Мицкоски: Владата со нови вонредни мерки, се намалуваат акцизите на горивата, спречен нов раст - Канал 5

Македонија

Мицкоски: Владата со нови вонредни мерки, се намалуваат акцизите на горивата, спречен нов раст

Прес-конференција на претседателот на Владата, Христијан Мицкоски.

Мицкоски: Владата со нови вонредни мерки, се намалуваат акцизите на горивата, спречен нов раст

„Почитувани претставници на медиумите,

Почитувани граѓани,

Денес не се обраќам само како претседател на Владата, туку како човек кој длабоко ја разбира загриженоста што секој од вас ја чувствува во овие неизвесни времиња.

Светот повторно се соочува со сериозна криза. Настаните и воените тензии на Блискиот Исток предизвикаа сериозни потреси на глобалните пазари, особено во енергетскиот сектор. Цените на нафтата растат, неизвесноста се зголемува, а притисокот врз економиите – и големите и малите – станува сè посилен.

Ние како држава не можеме да бидеме изолирани од тие процеси. Ние сме дел од светот, дел од европскиот економски систем, и секоја глобална промена директно се одразува врз животот на нашите граѓани.

Но, она што нè разликува е начинот на кој реагираме.

Владата не чека кризата да нè прегази. Владата делува.

Претходно донесовме одлука за намалување на ДДВ од 18 на 10 проценти со што спречивме голем, жесток ценовен шок. Македонија плаќа најевтини бензини во регионот. Но нашите информации, анализи говорат дека е потребно повторно да се реагира.

Затоа денес донесовме имавме вонредна, итна седница на Владата каде донесовме неколку конкретни и одговорни одлуки и би сакал за тие одлуки да ја запознам македонската јавност.

Прво бидејќи поминаа оние две недели од како беше намалена стапката од ДДВ од 18 на 10 проценти сакам да ја информирам јавноста дека ја продолжуваме до крајот на кризната состојба којашто отприлика околу 20 април треба да истече, значи продолжуваме намалената стапка на ДДВ од 18 на 10 проценти, истовремено донесовме одлука со којашто се овозможува намалување на акцизите на дизелот за 4 денари, а за безоловните бензини 95 и 98 октански за 2 денари по литар со што драматично ќе се почувствува кај цените на бензините и на дизелот со што практично покажуваме и докажуваме дека се бориме да го зачуваме стандардот на граѓаните.

Доколку не се случеше ова намалување на акцизата тогаш литар дизел ќе беше отприлика 102 денари, можеби и над 102 денари така велат нашите калкулации, бидејќи берзата се затвори во четврток поради Велигденските празници и ќе се рестартира во вторник, а безоловните бензини 95 и 98 октански ќе беше поголем за 1,5 до 2 денари. Со ова намалување исто така ние имаме практично цена којашто ќе бидат минусирани 4 денари кај дизелот за литар, односно 2 денари кај безоловните бензини 95 и 98 октански.

Исто така дозволете ми да ја информирам македонската јавност дека во текот на претпладневните часови имавме долга дискусија и преговори со „ОКТА“. Тие својот попуст ќе го продолжат до крајот на месец април што значи дека за дизелот во овој момент имаме попуст од 3 денари по литар, а за безоловните бензини 95 и 98 октански ќе имаме дополнителни 2 денари за литар, или кога сето ова ќе се собере или сето ова ќе се изанализира тогаш доаѓаме до цена којашто за дизелот ќе биде иста како и до сега практично доколку се калкулира попустот од 4 денари за акцизата и 3 денари коишто го добиваме од „ОКТА“, така што оние 7 денари потенцијално зголемување по литар ги амортизираме, додека пак кај безоловните бензини 95 и 98 октански покрај оние 2 денари акциза по литар ќе имаме дополнителни 2 денари по литар намалување, односно ќе бидеме во минус од цената којашто беше во изминатиов регулиран период, односно изминатата недела. Со ова уште еднаш покажуваме дека се грижиме за стандардот на граѓаните и дека тој ни е најважен приоритет во овој момент.

Исто така дозволете ми да ве информирам дека минатата недела веќе конзумот, односно потрошувачката достигнала до рекордни 2.000.000 литри на ден.

Имаме жесток притисок на северната, јужната и западната граница каде што потрошувачката на одредени бензински пумпи е и триплирана, што значи дека граѓаните на соседните држави доаѓаат кај нас да ги полнат резервоарите и да ги користат услугите на бензинските пумпи.

Во овој момент немаме потреба од било какво ограничување бидејќи во разговор со трговците и со снабдувачот добив уверување дека нема опасност од тоа да бидат загрозени домашните потрошувачи и покрај тоа што од 1.500.000 конзумот е зголемен на 2.000.000 литри на ден и се надевам дека и така и ќе остане, односно се надевам дека сето ова што се случува во заливот ќе престане и дека состојбата во светот ќе се нормализира, односно режимот во Иран ќе престане да ја опструира природното право на трговија на земјите од заливот и навремено снабдување на останатите потрошувачи со нафтата и нафтените деривати од заливот.

Така што еве уште еднаш сакам да кажам дека како држава до овој момент се справуваме онака како што очекуваат граѓаните од нас, не сме реактивни туку сме проактивни, носиме мерки, ја следиме ситуацијата, предизвици има на дневна основа и тие се решаваат, но доколку има предизвици од поголеми размери тогаш се разбира дека ќе носиме уште поинакви мерки.

Имаме план и би сакал да ги уверам граѓаните дека нема потреба во овој момент од загриженост, користиме најниска цена на горивата во регионот, па и во Европа.

Ние сме тие коишто рефлектираат стабилност, количините се обезбедени, не треба граѓаните и бизнисот да стравуваат од количини на нафта и нафтени деривати, односно дизел гориво и безоловните бензини, така што во овој момент состојбата е стабилна, планот е јасен, имаме стратегија и продолжуваме со таа стратегија.

Почитувани,

Со оваа одлука испраќаме јасна порака – нема да дозволиме товарот од глобалната криза да падне врз плеќите на граѓаните.

Свесни сме дека цената на горивата не е само бројка на бензинска пумпа. Таа е дел од секој производ, од секоја услуга, од секој трошок во едно домаќинство. Таа влијае на транспортот, на храната, на економијата во целина.

Затоа нашата реакција е навремена, одмерена и насочена кон заштита на стандардот.

Почитувани граѓани,

Ова не е првпат да се соочуваме со предизвици. И нема да биде последен. Но секој пат кога сме биле ставени на испит, сме покажале дека знаеме да носиме одлуки во интерес на граѓаните.

Продолжуваме будно да ја следиме состојбата. Во постојана координација сме со сите релевантни институции, со енергетскиот сектор, со стопанството. Подготвени сме да преземеме и дополнителни мерки доколку тоа биде потребно.

Нашата цел е јасна – стабилност, сигурност и заштита на стандардот на граѓаните.

Во време кога некои зборуваат, ние работиме. Во време кога некои создаваат страв, ние се обидуваме да се бориме со предизвиците и истите да ги решаваме.

Затоа што ова е Влада која не бега од одговорност. Ова е Влада која стои рамо до рамо со својот народ.

И ќе продолжиме така да функционираме.“

YouTube video

Тагови: Христијан Мицкоски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Хакери ги објавија податоците на над 40.000 вработени во Министерството за внатрешна безбедност на САД

Антифашистичките активисти кои се спротивставуваат на администрацијата на американскиот претседател Доналд Трамп тврдат дека го хакирале Министерството за внатрешна безбедност на САД .

Хакери ги објавија податоците на над 40.000 вработени во Министерството за внатрешна безбедност на САД

Антифашистичките активисти кои се спротивставуваат на администрацијата на американскиот претседател Доналд Трамп тврдат дека го хакирале Министерството за внатрешна безбедност на САД (DHS) и објавиле база на податоци со имиња и официјални контакти на повеќе од 40.000 вработени во агенцијата, објави NBC.

Базата на податоци е објавена од непрофитната организација „Дистрибуирано негирање на тајни“ (DDoSecrets), наведувајќи дека податоците се обезбедени од хакерска група која се нарекува себеси Министерство за мир.

Меѓу нив има информации за 6.598 вработени во Службата за имиграција и царина (ICE), вклучувајќи неколку агенти за кои се вели дека работат на тајни мисии.

Анализата на NBC покажа дека базата на податоци содржи официјални е-адреси, телефонски броеви, локации и работни места, а новинарите ја потврдија точноста на некои од податоците.

Иако не се пронајдени приватни информации, објавувањето на идентитетот на вработените може да ја загрози нивната безбедност. Хакерите и DDoSecrets изјавија дека објавувањето на податоците е форма на протест против DHS и неговите операции за депортација.

Одделот не одговори на барањето за коментар. Според NBC, администрацијата на американскиот претседател Доналд Трамп била цел на повеќекратни хакерски напади во последните месеци. Коосновачката на DDoSecrets, Ема Бест, изјави дека организацијата подготвила планови за непредвидени ситуации поради чувствителноста на објавениот материјал.

Тагови: хакери

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Татко на две девојчиња се удави во брановите во обид да спаси галеб

Храбар и добродушен Американец кој се обидел да спаси галеб заплеткан во рибарски конец се удавил откако бил преплавен од силни бранови.

Татко на две девојчиња се удави во брановите во обид да спаси галеб

Вилијам Ромберг (31) починал во неделата во водите во близина на неговиот дом во Лагуна Бич, на брегот на Флорида, објавува Дејли Меил.

Тој бил однесен од струите

Ромберг ловел риба во Мексиканскиот Залив кога еден галеб се заплеткал во неговиот рибарски конец, според веб-страницата за собирање средства што ја поставиле неговите најблиски.

Кога ја забележал птицата во неволја, решил да доплива до неа и да се обиде да ја ослободи. Сепак, за време на обидот за спасување, јадицата и галебот му се заплеткале во раката, што ја отежнало ситуацијата уште повеќе.

Ромберг се обидел да доплива до брегот, но струите постојано го носеле сè подалеку и подалеку. Исцрпен од пливањето и обидите да ѝ помогне на птицата, не можел да се врати на безбедно и се удавил.

Тој го преживеа неговата сопруга, Тејлор, и двете ќерки, Хедли, 3, и Лејни, 1.

Ромберг работеше како менаџер на плажа на плажата Каријон за „Ла Долче Вита“. Неговите работодавци се збогуваа со емотивна порака, истакнувајќи ја неговата љубезност, посветеност на работата и подготвеност секогаш да им помогне на другите.

„Вилијам трагично го загуби животот додека ловел риба и се обидувал да ѝ помогне на птица што се заплеткала во најлон. Неговата љубезност остави траен впечаток кај сите што го познаваа и многу ќе ни недостига“, соопшти компанијата.

„Срцето ми се крши“

Тие посебно нагласија дека нивните мисли се со нивната сопруга и двете мали девојчиња во ова незамисливо тешко време.

„Се надеваме дека заедницата ќе може да се обедини за да ги поддржи и да помогне во олеснувањето на финансискиот товар што ги чека“, додадоа тие.

Бројните пораки со сочувство на социјалните медиуми покажуваат колку Вилијам и неговото семејство биле сакани во локалната заедница. Компанијата за која работи неговата сопруга, исто така, објави порака.

„Скршени сме по нашата драга пријателка и колешка Тејлор Ромберг, која трагично го загуби својот сопруг претходно оваа недела“, рекоа тие.

Џули Луис, членка на локалната заедница, напиша на Фејсбук дека тоа е „разорна загуба“ за сите што го познаваа семејството.

„Тие се навистина меѓу најискрените и најљубезните луѓе. Срцето ми се крши за ова прекрасно семејство“, рече таа.

По трагедијата беше започната онлајн кампања за собирање средства за да им се помогне на Тејлор и нејзините ќерки да се справат со загубата на нивниот сопруг и татко. До вчера вечерта беа собрани повеќе од 112.000 долари.

Тагови: бранови девојчиња

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Хегсет смени важен генерал во американската војска- откривал тајни за Иран?

Американскиот секретар за одбрана Пит Хегсет го отпушти еден од главните воени планери во Пентагон, генерал-полковник Брет Силвија, додека претседателот Доналд Трамп размислува за нови напади врз Иран. 

Хегсет смени важен генерал во американската војска- откривал тајни за Иран?

Смената доаѓа по серијата заминувања на високи американски офицери, а Пентагон се уште официјално не ги објаснил причините, објави Ројтерс.

Силвија беше директор за стратегија, планирање и политика во Здружениот началник на Генералштабот на вооружените сили на САД. На оваа позиција, тој учествуваше во изработката на воени планови и стратешки препораки за американското воено раководство. Неговиот наследник сè уште не е именуван, објавија АП, Атлантик и Вашингтон пост.

Пентагон: Сомнение за протекување доверливи информации

Според информациите доставени до Си-Би-Ес Њуз и Фокс њуз од претставници на Пентагон, Силвија била отпуштена поради сомнение дека на новинарите им дала доверливи информации поврзани со војната против Иран и војната на Русија во Украина.

Еден официјален претставник тврди дека Силвија паднала на три полиграфски тестови поврзани со сомнителни протекувања. Според истиот извор, случајот е проследен до Министерството за правда на САД.

Ова се тврдења на анонимни функционери кои се уште не се независно потврдени. Не е објавено дека Силвија е обвинета, а неговата изјава за наводите не е достапна.

САД ги предупредија арапските земји за можен нов напад врз Иран

Смената доаѓа во особено чувствителен момент. Волстрит журнал објави дека Вашингтон предупредил неколку арапски земји од Заливот да се подготват за можна кратка, но интензивна воена операција против Иран по американските избори на 3 ноември.

Според извори запознаени со разговорите, предупредувањата биле пренесени преку дипломатски и воени канали. САД и Израел, наводно, подготвуваат нова рунда големи напади за да ги ослабат воените капацитети на Иран и да го принудат Техеран да преговара.

Американските сили истовремено го преместуваат персоналот од ранливите бази, обновуваат муниција и ја зајакнуваат противракетната одбрана на Блискиот Исток. Во регионот се испраќаат и дополнителни поморски сили.

Трамп се уште нема донесено конечна одлука за нови напади. Белата куќа соопшти дека нема да коментира за можните воени планови и дека претседателот ги држи отворени сите опции за да го спречи Иран да развие нуклеарно оружје.

Веќе втор генерал е отстранет од истата позиција

Силвија е вториот висок офицер кој Хегсет го отстрани од таа позиција. Неговиот претходник, генерал-полковник Џозеф Мекги, беше принуден да се пензионира минатата година.

Пред да дојде во Пентагон, Силвија командуваше со 101-та воздушно-десантна дивизија на американската армија. За време на неговата 32-годишна воена кариера, служел во Ирак и Авганистан, каде што бил ранет и одликуван за храброст.

„Вашингтон пост“ пишува дека неговото ненадејно отпуштање предизвикало незадоволство кај неговите колеги, кои го сметале за искусен и внимателен командант.

Силвија, исто така, претходно беше цел на десничарската активистка Лаура Лумер, блиска до Трамп, која јавно го повика Хегсет да ја преиспита својата позиција во војската.

Хегсет отстрани голем број високи офицери

Од доаѓањето на Хегсет на чело на Пентагон, голем број високи американски офицери беа сменети или оставени. Меѓу нив се и началникот на Генералштабот на армијата Ренди Џорџ и други генерали на важни командни позиции.

Според извештајот на АП, за време на мандатот на Хегсет, речиси дваесетина високи воени команданти си заминале, а причините за повеќето заминувања не се јавно објаснети.

Хегсет вели дека кадровските промени се дел од напорите за зголемување на одговорноста и ефективноста на војската. Тој, исто така, нареди намалување на бројот на највисоките офицерски позиции за 20 проценти до јануари 2027 година.

Неговите критичари, сепак, предупредуваат дека честите смени може да ја поткопаат стабилноста на командниот систем и да создадат притисок врз офицерите кои не се согласуваат со политичкото раководство.

Демократскиот конгресмен Сет Мултон, поранешен офицер на маринците, претходно предупреди дека политички мотивираните отпуштања може да доведат до политизација на војската и создавање на авторитарен синџир на команда.

Отстранувањето на Силвија доаѓа додека САД се подготвуваат за можност за нова ескалација во осуммесечната војна со Иран. Не се знае кој ќе ги преземе неговите обврски при планирањето на американските воени операции.

Тагови: Генерал Пит Хегсет

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер