Можно ограничено влијание од кризата кај дел од дестинациите од домашните аеродроми - Канал 5

Македонија

Можно ограничено влијание од кризата кај дел од дестинациите од домашните аеродроми

Како резултат на конфликтот на Блискиот Исток, можно е одредено ограничено влијание кај дел од дестинациите од домашните аеродроми, но засега не се очекуваат поголеми нарушувања во авиосообраќајот, велат за МИА од ТАВ Македонија. 

Можно ограничено влијание од кризата кај дел од дестинациите од домашните аеродроми

Оттаму информираат дека засега само Виз ер ја прекинува редовната авиолинија Скопје - Ларнака, од 13 април, и таа во иднина ќе биде сезонска во тек на летните месеци.

Во пресрет на летниот ред на летање, од ТАВ велат дека по успешната 2025 година и силната зимска сезона очекуваат продолжување на стабилниот раст и во наредниот период, поткрепен со зголемен број патници и проширување на мрежата на дестинации.

По војната на Блискиот Исток, дел од авиокомпаниите веднаш мораа да се прилагодат на настанатата состојба, а со тоа и да ги реорганизираат рутите и распоредите на летови, што индиректно се одрази и врз туристичките патувања на глобално ниво.

- Од гледна точка на ТАВ Македонија, како оператор на двата македонски аеродроми, нашата надлежност се аеродромските операции и обезбедување непречено и безбедно функционирање на услугите за сите авиокомпании и за патниците додека тие се на аеродромите. Секако, внимателно ја следиме состојбата и сме во постојана комуникација со авиопревозниците. Во овој момент не се очекуваат значајни промени во вкупниот број на летови и на патници, имајќи предвид дека најголемиот дел од сообраќајот на скопскиот и на охридскиот аеродром е поврзан со дестинации во географска Европа, особено Западна и Северна Европа, изјави за МИА Неџат Курт, главен извршен директор на ТАВ Македонија.

„Виз ер“, појснува тој, ја прекинува редовната авиолинија Скопје - Ларнака откако интересот за резервации на авиобилети се намалил. - Значи, можно е одредено ограничено влијание кај дел од дестинациите, но засега не се очекуваат поголеми нарушувања во авиосообраќајот, вели Курт.

Со летниот ред на летови, кој стартува ноќеска на полноќ ќе има 10 нови дестинации од двата домашни аеродрома.

Од Меѓународниот аеродром Скопје ќе сообраќаат 16 авиокомпании на 49 дестинации, а чартер летови ќе има кон шест дестинации, како и 20 дестинации кон кои ќе лета авиокомпанијата „Фри Брд Јуроп“.

Од Аеродромот Св. Апостол Павле, пак, ќе летаат седум авиокомпании до 13 дестинации, а чартер летови кон три дестинации на две авиокомпании.

На почетокот на новиот ред на летање, 29 март, стартува авиолинијата од Охрид до Милано, а од 30 март Скопје првпат се поврзува со Неапол, а повторно се воведува авиорутата до Будимпешта. Потоа од 17 мај, „Аустријан Ерлајнс“ ќе започне со летови од Охрид до Виена, а во јуни Виз ер ќе воведе уште две нови линии од Охрид до Катовице и Вроцлав.

Од 15 јули стартува линијата од Скопје до Палермо, а од 18 јули започнува рутата Скопје – Алгеро.

Во првите денови од јуни, започнуваат и чартер летовите од Скопје до Трабзон на 2 јуни и до Самсун на 3 јуни на авиокомпанијата Anadolu Jet.

Според најавите, утре и официјално ќе почне реконструкцијата и модернизацијата на Охридскиот аеродром, која се очекува да биде завршена до крајот на мај годинава.

Со предвидените активности, според ТАВ Македонија, аеродормот конечно ќе добие нов лик, при што во терминалната зграда ќе се добие поголем простор за патниците, со цел поефикасни и покомфорни услуги. ТАВ Македонија во овој проект вложува 2,7 милиони евра, а ќе опфати неколку клучни сегменти и ќе се реализира во неколку фази. Се очекува целосно да заврши до крајот на мај оваа година. Додека се одвива реконструкцијата, авиосообраќајот ќе се одвива непречено - изјави Курт.

Според него, домашните аеродроми ја заокружуваат зимската сезона со силни резултати, исто како и 2025 година, кои придонесоа за стабилен и одржлив раст во бројот на патници и на летови.

Во февруари годинава скопскиот аеродром опслужил 236.769 патници, што претставува зголемување од 33,2 проценти во однос на истиот месец во 2025 година, а биле реализирани 1.680 летови, за 19,4 проценти повеќе споредено со февруари лани.

- По успешната 2025 година и силната зимска сезона, ТАВ Македонија очекува продолжување на стабилниот раст и во наредниот период, поткрепен со зголемен број на патници и проширување на мрежата на дестинации. Со континуирана посветеност на квалитетот на услугите и инвестиции во инфраструктура и развој, компанијата останува фокусирана на унапредување на корисничкото искуство и одржлив напредок - вели Курт.

Во 2025 година Меѓународниот аеродром Скопје и Аеродромот Св. Апостол Павле Охрид опслужија 3,5 (3.475.288) патници што е зголемување од 9 проценти во однос на 2024 година. Лани, двата аеродрома опслужија 26.500 летови, што е за 4 проценти повеќе во однос на истиот временски период, од јануари до декември, 2024 година.

Летен распоред на летови за 2026 од Меѓународен Аеродром Скопје:

Дестинации и авиокомпании:

· Атина – Aegean Airlines

· Белград – Air Serbia

· Истанбул - Turkish Airlines

· Истанбул, Анкара и Бодрум – AJet

· Виена – Austrian Airlines

· Цирих – Chair Airlines и Edelweiss

· Загреб – Croatia Airlines

· Париз (Орли) и Женева – EasyJet

· Варшава – LOT Polish Airlines

· Франкфурт – Lufthansa

· Осло – Norwegian Air Shuttle

· Истанбул (Сабиха Гокчен), Измир и Анталија – Pegasus Airlines,

· Анталија и Измир – Sun Express

· Wizz Air - Алгеро, Барселона, Бари, Базел-Милуз, Милано-Бергамо, Берлин, Болоња, Братислава, Брисел-Шарлероа, Будимпешта, Келн, Дортмунд, Ајндховен, Франкфурт-Хан, Фридрихсхафен, Гетеборг, Хамбург, Мадрид, Малме, Малта, Минхен-Меминген, Неапол, Нирнберг, Палермо, Прага, Стокхолм, Штутгарт, Осло-Сандефјорд, Париз-Бoве, Рим-Фјумичино, Венеција-Тревизо, Баден-Баден (Карлсруе), Љубљана, Лондон-Лутон.

Чартер летови:

· Ajet - Анталија, Чукурова, Анкара, Дијарбакир, Самсон, Трабзон

· Freebird Airlines – Анталија, Брисел, Брисел/Марсеј, Минхен/Виена, Копеханген/Булунд, Берлин/Хамбург, Франкфурт/Штутгард, Дизелдорф/Франкфурт, Париз, Лион/Марсеј, Манчестер/Лондон, Дизелдорф, Стокхолм/Гетеборг

· Хургада - Nesma Airlines и Nile Air

· Монастир - Nouvel air

· Чукурова - Pegasus Airlines

· Дијарбакир -Turkish Airlines

Дополнително, на овие шест дестинации летаат повеќе од една авиокомпанија, за време на летниот распоред на летови за 2026 година:

· Анталија (Pegasus и SunExrpess и чартер од Ajet, Freebird Airlines)

· Франкфурт (Lufthansa до аеродромот во Франкфурт и Wizz Air до аеродромот Хан)

· Истанбул (Turkish Airlines до аеродромот iGA; Pegasus и Ajet до аеродромот Сабиха Гокчен)

· Измир (Pegasus и SunExpress)

· Цирих (Edelweiss и Chair Airlines)

· Осло (Осло Сандефјорд од Wizz Air и Осло – Norwegian Air Shuttle)

Летен распоред на летови за 2026 од Аеродромот Св. Апостол Павле Охрид:

Дестинации и авиокомпании:

· Цирих – Edelweiss и Chair Airlines

· Амстердам - TUI Fly

· Белград - Air Serbia

· Истанбул - Turkish Airlines

· Виена - Austrian Airlines

· Катовице, Вроцлав, Дортмунд, Минхен-Мемингем, Базел-Милуз, Штутгард, Милано-Малпенса, Братислава – Wizz Air.

Чартер летови:

· Базел-Милуз – GP Aviation

· Гетвик и Манчестер со TUI

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Фото: Провокативната Нивес со интересни фотки и порака

Хрватската, старлета, пејачка, водителка, писателка и инфлуенсерка Нивес Целзијус повторно го привлече вниманието на своите следбеници на социјалните мрежи, овојпат со фотографии од одмор што ја доловуваат летната атмосфера. 

Фото: Провокативната Нивес со интересни фотки и порака

Бујната Нивес сподели фотографии од одморот, а покрај објавата остави кратка, но впечатлива порака.

„...кожата ми гори, срцето ми трепери...“, напиша Нивес.

Стиховите што таа ги избра дополнително ја истакнаа атмосферата што сакаше да ја пренесе преку фотографиите, а објавата не остана незабележана од нејзините следбеници.

Нивес често споделува моменти од своите патувања и одмори во текот на летните месеци, а нејзините објави редовно привлекуваат големо внимание кај јавноста.

Тагови: нивес

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Белгиски нуркач пронашол необично богатство во потонат брод

Неверојатно откритие во близина на брегот на Довер го привлече вниманието и на експертите и на љубителите на историјата. 

Белгиски нуркач пронашол необично богатство во потонат брод

Белгискиот нуркач и подводен фотограф Стеф Панис открил гајба со недопрени шишиња пиво и џин во остатоците од брод што потонал во 1864 година кај Довер, во југоисточна Велика Британија; едно шише со етикета „Guinness London“ привлече меѓународно внимание, а компанијата „Гинис“ изјави дека би сакала да го испита во својата лабораторија.

Нуркачот го открил потонатиот брод „Миндоро“ на длабочина од 25 метри и внатре пронашол гајба со шишиња, меѓу кои и едно од познатиот бренд за пиво, пренесува фламанскиот радиодифузер VRT.

„Ова шише ми го привлече вниманието бидејќи, исто како шише шампањ, имаше некаков вид капаче на врвот“, изјавил Панис.

Тој истакнал дека на шишето со пиво, кое 162 години лежело на морското дно, стоела етикетата „Guinness London“ – што е особено интересен детал со оглед на тоа што пивото „Гинис“ се произведува во Ирска, а не во Лондон.

Панис објасни дека од компанијата „Гинис“ дознал оти, во времето кога потонал бродот, вообичаена практика било пивото да се транспортира во буриња до разни локации – вклучително и Лондон – за таму да се флашира и дистрибуира.

„Миндоро“, бродот во чија близина биле пронајдени шишињата со алкохол стари 162 години, бил дрвен едреник што превезувал колонијален товар на пат кон Ванкувер. Покрај остатоците од бродот, на морското дно биле пронајдени и прибор за јадење, чинии, бројни шишиња вино, пиво и џин, како и делови од пушки и воени ремени.

„Таму [во Ванкувер] бил стациониран полк на британската армија, а бродот превезувал залихи за нив. Нуркањето до остатоците од бродот е како патување низ времето, така да се каже“, рече Панис.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Димитриевски: ЗНАМ ќе положи сметка пред граѓаните, на средината на септември ќе го објавиме извештајот за работата на нашите функционери

Димитриевски најави дека ЗНАМ нема да се крие зад партиски фрази и дневнополитички оправдувања, туку ќе покаже конкретни резултати.

Димитриевски: ЗНАМ ќе положи сметка пред граѓаните, на средината на септември ќе го објавиме извештајот за работата на нашите функционери

Претседателот на Движење ЗНАМ – за Наша Македонија, Максим Димитриевски, во вечерашното гостување во „Вести плус“ на Канал 5 порача дека ЗНАМ продолжува директно и отворено да разговара со граѓаните и да покажува што значи одговорна политика, особено преку теренскиот караван кој во изминатиот период ги поврза раководството, функционерите и членството на движењето со граѓаните низ целата држава.

Димитриевски најави дека ЗНАМ нема да се крие зад партиски фрази и дневнополитички оправдувања, туку ќе покаже конкретни резултати.

„Некаде средина на септември до почетокот на октомври ќе објавиме комплетен извештај за работењето на сите наши партиски функционери во сите сегменти, во сите министерства, директорати и буквално секаде кадешто делуваме. Да знаат и нашите членови и граѓаните на Македонија што тоа функционерите на ЗНАМ имаат сработено во изминатите две години“ порача Димитриевски.

Тој нагласи дека за ЗНАМ најважно е политиката да се мери со работа и резултати, а не со анкети, политички конструкции и медиумски наративи.

„Најдоброто јавно мислење е на избори. И тоа кога и да се, ние сме подготвени“ порача претседателот на ЗНАМ.

Говорејќи за државните интереси и европската интеграција, Димитриевски беше јасен дека ЗНАМ останува на својот став дека јазикот, културата, идентитетот и историскиот континуитет на македонскиот народ не смеат да бидат предмет на политички пазарења.

Во однос на уставните измени, тој повтори дека ЗНАМ цврсто стои зад моделот на уставни измени со одложено дејство, односно нивните ефекти да настапат по полноправното членство на Македонија во Европската Унија.

„Јазик, култура, идентитет, историја, никој не смее да чепне во тоа. Што се однесува до францускиот предлог или европскиот предлог, тој за нас не е прифатлив“ истакна Димитриевски.

Тој порача дека Македонија мора да продолжи да разговара со европските партнери и да бара решение, но решение во кое државата нема повторно да биде изложена на дополнителни блокади и условувања.

Димитриевски истакна дека ЗНАМ во Владата останува коректив одвнатре, особено кога станува збор за прашања што ги засегаат државните симболи, националниот идентитет и принципите на кои се темели државноста.

Во пресрет на 35 годишнината од независноста, претседателот на ЗНАМ упати порака дека државата мора да се гради со чувство на припадност, одговорност и гордост.

„Ние како политичка гарнитура треба да ги направиме младите генерации и горди Македонци“ порача Димитриевски, додавајќи дека Македонија мора да биде држава во која сите граѓани ќе имаат еднакви права и еднаква одговорност кон нејзината иднина.

ЗНАМ ќе продолжи да комуницира директно со граѓаните и да работи за граѓаните, затоа што политиката за ЗНАМ не е работа само за избори, туку секојдневна обврска да се слушне народот, да се презентира сработеното и да се понуди решение за иднината.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер