Мицкоски: Во Македонија и во оваа Влада, САД гледаат исклучително близок пријател во регионот и во Европа - Канал 5

Мицкоски: Во Македонија и во оваа Влада, САД гледаат исклучително близок пријател во регионот и во Европа

Претседателот на Владата, Христијан Мицкоски, кој престојува во работна посета на Соединетите Американски Држави, во ексклузивно интервју за МИА од Вашингтон зборува за соработката со САД, за гасоводот и дата-центрите, како и за односите со Бугарија.

Мицкоски: Во Македонија и во оваа Влада, САД гледаат исклучително близок пријател во регионот и во Европа

Претседателот на Владата, Христијан Мицкоски, кој престојува во работна посета на Соединетите Американски Држави, во ексклузивно интервју за МИА од Вашингтон зборува за соработката со САД, за гасоводот и дата-центрите, како и за односите со Бугарија.

Во интервјуто, премиерот Мицкоски истакнува дека ние сме врвен приоритет на САД во регионот, дека апсолутно во Македонија и во оваа Влада гледаат како на близок пријател и дека разговараат за капитални проекти во енергетиката и инфраструктурата.

– Она што мене ме радува е фактот дека апсолутно во Македонија и во оваа Влада, Соединетите Американски Држави и актуелната администрација на претседателот Трамп гледаат како на близок пријател, не само во регионот туку и во Европа, и дека нивната поддршка останува непроменета – не само кога станува збор за НАТО-алијансата, туку и во делот на економијата и потенцијалните инвестиции коишто Соединетите Американски Држави ги имаат во Македонија – вели премиерот Мицкоски.

Што се однесува до односите со Бугарија, тој истакнува дека таа тема е неизбежна и секако се разговара, посебно со луѓе од Советот и Комисијата.

– Нормално дека таа тема ја разговараме. Јас не сум од оние луѓе коишто брзоплето ги прават работите во политиката. Свесен притоа за реалноста, свесен за погрешната политика во минатото од претходните влади. Од друга страна, очекувањата на некои радикални елементи во нашата структура за повлекување од меѓународни договори и преговори – тоа би било идеално доколку сме ние сами на овој свет, но не сме сами и мораме да се бориме да ги повратиме загубените позиции кои во минатото, за жал, претходната влада ги минираше – вели Мицкоски.

Тој додава дека во рамките на таа борба ние секогаш презентираме аргументи коишто се јасно методолошки разбирливи за соговорниците.

– Подготвени сме да аргументираме, подготвени сме, ако аргументите на соговорникот ги совладаат нашите аргументи, да ги прифатиме. Не се инаетиме, не сме тврдоглави. Но, она што претставува наша цел е нашата стратегија, нашата вистина да ја презентираме на најдобар начин на којшто можеме и преку една политичка дебата, една политичка борба на меѓународната сцена да вратиме дел од позициите коишто претходните влади ни ги загубија – истакнува премиерот Мицкоски.

Во однос на дата-центрите, вели дека економијата неповратно се менува, истакнувајќи дека мораме да градиме податочни центри со високи стандарди, со воздушно и фреонско ладење. А што се однесува до гасоводот – ќе имаме 12 пати зголемен капацитет за инвестиции, за гасни централи коишто би произведувале електрична енергија, којашто потоа би се користела во некои податочни дата-центри, а потоа од нив би црпеле можности за вештачка интелигенција. Се бара инвеститор и за Чебрен и Галиште и веќе е разговарано во ДФЦ со Каролајн Вик, а интересот е огромен.

Премиере Мицкоски, во Вашингтон имавте средби со повеќе конгресмени, кои во пресрет на вашата посета организираа дебата со претставници на Стејт департментот на тема Балкан. На таа дебата повеќето држави беа оценувани во контекст на националистичките тензии, славењето воени злосторници, додека Македонија беше издвоена, со позитивни дискусии за изградбата на стратешки важната инфраструктура и воената соработка. Како Вие ја оценувате соработката со САД, со администрацијата на Трамп и нивната политика кон нас и кон регионот?

– Не само со овие соговорници, посетата ја искористивме за средби со различни структури во Вашингтон, со тинк-тенкови, финансиски корпорации, за уште еднаш да ја потврдиме нашата определба и исто така да го потврдиме стратешкото партнерство кое го имаме како земја со Соединетите Американски Држави. Она што мене ме радува е фактот дека апсолутно во Македонија и во оваа Влада, Соединетите Американски Држави и актуелната администрација на претседателот Трамп гледаат како на близок пријател, не само во регионот, туку и во Европа. Нивната поддршка кон нас останува непроменета не само кога станува збор за НАТО-алијансата, туку и во делот на економијата и потенцијалните инвестиции коишто Соединетите Американски Држави ги имаат во Македонија. Тука посебно би го издвоил пристапот со ДФЦ, финансиската корпорација за развој, каде што имав средба со Каролајн Вик, која е практично одговорна за развој и инвестиции низ светот. Финансиското портфолио е околу 200 милијарди долари. Разговаравме за можно финансирање на Чебрен и Галиште, разговаравме и за друг тип инфраструктурни, енергетски и податочни инвестиции што би ги правела Владата, а исто така и за приватни инвестиции коишто би дошле од Америка во Македонија. Така што, кога сето ова би се изанализирало, јас не би дал суд за фокусот и низ која оптика регионот го гледа администрацијата на претседателот Трамп, туку повеќе би се задржал низ која оптика ја гледа Македонија. Мислам дека ја гледа низ најблиска оптика, дека сме врвен приоритет во регионот и ценам дека во годините коишто следат, од ова стратешко партнерство ќе се изнедрат многу капитални проекти коишто ќе имаат историско значење.

Една таква иницијатива е веќе најавена – рудникот за антимон во Крива Паланка.

Таму се присутни во делот на ПД-грантирање од пет милиони долари, за развој на проектот во Крстов Дол, во местото Луке, Паланечко, но тоа е само почеток. Велам дека врз основа на оној разговор што го имав во ДФЦ со Каролајн Вик, интересот е огромен. Наша цел како Влада е да обезбедиме финансирање на проектот Чебрен и Галиште. Од нивна страна има интерес, истиот проект беше презентиран, задолживме канал за комуникација меѓу Владата и ДФЦ, и тоа е добро. Кога станува збор за стратешката и критичната инфраструктура, тука се гасоводите коишто ги градиме, тука се автопатите – Коридорот 8 и Коридорот 10д, пругата којашто ќе биде модернизирана, а е дел од Коридорот 10, и пругата којашто ја градиме, а е дел од Коридорот 8.

Американската страна е доста заинтересирана за гасоводот со кој САД би станале сериозен снабдувач на регионот со ЛНГ (втечнет гас). Каква би била нашата геополитичка положба како земја низ која за првпат поминува гасовод за снабдување на други држави и какви капацитети и индустрии може да се развиваат врз база на овој гасовод?

– Треба поблиску во јавноста да се објасни што е целта на тој гасовод. Треба терминалот за втечнет природен гас, познат како ЛНГ-терминал во Грција (Александрополи), да го поврземе со Централна Европа, за да биде конкуренција на Јужниот тек. Капацитетот е некаде околу три милијарди метри кубни, а ако се зголеми притисокот, може да дојде и до шест милијарди. Она што го прави специфичен е тоа што гасоводот е двонасочен. Ние досега како држава имавме само еден односочен влез – Жидилово – со капацитет од некаде околу 800 милиони метри кубни, или милијарда и 200 милиони со зголемен притисок. Што значи дека капацитетот на гас којшто би можеле утре да го користиме во Македонија со изградбата на овој гасовод е драматично зголемен. Но, за да бидеме на рутата на транзит, што е практично и наша цел и амбиција, ние мораме да го завршиме и северниот интерконектор со кој ќе се поврземе со соседна Србија. И тој ќе биде двосмерен, така што кога ќе ги завршиме овие два проекта, што јас очекувам да биде на крајот на 2028 година, геостратешката положба на земјата ќе биде сосема поинаква.

Во овој момент ние како држава консумираме околу половина милијарда метри кубни годишно. Значи, ќе имаме 12 пати зголемен капацитет за инвестиции, за гасни централи коишто би произведувале електрична енергија, којашто потоа би се користела во некои податочни дата-центри, а потоа од нив би црпеле можности за вештачка интелигенција. Тоа е еден сериозен план за развој на државата и каде би требало да се движи Македонија во иднина.

Тесно грло се високонапонските мрежи за пренос на електрична енергија. Ние сме одлично поврзани со нашиот северен и јужен сосед со далноводи на 400-киловотно напонско ниво. Одлично сме поврзани и со нашиот источен сосед – еден 400-киловолен далновод и два паралелни 110-киловолтни далноводи, а сега го градиме проектот со којшто ќе се поврземе со нашиот западен сосед, повторно со 400-киловолен далновод. Со тоа ќе бидеме буквално енергетска крстосница кога станува збор за преносот на висок напон на електрична енергија. Сите овие проекти се критична инфраструктура. Сите овие проекти ја зголемуваат отпорноста во регионот, безбедноста и се многу значајни за источното крило на НАТО. Ние како држава можеме да ја искористиме нашата сега веќе посилна геостратешка положба и од сето ова да извлечеме корист за граѓаните, и економски побргу да се развиваме. Тоа е суштината и тоа е приоритетот на оваа Влада.

Ги спомнавте податочните (дата) центри. Има и критики во Македонија дека центрите многу предизвикувале бучава, трошеле вода. Спомнавте неодамна дека сте во разговори за развој на вакви центри со компанијата „Рамбл“ на Крис Павловски, која неодамна склучи голем договор во АИ-индустријата. Дали сте во разговор и со други компании и што би можеле локалните заедници и економијата во целина да очекуваат од изградбата на овие центри?

– Тоа е процес кој е неповратен. Човештвото ќе се движи во таа насока. Секој којшто има дилема тука, не ѝ мисли добро на сопствената држава. Прашањето е како да го канализираме овој процес и да извлечеме максимум од него. Го спомнавте Крис Павловски и „Рамбл“ – тие сега направија аквизиција, купија компанија во Германија и сега се компанија од околу пет милијарди долари. Тоа е една сериозна групација која сериозно се развива. Да, разговараме со него. Меѓу другото, имаме уште пет други компании со коишто разговараме. Сите кои не се разбираат во високата технологија зборуваат за бучава, за водено ладење. Ние сега имаме и воздушно ладење и фреонско ладење, така што жалам што сѐ уште кај нас постојат и такви политички сили и елементи коишто се обидуваат да нѐ вратат повторно во некои времиња од XIX или почетокот на XX век, мислејќи дека на тој начин, по пат на емоција, ќе привлечат внимание. Но, мислам дека се политички губитници и ќе бидат поразени, бидејќи македонските граѓани сакаат да ја видат државата како оди напред. Оваа Влада има јасен план којшто може да го објасни на една страница. Во животот, во политиката, најважно е тоа што можете да го кажете со малку зборови, што можете едноставно да го објасните, за луѓето да ве разберат. Што е главната цел на оваа Влада? Економски развој којшто ќе се темели на три столба: Инфраструктура – патна и железничка. Енергетска инфраструктура, производни капацитети и преносни системи. Висока технологија, меѓу која се и податочните дата-центри, но и диверсификација на преработувачката индустрија, бидејќи најголем дел од нашите инвеститори кои се дојдени од странство во периодот 2008–2012 година се во автомобилската индустрија. Таму работите се менуваат и работиме на диверсификација на ова портфолио. Ова е практично стратегијата на оваа Влада и сѐ што правиме и работиме е во таа насока – како економски да го забрзаме развојот. Затоа што трудоинтензивната индустрија ние веќе нема да можеме да ја сервисираме во иднина, имаме сѐ помалку работна сила. На нас ни треба високотехнолошка индустрија, со голема додадена вредност, со којашто ќе го зголемиме бруто-домашниот производ и ќе го зголемуваме стандардот на граѓаните. Овој процес нема да биде за еден мандат. Ова е процес којшто треба да трае 2-3-4 мандати. Не велам дека оваа Влада ќе биде толку долго, ниту пак јас пледирам да бидам претседател на Владата толку долго. Но, во суштина, ова треба да биде национална стратегија за тоа како треба да се развива државата. Овој процес е неповратен. Човештвото оди натаму и, впрочем, ние денес без вештачка интелигенција и некои податочни центри коишто некаде функционираат веќе не можеме да направиме ниту телефонски повик преку мобилен телефон.

Дали Владата би можела да гарантира дека овие центри за кои се разговара би биле од нов вид, со затворен круг на разладување кои не трошат много вода?

– Апсолутно.

За да функционираат овие економски стратегии, потребни се договори за трговија. Има ли нешто ново на тој план со САД?

– Ние рамката ја дефиниравме. Условите се поставени, останува уште формално потпишување меѓу нашето МНР и нивниот трговски претставник и нивната Влада. Рамката е договорена, условите веќе функционираат. Ние имаме навистина најдобри услови во регионот.

Од опозицијата има критики за одлуката за намалување на дел од воената помош за четири држави од Европа, меѓу кои сме и ние, и за Јужна и Средна Америка. Колку е тоа значајно според Вас?

– Ние сме еден од најголемите корисници на воена помош од Соединетите Американски Држави. Оваа одлука има друг мотив, за којшто јас, нормално, сега не би зборувал. Но, нашата соработка во рамките на воената индустрија и помошта што ја добиваме од САД останува и ќе се продлабочува.

Добар дел од Вашата дискусија во Атлантскиот совет во Вашингтон беше на темата Бугарија. Дали во Њујорк се очекуваат одредени средби и разговори на тој план?

– Секако, кога разговараме со нашите европски партнери, посебно со луѓето од Советот и Комисијата, со претседателот Кошта, со високата претставничка за надворешна и одбранбена политика, Каја Калас, имаме и регионални настани на кои ќе учествувам и јас во делот на мултилатералата, таа тема е неизбежна. Нормално дека таа тема ја разговараме. Јас не сум од оние луѓе коишто брзоплето ги прават работите во политиката. Свесен притоа за реалноста, свесен за погрешната политика во минатото од претходните влади. Од друга страна, очекувањата на некои радикални елементи во нашата структура за повлекување од меѓународни договори и преговори – тоа би било идеално доколку сме ние сами на овој свет, но не сме сами и мораме да се бориме да ги повратиме загубените позиции кои во минатото, за жал, претходната влада ги минираше.

Така што, во рамките на таа борба ние секогаш презентираме аргументи коишто се јасно методолошки разбирливи за соговорниците. Подготвени сме да аргументираме, подготвени сме, ако аргументите на соговорникот ги совладаат нашите аргументи, да ги прифатиме. Не се инаетиме, не сме тврдоглави. Но, она што претставува наша цел е нашата стратегија, нашата вистина да ја презентираме на најдобар начин на којшто можеме и преку една политичка дебата, една политичка борба на меѓународната сцена да вратиме дел од позициите коишто претходните влади ни ги загубија.

Мислам дека привлекуваме внимание и веќе сме во сериозна оптика на нашите партнери, посебно во Европа. Бараме решенија. Јас никогаш нема да влезам во процес без да имам предвидлив крај. По мене, за да дојдеме до еден таков процес, најпрвин треба да изградиме доверба, а за тоа треба да разговараме. Треба таа желба да постои и од двете страни – ова е двонасочна улица, не може само од едната страна. Ќе го водиме процесот паралелно, подготвени сме да разговараме за усогласување на акцискиот план за малцинства, се разбира во присуство на меѓународната заедница, бидејќи ако водиме дијалог само со нашиот источен сосед, тогаш се потврдува она што ние го велиме – дека е билатерално прашање. Се плашам дека таков дијалог е дијалог на луѓе кои можеби нема да успеат да се слушнат на вистински начин. Затоа ценам дека е потребно да имаме уште еден на масата. Еве, тоа нека биде претставник можеби од страна на Европската Унија.

Продолжуваме да ги испорачуваме реформите коишто се дел од Планот за раст, од Реформската агенда. Го следиме развојот на настаните во Европа на политичката сцена – еве, последно референдумот во Исланд, регионалните избори во Германија, претседателските избори коишто доаѓаат во Франција... Динамично е, секаде во светот е динамично. Ние мораме во овие предизвици да ја најдеме и нашата шанса и тоа го правиме. Впрочем, ја бараме шансата и сите оние резултати коишто пристигнуваат – 4,3 проценти раст на БДП во вториот квартал, раст на индустриското производство, раст на туризмот, контролирана инфлација два до два и пол проценти пониска од нивото што е во Европската Унија – сѐ се тоа индикатори дека по овие 26–27 месеци, колку што работиме како Влада, конечно доаѓаат резултати и од еден длабок минус, од една тотално распадната, понижена, ограбена, омаловажена држава, ние доаѓаме до состојба на нула. Јас не можам да кажам дека сме не знам колку отидени нагоре, но сме на една состојба на нула од којашто треба да почнеме да градиме нагоре.

Деновиве имаше најава за некаков вид асоцијативно членство во ЕУ дури и за Канада, какво што претходно го покренаа Вучиќ и Рама. Некои зборуваат и за Шкотска, Велс.

– Јас не би навлегувал сега во таков тип дискусија. Тоа е сѐ само како брејнсторминг, размена на идеи. За нешто да влезе, да профункционира, тоа подразбира промена на договорот што го има самата ЕУ. Светот дефинитивно се менува, и тоа се менува со голема брзина. Се репозиционираат интересите и јас ценам дека во еден таков мултиполарен свет ние, повторно ќе кажам, како релативно малубројна земја, не многу значајна имајќи ја предвид големината како територија – но како локација значајна, посебно во овој дел од светот – треба да ја најдеме нашата шанса. И мислам дека ја пронаоѓаме.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

„Највалканиот човек на светот“ не се избањал над 50 години- неговата смрт останува мистерија (ВИДЕО)

Аму Хаџи, ирански пустиник кој некогаш беше наречен „највалканиот човек на светот“ од страна на медиумите, одбивал да се бања со децении, верувајќи дека водата и сапунот можат да му наштетат на здравјето.

„Највалканиот човек на светот“ не се избањал над 50 години- неговата смрт останува мистерија (ВИДЕО)

Живеел во исклучително необични услови, а некои од неговите навики биле толку необични што го привлекле вниманието на лекарите и истражувачите, објавува Дејли Стар.

Резултат од траумата од неговата младост

И покрај сè, тој живеел до 94 години. Починал во октомври 2022 година, неколку месеци откако конечно се согласил да се бања по повеќе од половина век. Сепак, нема докази дека овој конкретен настан имал каква било врска со неговата смрт.

Хаџи живеел во близина на селото Деџга, во покраината Фарс. Според неговите изјави, неговиот живот во изолација започнал по низа емоционални разочарувања што ги доживеал во младоста. Тој зборувал за овие искуства во интервју за Техеран Тајмс, објавено во јануари 2014 година.

После тоа, се повлекол од општеството и почнал да живее како пустиник. На почетокот, спиел во дупка што ја ископал, а подоцна селаните му изградиле едноставно засолниште од тули. Селаните се обиделе да му помогнат, нудејќи му храна, засолниште и хигиенски производи, но тој генерално одбивал таква помош.

YouTube video

Според медиумските извештаи, Хаџи верувал дека може да се разболи од сапун и вода. Исто така, не му се допаѓало вниманието што го добивал поради неговиот начин на живот, а обидите на другите луѓе да го променат наводно го правеле тажен.

За да преживее, главно се потпирал на она што можел да го најде во околината. Според неговите изјави и сведоштва објавени во медиумите, јадел месо од мртви животни, вклучувајќи ги и остатоците што ги нашол покрај патот. Особено сакал месо од еж.

Се вели дека пиел вода од 'рѓосан сад што претходно се користел за складирање моторно масло, како и од барички што ги нашол во областа. Медиумските извештаи велат дека пиел до пет литри вода дневно, иако ова не е независно потврдено.

Тој добил меѓународно внимание во 2014 година.

Неговите навики за пушење биле исто така необични. Мештаните често му давале тутун како подароци, а некои видеа го прикажуваат како пуши по неколку цигари одеднаш. Кога немал тутун, наводно ставал сушен животински измет во лулето.

Не ја сечел косата на вообичаен начин. Кога станала предолга и почнала да го мачи, ја скратувал со горење на вишокот на оган.

Хаџи добил меѓународно внимание во 2014 година, кога „Техеран тајмс“ објавил сторија за неговиот живот. Деталите ги заинтересирале и експертите кои сакале да испитаат како неговото тело реагирало на децениите живот во екстремно нехигиенски услови.

Според медиумските извештаи, тимот на лекари го водел д-р Голамреза Молави, паразитолог на Универзитетот за медицински науки во Техеран. Лекарите извршиле низа тестови, вклучувајќи тестови за различни видови хепатитис, ХИВ и паразитски инфекции.

Резултатите, според истите извештаи, биле изненадувачки. Според извештаите, не се пронајдени посериозни инфекции што ги очекувале експертите, но е регистрирана трихиноза, паразитска инфекција што може да се пренесе со јадење сурово или недоволно зготвено месо.

Д-р Молави, според истите извештаи, верувал дека живеењето во сурови услови со години можеби придонело за развој на силен имунолошки одговор. Сепак, ова не значи дека неговиот начин на живот бил здрав или дека избегнувањето на хигиената го зајакнало телото на Хаџи.

Бројни шпекулации за смртта

Со години, мештаните се обидувале да го убедат Хаџи да се избања, но тој упорно одбивал. Според еден медиумски извештај, за време на претходен обид да го однесат до реката, сфатил што прават и скокнал од возилото.

Сепак, во одреден момент се предомислил. Медиумските извештаи наведуваат дека неколку месеци пред неговата смрт, селаните конечно го убедиле да оди во бањата и да се измие. Според извештаите, тоа било неговото прво капење по повеќе од половина век.

По капењето, неговата кожа наводно била покриена со слоеви саѓи и гној што се насобрале поради многу години занемарување на хигиената.

Кратко потоа, Хаџи се разболел, а неговото здравје се влошило во следниот период. Починал на 23 октомври 2022 година, на 94-годишна возраст, во селото Дежгах.

Фактот дека Хаџи починал неколку месеци по првото капење предизвика многу шпекулации за можна поврзаност помеѓу двата настани. Некои медиуми и корисници на социјалните мрежи сугерираат дека отстранувањето на нечистотијата од неговата кожа можеби го нарушило неговиот имунолошки систем и така настанала мистеријата за неговата смрт.

Сепак, нема сигурни медицински докази за таквото тврдење.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Се сеќавате ли на победничката на Евросонг, Кончита Вурст- сега тврди дека е хетеросексуален маж (ВИДЕО)

„Јас сум хетеросексуален маж“, се пошегува Том Нојвирт, кој победи на Евросонг 2014 како Кончита Вурст. 

Се сеќавате ли на победничката на Евросонг, Кончита Вурст- сега тврди дека е хетеросексуален маж (ВИДЕО)

Во подкастот „Bussi Blabla“, кој го води со музичарот Џеј Џеј, тој зборуваше за тоа како се обидува да се искупи кога нешто тргнува наопаку во врската - купува подарок, објавува Heute.

Нојвирт, како и Кончита Вурст, стана меѓународно препознатливо лице на ЛГБТК заедницата откако победи на Евровизискиот натпревар за песна. Неговиот победнички извик „Ние сме незапирливи“ многумина го протолкуваа како порака против хомофобијата и политичкиот прогон на квир луѓето во некои земји.

„Еве, двајца сме“

Во подкастот, Нојвирт си поигра со стереотипот дека хетеросексуалните мажи купуваат подароци за своите партнерки кога ќе згрешат или кога сакаат да се поправат. Кога Нојвирт рече дека е стрејт маж, Џеј Џеј ја стави раката пред лицето и се пошегува: „Еве, двајца сме“.

„Мислам дека е човечко, нели? Сакаш некако да го поправиш“, додаде Џеј Џеј. Во исто време, тој рече дека мажите во такви ситуации веројатно почесто посегнуваат по подарок. „Сега сум стрејт маж“, повтори Нојвирт на крајот од разговорот. Шегата ги насмеа и следбениците, кои оставија емотикони плачејќи од смеа под видеото на Инстаграм.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Прв пат во историјата- Гутереш наскоро заминува, нема кој да застане на чело на Обединетите нации

Обединетите нации се соочуваат со невидена ситуација - може да останат без генерален секретар, со помалку од два месеци до крајот на мандатот на Антонио Гутереш, а сè уште не е постигнат договор за неговиот наследник.

Прв пат во историјата- Гутереш наскоро заминува, нема кој да застане на чело на Обединетите нации

Се очекува Советот за безбедност на Обединетите нации оваа недела да одржи уште едно гласање зад затворени врати за избор на нов шеф на ОН, но дури и по осум круга гласање, петте постојани членки со право на вето не успеаја да се договорат за наследник.

Службениците се зафатени со подготовка на резервни планови во случај да нема никој да ја води светската организација на 31 декември, кога Гутереш ќе ја напушти функцијата.

Неуспехот да се избере наследник, велат аналитичарите, е делумно последица на долгиот и нетранспарентен изборен процес, базиран на тајни гласања, што најдобро ја илустрира бавноста и блокадите што идниот генерален секретар треба да ги отстрани.

На Советот за безбедност му беа потребни шест круга гласање за да го избере Гутереш во 2016 година.

Уште поважно, велат набљудувачите, застојот покажува дека силите со право на вето се сè повеќе неподготвени за компромис, ситуација влошена од американската администрација што сè повеќе ја заобиколува ОН и е преокупирана со сопствените ангажмани во надворешната политика.

„Загрижувачки е колку далеку сме во годината и што тоа значи за формирањето на тимот. Со оглед на тоа колку рано започна сè, не треба да бидеме во оваа ситуација“, изјави за Ројтерс Шамала Кандија Томпсон, извршен директор на Извештајот на Советот за безбедност, тинк-тенк што ја следи работата на Советот за безбедност.

Гринспен и Нусибех меѓу кандидатите

Кандидатите се претежно долгогодишни инсајдери во ОН и личности кои или немаат многу меѓународно признание, како што е фаворитот Ребека Гринспен, или се соочуваат со отпор поради контроверзии поврзани со нивните земји.

Таков е случајот со високата дипломатка на Обединетите Арапски Емирати, Лана Нусибех, која беше критикувана за поддршката на нејзината земја за паравоените Сили за брза поддршка (RSF) во граѓанската војна во Судан.

ОАЕ ги негира овие обвинувања.

Кој и да победи ќе наследи организација која се соочува со огромни проблеми: војни во кои имаше ограничено влијание, пад на финансиските придонеси на САД, пад на политичкото значење поради повлекувањето на Вашингтон од десетици агенции на ОН и растечки притисок организацијата да се направи помала, поефикасна и поодговорна.

Ричард Гован, експерт на ОН во Меѓународната кризна група, организација за спречување на конфликти, рече дека завршувањето на годината без избран генерален секретар за 2027 година би било „исклучително непријатно за овластувањата за вето“.

Според него, таквото сценарио би им обезбедило дополнителни аргументи на многу земји-членки на ОН кои веруваат дека петте постојани членки на Советот за безбедност повеќе немаат легитимитет да управуваат со организацијата.

Петте постојани членки, познати како П5, беа избрани како победници во Втората светска војна во 1945 година.

Другите 10 членови на Советот за безбедност се избираат за двегодишен мандат, на регионална основа.

Постојаните членки - Велика Британија, Кина, Франција, Русија и САД - долго време се спротивставуваа на промените во структурата на организацијата, за кои многу земји-членки веруваат дека повеќе не ја одразуваат реалната геополитичка ситуација во светот.

Повелбата на Обединетите нации не предвидува како да се постапи во случај на слободно место на функцијата генерален секретар. Досега, мандатот на генералниот секретар никогаш не истекол без да се избере наследник.

Во септемврискиот извештај, објавен од кампањата „1 за 8 милијарди“, која се залага за потранспарентен изборен процес, беа наведени можни опции, од назначување на вршител на должноста генерален секретар на Генералното собрание од страна на Советот за безбедност, независно продолжување на мандатот на сегашниот генерален секретар.

Секоја од овие опции се соочува со пречки, се вели во извештајот, но оставањето на ОН без лидер би било „крајно неодговорно“.

Портпаролот на ОН одби да коментира за ситуацијата.

Тајно гласање

Во ерата на вештачката интелигенција и социјалните медиуми, процесот на избор на генерален секретар стана реликт од минатото.

Кандидатите со месеци лобираат кај членовите на Советот за безбедност за да ја добијат поддршката од нивните влади. Потоа тие поминуваат низ серија неформални тајни гласања, на кои членовите можат да гласаат „поддршка“, „неподдршка“ или „воздржано“.

Резултатите не се објавуваат јавно, но брзо се објавуваат во јавноста.

Членовите исто така можат да организираат гласачки ливчиња со различни обоени ливчиња, при што постојаните членови гласаат со црвени ливчиња, откривајќи ја позицијата на земјите што навистина имаат најголема моќ во Советот.

Откако ќе се идентификува фаворит, Советот за безбедност гласа за резолуција со која се препорачува тој кандидат до Генералното собрание на ОН.

За да се усвои резолуција, потребни се најмалку девет од 15 гласови, под услов ниедна постојана членка да не стави вето.

Генералното собрание, кое има 193 земји-членки, потоа формално го назначува генералниот секретар. Никогаш не отфрлило кандидат номиниран од Советот за безбедност.

Советот за безбедност не ги објавува причините за одлучување за времето и форматот на гласањето, ниту пак открива како гласале поединечните држави, иако јавноста ја финансира работата на Обединетите нации.

„Дали е ова рационален начин да се избере врвен дипломат во светот? Апсолутно не“, рече Гован.

Сепак, тој верува дека неуредниот и нетранспарентен процес може да биде цената што мора да се плати за да се добие лице кое ќе ја води организацијата и кое големите сили всушност ќе го слушаат.

Критичарите веруваат дека Гутереш нема такво влијание, бидејќи ја изгубил довербата и на Вашингтон и на Москва.

ОН без никого на чело

Русија е една од ретките членки што јавно коментираше за рокот за избор на нов генерален секретар.

„Исто така, не е јасно што ќе се случи по 31 декември“, рече Кирил Логинов, висок функционер во руското Министерство за надворешни работи.

Тој рече дека опциите што се разгледуваат вклучуваат привремено продолжување на мандатот на Гутереш или назначување на друг функционер.

„Колку што можам да видам, на 1 јануари, ако нема генерален секретар, нема да има никој надлежен“, рече Даниел Сафран-Хон, поранешен функционер на ОН.

Тој објасни дека основното функционирање на организацијата ќе продолжи, дека светлата ќе останат вклучени и дека Советот за безбедност и Генералното собрание би можеле да продолжат да се состануваат, барем за некое време.

„Но, малку е како капетанот да умре на супертанкер: првиот офицер може да направи многу, но има одредени работи што не може да ги направи. Не можете да назначувате на највисоките позиции. Не можете да го усвоите буџетот“, објасни тој.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер