Воените водачи на Мјанмар му забранија на адвокатот кој ја застапува соборената премиерка Аунг Сан Су Чи, да се обраќа до медиумите, дипломатите или меѓународните организации во врска со случаите против неговиот клиент, јави ДПА.
Адвокатот Хин Маунг Зау беше клучен извор на информации за тајните правни случаи кои се водат против Су Чи, која е соборена од воениот удар на 1 февруари, што предизвика насилни немири.
Тој редовно ја известуваше јавноста за напредокот на случаите, како и за здравјето на 76-годишната добитничка на Нобеловата награда за мир.
Хин Маунг Зау денеска на Фејсбук ги објави деталите од наредбата која му е наметната од страна на воената хунта.
– Комуникацијата на Хин Маунг Зау може да го вознемири и повреди секој што се однесува според законот, а исто така ќе доведе до немири и ќе го дестабилизира јавниот мир, се наведува во наредбата, обвинувајќи ги и медиумите за ширење лажни вести.
Су Чи е обвинета за низа прекршоци, вклучувајќи кршење на законот за државна тајна, закони за трговија со странство и непочитување на правилата против Ковид-19. Таа помина вкупно 15 години во домашен притвор пред да стане премиер на Мјанмар во 2016 година по одржани демократски избори.