Мицкоски изјави дека утре ќе има средба со Таравари на која ќе побара јасен одговор од него за овие прашања и понатамошното функционирање на Таравари во Владата откако тој одлучи да настапи со свои советнички листи на изборите, наместо со коалицијата „Вреди“.

-Таква средба ќе има неделава, ако не се лажам тоа ќе биде утре, но треба да го погледнам распоредот. И на таа средба јасно сакам да слушнам став кој и медиумите ќе го слушнат, дали е точно дека има договор меѓу партијата на Арбен Таравари и Демократската унија за интеграција дека во најмалку 5 или 6 општини каде тој ќе извади свои кандидати, а ДУИ нема да извади свои кандидати за градоначалници, што прво значи себе понижување како политичка партија, а второ дека тивко ќе го поддржува. Тоа за мене како претседател на Владата е неприфатливо, изјави Мицкоски.

Во однос на јавните закани кои ги упати лидерот на ДУИ, Али Ахмети дека ќе излезат на протести од кои нема враќање назад доколку поранешниот министер за економија, Бектеши биде осуден по завршувањето на истрагата за трагедијата во Кочани, премиерот му порача на лидерот на „интегративците“ наместо да се заканува, да направи структурни реформи во партијата.

- Ако е мудар како што се претставува, Ахмети ќе извлече поука и наместо да се заканува, ќе направи структурни реформи, и програмски и кадровски во неговата партија и со нови ликови, нова програма ќе излезе пред македонските граѓани да ја бара довербата. Граѓаните ќе кажат која политичка партија ја заслужува довербата, а која не, кои градоначалници и кои советници, па врз основа на тие резултати понатаму може да носиме заклучоци дали ќе има предвремени избори или не, рече Мицкоски.

Правото на протест е уставно загарантирано право, но тоа не треба да се злоупотребува во политички цели, кажа лидерот на СДСМ Венко Филипче прашан дали неговата партија би соработувала со ДУИ по последните изјави Ахмети. Во СДСМ веќе е почнат процесот за избор на најдобрите кандидати за локалните избори низ државата, кажа Филипче, а еден дел од кандидатите повторно ќе бидат некои актуелните градоначалници на СДСМ, без да прецизира кои.

- Јас сметам дека правото на протест е уставно загарантирано право, но воопшто не сметам дека тоа треба да биде злоупотребено во политички цели. Ние веќе го започнавме процесот на разговори и пронаоѓање партнери за следниот период, за циклусот на локални избори. И покрај најавите и изјавите на претставници на владејачкото мнозинство дека владината коалиција е стабила, кога еден дел од коалицијата се отцепува, тоа е знак дека не е стабилна. Да почекаме да видиме како ќе се одвива тој процес, изјави Филипче.

Филипче очекува до крајот на јуни целиот процес на селекција да биде завршен, додека Мицкоски пред Извршниот комитет ќе ги сподели неговите предлози до крајот на месецов.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.