Загреб доби благодарница од најпрестижната фолклорна манифестација во Хрватска

Македонскиот КИЦ во Загреб доби благодарница за креативен придонес и успешна взаемна соработка во продлабочувањето на соработката меѓу Македонија и Хрватска во областа на заштитата, презентацијата и промоцијата на нематеријалното културно наследство.

Македонскиот КИЦ во Загреб доби благодарница од најпрестижната фолклорна манифестација во Хрватска

На свечена церемонија во Хрватскиот државен архив, по повод 60-годишнината на Меѓународната смотра на фолклорот во Загреб – најугледната хрватска манифестација посветена на зачувувањето, презентацијата и промоцијата на традициската култура и нематеријалното културно наследство – македонскиот КИЦ во Загреб доби благодарница за креативен придонес и успешна взаемна соработка во продлабочувањето на соработката меѓу Македонија и Хрватска во областа на заштитата, презентацијата и промоцијата на нематеријалното културно наследство. Благодарницата за македонскиот КИЦ ја врачи уметничкиот директор на Меѓународната смотра на фолклорот, Твртко Зебец, а во име на директорката на македонскиот КИЦ ја прими Зорица Велиновска, претставничка на Македонците во Советот за национални малцинства на Република Хрватска.

„Ова е исклучително значајно признание за македонскиот КИЦ во Загреб и потврда за неговата клучна улога на полето на културната дипломатија и јакнењето на културната соработка меѓу Македонија и Хрватска, особено во областа на зачувувањето и промоцијата на нематеријалното културно наследство. Да се добие благодарница по повод 60-годишниот јубилеј на Меѓународната смотра на фолклорот во Загреб, манифестација чиј претседавач на Советот е министерката за култура и медиуми на Република Хрватска, Нина Обуљен Коржинек, претставува голема чест и привилегија, а истовремено и уште поголема обврска и одговорност да продолжиме со квалитетна презентација и промоција на богатата вековна македонската култура и уметност. Нашата визија е преку културната дипломатија да придонесуваме кон продлабочување на културните врски меѓу Македонија и Хрватска и да отвораме нови можности за соработка афирмација и промоција на културните вредности на двете држави “, вели Мими Ѓоргоска Илиевска, директорка на македонскиот КИЦ во Загреб.

По повод јубилејот 60 години Меѓународна смотра на фолклорот, во македонскиот КИЦ во Загреб на почетокот на овој месец беше отворена изложбата „Поздрав од Македонија – фотографии на македонски фолклорни групи на Меѓународната смотра на фолклорот во Загреб“, на авторките Ивона Опетческа Татарчевска и Бојана Пољаковиќ Поповиќ. Изложбата преку фотографии од архивата на МСФ го документира шестдецениското учество на македонските фолклорни групи на оваа значајна меѓународна манифестација.

Оваа година во рамките на официјалната програма на Смотрата на сцените во паркот Зрињевац и на главниот плоштад „Бан Јелачиќ“ во Загреб со својот автентичен вевчански фолклор се претстави КУД „Дримкол„ од Вевчани.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Пародија на легендарната фотографија- сега Јамал го бања Меси и го дави во кадата (ВИДЕО)

Шпанија е новиот светски шампион во фудбал. 

Пародија на легендарната фотографија- сега Јамал го бања Меси и го дави во кадата (ВИДЕО)

Во напнатото финале на Светското првенство во Соединетите Американски Држави, Шпанците ја победија Аргентина со 1:0 по продолжение. Решавачкиот момент се случи во 106-тата минута, кога Феран Торес го постигна победничкиот гол. Аргентина на тој начин не успеа да ја одбрани титулата освоена во 2022 година во Катар, додека Шпанија го повтори успехот од 2010 година.

Пред финалето, фотографија направена пред речиси 19 години стана вирална. На неа се гледа Лионел Меси (сега 39) во када со Ламин Јамал (сега 19). Пред пресметката за светската титула, таа слика стана хит бидејќи ги прикажува клучните играчи на финалистите, фатени во необична ситуација и со огромна разлика во години.

Сега историската фотографија е направена во септември 2007 година во гостинската соблекувална на Камп Ноу. Меси тогаш имаше 20 години, а Јамал шест месеци. На една фотографија, Аргентинецот го држи бебето во раце, додека на друга, заедно со мајката на Јамал, Шила Ебан, му помага да се искапе во пластична када.

Снимањето беше организирано за добротворниот календар на локалниот весник Спорт и УНИЦЕФ. Семејства од Матаро аплицираа за извлекување за да се фотографираат со фудбалерите на Барселона, а семејството на Јамал беше избрано токму за да се сретне со Меси. Фотографиите ги направи Жоан Монфорт.

Монфорт подоцна рече дека Меси на почетокот не знаел како да го држи бебето и дека снимањето било напорно бидејќи тогаш младиот фудбалер бил повлечен и несигурен во таа ситуација. Дури ни фотографот не знаел дека бебето на фотографиите е иден шпански репрезентативец сè додека фотографијата повторно не почнала да циркулира на интернет.

Фотографијата ја објави повторно таткото на Јамал

Фотографијата беше речиси заборавена долго време, а доби светско внимание за време на Европското првенство во 2024 година. Таткото на Јамал ја објави на Инстаграм со пораката: „Почетокот на две легенди“. Јамал го освои Европското првенство со Шпанија тоа лето и го потврди својот статус како еден од најголемите млади таленти во светскиот фудбал.

Во пресрет на финалето на Светското првенство, фотографијата повторно стана вирална. Монфорт рече дека медиумскиот и јавниот интерес се зголемил многукратно откако станало јасно дека Меси и Јамал ќе се борат за најголемиот трофеј во фудбалот.

„Ова експлодираше низ целиот свет, а фактот дека финалето се играше во САД ѝ даде на приказната дополнителен импулс. Сè кулминираше со финалето помеѓу Меси и Јамал. Подобро е од кое било филмско сценарио“, рече фотографот.

По финалето, улогите беа заменети

Откако Шпанија на Ламине ја победи Аргентина на Меси во битката за светската титула, се појавија пародии од иконската фотографија. Па сега на социјалните мрежи кружат монтажи каде Јамал го капе Меси во пластична када и го дави во неа.

Тагови: Ламин Јамал Лионел Меси

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер