За жал, постојат центри на моќ кои се обидуваат да внесат страв, паника кај граѓаните, пред изборите, изјави денеска премиерот Христијан Мицкоски одговарајќи на новинарско прашање за време на посетата на Општина Јегуновце.

- Додека сум јас во Јегуновце заседаваат врвот на структурите на МВР, идентификувани се од прилика дваесетина лица за кои постојат основани сомневања дека стојат позади овој процес. Истовремено имавме одредени дојави што ги собиравме изминативе денови и во координирана акција МВР со Министерството за животна средина ќе постапува во деновите коишто следат, така што за жал има структури кои на ваков начин се обидуваат да внесат нестабилност и немир, но како што кажав тие ќе контруираат, ќе лешинарат, ќе подметнуваат, ние чесно ќе работиме, ќе се бориме, и на крај повторно ќе победиме, рече премиерот.

Мицкоски потенцираше дека утрово се појави јасна снимка како се случува подметнување пожар во објект кој што изби во 4 и 30 часот. Пожарот се случи во сервис за автомобили во Пинтија.

- Бев континурирано на линија и со градоначалникот на Општина Кисела Вода, и со министерот и со луѓето од ППЕ Скопје. Видовте како дрско се подметнува пожар и тоа е само уште еден доказ тоа што го зборувам цело време дека, за жал, постојат центри на моќ кои се обидуваат да внесат страв, паника кај граѓаните, пред изборите, и одговорот на прашањето кому тоа му одговара мислам дека со една кратка анализа ќе го добиете, рече премиерот Мицкоски.

Премиерот Христијан Мицкоски денеска оцени дека зголемените параметри во економијата ги загрижуваат и се причина за делувањата од изминатите денови на центри на моќ кои не сакаат Владата да успее, а Македонија да биде стабилна, мирна и просперитетна.

Во одговор на новинарско прашање при посетата на општина Јегуновце, Мицкоски посочи дека зголемениот промет на услуги, што го регистрираше Државниот завод за статистика, е уште еден во низата параметри кои велат дека конечно почнуваме да се развиваме и оти, наведе, „тоа е причината сите центри на моќ на кои не им одговара Македонија повторно да биде водечка и во економијата и во мирот и во стабилноста и во меѓуетничките односи во регионот да го предизвикуваат тоа што го прават во изминативе денови“.

- Во второто тримесечие односно во изминатиот квартал имаме пораст во делот на услугите за 3,5 проценти, но она што за мене е исклучително важно и охрабрувачки е што во првите седум месеци, од јануари до јули, во делот на туризмот имаме за 10,5 проценти повеќе туристи споредено со истиот период минатата година и очекувам таа бројка до крајот на годината да биде и до 15 проценти, што ќе биде најголем раст во регионот убедливо. Истовремено бројот на странски гости, туристи што ја користат Македонија како место за одмор е зголемен за 15 проценти споредено со истиот период минатата година и очекувам таа бројка да биде 25 проценти до крајот на годината, рече Мицкоски.

Сите овие индикатори, дополни премиерот, ги загрижуваат овие центри на моќ кои не сакаат оваа Влада да успее, коишто не сакаат Македонија да биде стабилна, мирна, просперитетна. - И тие се обидуваат со ваков тип на лешинарење и подметнувања да функциониараат, но, ќе повторам, ние ќе се бориме и ќе ги победиме, изјави Мицкоски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.