Фудбал

Мрачните тајни и „Златната топка“! Поранешниот шеф разоткри валкани игри: Агент остави мистериозен плик на масата, а потоа исчезна!

Со децении, „Златната топка“ (Ballon d'Or) е многу повеќе од обична награда за најдобриот фудбалер во светот.

Зад овој престижен трофеј се водат жестоки кампањи, се врши лобирање, се контактираат новинари и се убедуваат гласачите, а понекогаш работите – според сведоштвото на човек кој со децении бил во самото средиште на случувањата – одат и многу подалеку.

Паскал Фере, поранешниот главен уредник на „Франс фудбал“ (France Football) и човекот кој со години беше задолжен за „Златната топка“, отвори врата што долго време беше затворена.

Во книгата „Скриеното лице на Златната топка“, како и во интервјуата по повод нејзиното објавување, тој откри низа неверојатни детали од задкулисните случувања поврзани со најпрестижната индивидуална награда во фудбалот.

Фере раскажа за средба со агент на еден фудбалер номиниран за награда.

Според неговите зборови, агентот најпрво му ги претставил квалитетите на својот клиент, а потоа директно го прашал дали може да ја „продаде“ неговата кандидатура на членовите на жирито.

Фере одбил. Во еден момент станал од масата за да се јави на телефон.

Кога се вратил – агентот го немало, но на масата останал плик. Фере не го отворил пликот. Го зел и веднаш го однел на рецепцијата во хотелот. И денес, како што вели, не знае што имало внатре. Уште побизарно е тоа што подоцна повторно се сретнал со истиот агент, но никогаш не му го спомнал пликот.

Фудбалерот што го застапувал тој агент никогаш не ја освоил „Златната топка“.

Името на Флорентино Перез е речиси неизбежно кога се зборува за Реал Мадрид и „Златната топка“.

Реал со години имаше свои кандидати, од Кристијано Роналдо и Лука Модриќ до Карим Бензема и Винисиус Жуниор.

Ситуацијата особено ескалираше во 2024 година, кога мадридскиот клуб одлучи да ја бојкотира церемонијата откако Винисиус заврши зад Родри.

Делегацијата на Реал Мадрид тогаш не отпатува за Париз.

Сепак, Фере тврди дека Перез лично никогаш не се обидел да влијае врз него.

„Тој ја сака таа награда, но никогаш не ми испратил порака ниту, пак, индиректно навестил нешто“, раскажува Фере за своето искуство со претседателот на Реал. Тоа, сепак, не значи дека немало сериозно лобирање околу „Златната топка“.

Фере зборуваше и за годините на големо ривалство меѓу Лионел Меси и Кристијано Роналдо.

Според него, луѓето од опкружувањето на Роналдо, а особено оние од Реал Мадрид, одлично знаеја како да се борат за наградата – се разбира, во рамките на дозволеното. Токму тој период покажа колку важна стана „Златната топка“, не само за играчите, туку и за клубовите, агентите и целосните фудбалски империи.

Една од најемотивните приказни се однесува на Лука Модриќ.

Токму Фере бил тој што го известил хрватскиот маестро дека ја освоил „Златната топка“ во 2018 година.

Модриќ на почетокот не се јавуваше на телефон. Кога конечно разговараа, настана тишина, а потоа почнаа солзите. „Зошто јас?“, праша Модриќ – според сеќавањето на Фере – целосно совладан од емоции.

Тој вети дека нема никому да ја соопшти веста пред церемонијата – дури ни на сопругата. Бензема беше воздржан, Фере беше збунет Ниту повикот до Карим Бензема во 2022 година не се одвиваше како што се очекуваше.

Фере беше изненаден од неговата воздржана реакција, особено затоа што знаеше колку е значајно освојувањето на „Златната топка“.

Дури подоцна Бензема му објасни дека во тој момент бил опкружен со луѓе и морал да внимава да не ја открие тајната. Така, некогашниот чувар на најголемата фудбалска тајна ја откри и другата страна на приказната – онаа во која победникот веќе знае дека станал дел од историјата, но сè уште не смее да каже ни збор.

Фере е свесен дека неговите приказни ќе предизвикаат бура. Но, истовремено предупредува дека околу „Златната топка“ кружат огромен број гласини и неточни информации.

Затоа, неговата книга не се занимава само со местење, лобирање и притисоци, туку и со тоа како славата, парите, егото и престижот го промениле односот на фудбалскиот свет кон оваа награда. И можеби токму тоа е најинтересното.

Бидејќи зад гламурозната вечер, скапите костуми и блескавиот трофеј се крие свет во кој се туркаат кандидатури, агенти лобираат, клубови се лутат, а понекогаш – на масата се појавува мистериозен плик.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

30 убиени во руски напад врз два автобуса во украинскиот град Краматорск

Најмалку 33 лица се убиени во руски напад врз два патнички автобуси во Краматорск, во источна Украина.

Најмалку дваесет луѓе се ранети во нападот, соопшти канцеларијата на регионалниот обвинител на Доњецк, регион каде се водат едни од најжестоките борби, а кој Русија сака да го анектира од Украина.

Според украинските власти, руските сили гранатирале улица во Краматорск, кога биле погодени двата автобуса. Нападот следува ден откако откако повеќе од 20 луѓе беа убиени во руски воздушни напад и врз неколку украински градови, првенствено насочени кон енергетската инфраструктура..

Фудбал

Четири клуба пред сите други дознале за одлуката за вината на Манчестер Сити?!

Бурата околу скандалот поврзан со финансиското работење на Манчестер Сити не стивнува.

Имено, четири клуба од Премиер лигата, пред сите останати, добија две важни известувања во врска со случајот што Премиер лигата го води против Манчестер Сити.

Од сите претседатели на клубови било побарано да потпишат договори за доверливост пред да ги добијат документите поврзани со случајот на Премиер лигата против Манчестер Сити и одлуката на Независната комисија, која го прогласи Манчестер Сити за виновен по 114 точки за прекршување на правилата.

Сепак, четири клуба ја добиле информацијата пред сите други. Оваа вест сега би можела да шредизвика земјотрес во англискиот фудбал. Манчестер Јунајтед, Ливерпул, Арсенал и Тотенхем биле информирани за одлуката на Независната комисија пред сите останати клубови.

Исто така, истите четири клуба добиле известувања пред останатите, уште во 2024 година, за тоа како можат да поведат постапка за отштета против Манчестер Сити доколку Сити биде прогласен за виновен – што сега и се случи.

Овие четири клуба се разликуваат и по тоа што претседателите на Јунајтед, Ливерпул, Арсенал и Тотенхем не морале да потпишуваат договор за доверливост.

Всушност, овие четири клуба биле информирани за одлуката порано од останатите токму затоа што пред две години им беше дадена можност да поведат правна постапка против клубот од „Етихад“.

Се разбира, фактот што останатите клубови не добиле известувања за можното покренување на постапката во 2024 година, не значи дека не можат да го сторат тоа сега или откако ќе заврши жалбената постапка.

Македонија

Андоновски: Нашата цел е електронските услуги да стигнат до секој граѓанин

Министерот за дигитална трансформација, Стефан Андоновски, заедно со градоначалникот на Општина Струмица, Петар Јанков, го посети новиот Центар за услуги – ЕТУ Струмица, сместен во општинската зграда.

Со отворањето на 18-тиот Центар за услуги во Македонија, граѓаните на Струмица и на околните општини добиваат пристап до 350 услуги од Националниот портал за електронски услуги – uslugi.gov.mk, со непосредна помош од вработените во центарот.

Во изјавата за медиумите, министерот Андоновски истакна дека новиот центар е резултат на успешната соработка меѓу Министерството за дигитална трансформација и локалната самоуправа, која го обезбеди просторот.

„Како што ветивме во текот на кампањата и како што разговаравме со градоначалникот, Струмица е во фокусот на Министерството за дигитална трансформација. Големо е задоволството што тука го отвораме 18-тиот Центар за услуги во Македонија. Во одлична соработка со локалната самоуправа, нашите вработени сега се достапни да им ги понудат 350-те услуги од Националниот портал на граѓаните од Струмица и од целиот регион“, изјави Андоновски.

Министерот посочи дека центарот е наменет за сите граѓани, особено за оние кои немаат можност, не сакаат или не знаат самостојно да ги користат електронските услуги од својот дом. Со поддршка од вработените, тие ќе можат полесно да пристапат до потребните услуги на едно место.

„Секој граѓанин кој не е во можност или не знае како да користи електронски услуги од дома, тоа ќе може да го направи тука, во Центарот за услуги. Уверението за државјанство, потврдите за неосудуваност, за кривична и казнена евиденција, изводите од матичните книги на родени, венчани и умрени, како и услугите од Агенцијата за катастар, се достапни на едно место во Струмица“, нагласи министерот.

Градоначалникот на Општина Струмица, Петар Јанков, се заблагодари за успешната соработка со Министерството за дигитална трансформација и изрази желба таа да продолжи и во иднина, во интерес на граѓаните на општината. Тој ги повика граѓаните да ги користат услугите на новиот Центар за услуги, кои ќе им заштедат време и ќе го олеснат процесот на добивање на потребните документи.

Покрај пристапот до услугите, центарот има и едукативна улога, преку која граѓаните ќе добиваат насоки и помош за користење на електронските услуги. Андоновски истакна дека соработката со Општина Струмица продолжува и преку други проекти за подобрување на дигиталната достапност.

„Намената на центарот е и едукативна, а соработката со општините не запира тука. Во Струмица реализиравме и две зони за бесплатен интернет преку проект на ГИЗ и Европската Унија. Во периодот што следи, граѓаните треба да очекуваат новини од соработката на Министерството со општините, секако и со Општина Струмица“, рече Андоновски.

Министерот ја потврди заложбата до крајот на годината да бидат отворени 20 центри за услуги, најавувајќи дека следни се Ресен, Кичево и Гостивар. Воедно, најави и кампања од пролет за доближување на електронските услуги до жителите на руралните средини.

„Целта е до крајот на мандатот да стигнеме до секој граѓанин. Ветив дека до крајот на годината ќе имаме 20 вакви центри за услуги и тоа ќе го исполниме. Следни се Ресен, Кичево и Гостивар, со што веќе покриваме најголем дел од градовите во Македонија. Од пролет најавувам и кампања за руралните средини, за електронските услуги да ги доближиме до сите граѓани, бидејќи само во тој случај дигиталните услуги се корисни“, порача Андоновски.