Власта по изборите ќе ја разгледува предлог-резолуцијата со т.н. црвени линии што ја претстави лидерот на СДСМ Венко Филипче, но премиерот Христијан Мицкоски категорично отфрли било каква можност за уствани измени без претходно да се добијат гаранции дека нема да има нови барања или блокади од Бугарија.

Тој и денеска оцени дека во предлог документот на Филипче има фалсификати, а опозициската партија ја обвини дека ги урива позициите на земјава на меѓународен и домашен план. Владата како што кажа тој, не ги игнорира преземените обврски, но очекува притисок од ЕУ и кон Бугарија за и нашиот источен сосед да ги исполни своите обврски, особено во делот за пресудите на ЕСЧП за ОМО Илинден Пирин.

-Ние не ги игнорираме обврските што таа влада ги прифатила за жал, но исто така не гледаме дека нашиот источен сосед прави нешто во насока за испорака на нивните обврски и очекуваме по робусна акција од ЕК и ЕУ и кај нашиот источен сосед. / Без такви гаранции на памет не ми паѓа да размислувам за било какви уставни измени- Христијан Мицкоски – Претседател на Владата.

Од СДСМ и денеска велат дека Предлог – резолуциајта е за обединување, а не зе политички препукувања. Очекуваат сите партии сериозно да ја разгледаат и да се изјаснат, па потоа ќе излезат со коментар..

-Ова не е предлог резолуција за препукување помеѓу политичките партии, туку е предлог резолуција за обединување. Оставаме сите други политички партии да ја разгледаат предлог-резолуцијата, да се изјаснат за истата и секако после тоа и ние ќе коментираме. Ова е предлог резолуција којашто е направена со сериозен пристап, со експерти и многу прецизна. Затоа сакаме да оставиме време да ја разгледаат сите политички партии и после тоа да се произнесат,- - Богданка Кузеска – СДСМ.

Во резолуцијата која лидерот на СДСМ Филипче ја презентираше вчера, се предлага план за уставни измени до 10 февруари, со јасна определба дека тоа ќе биде последната пречка, без нови идентитетски барања. Како црвени линии се наведени безусловното почитување на јазичните, идентитетските, историските и културни особености на македонскиот народ за кои како што тој кажа, ќе се преземе обврска никоја Влада да не преговара со ЕУ. Доколку има ново бугарско вето, во документот се предлага државниот врв со заедничко писмо да ги информира европските челници дека идентитетските прашања се затворени и за нив не се преговара.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.