Македонија

Мицкоски ќе учествува на состанокот на лидерите на ЕУ и Западен Балкан во Њујорк

Премиерот Мицкоски и лидерите од регионот денеска на ручек со високата претставничка на ЕУ за надворешна политика и безбедност, Каја Калас, на маргините на Генерално собрание на ОН во Њујорк.

Средбата на лидерите на ЕУ и земјите од Западен Балкан доаѓа во пресрет на новата стратегија за проширување која ЕК ќе ја објави точно за една недела, а со која фокусот на Брисел е таканаречената постепена интеграција за земјите кандидатки, кои до полноправно членство, ќе користат одредени бенефиции, во зависност од напредокот во реформите.

Премиерот Мицкоски претходно од САД повика на вклучување на претставници на ЕУ, со цел да помогнат за подобрување на дијалогот за разликите со Бугарија.

Токму европската перспектива на земјава била една од темите на средбата меѓу премиерот Мицкоски и неговиот словенечки колега Јанез Јанша синоќа во Њујорк. Како што објави Мицкоски на социјалните мрежи, двајцата премиери разговарале и за продлабочување на политичката и економската соработка, како и за актуелните геополитички и безбедносни предизвици во Европа и светот.

- Нашиот став е јасен – европската интеграција мора да се темели на заслуги, исполнети критериуми и реални резултати, а не на нови билатерални условувања кои немаат суштинска врска со европските вредности. Не бараме привилегии и не бараме пократок пат. Бараме фер и предвидлив процес во кој постигнатото ќе се вреднува, а Македонија ќе биде почитувана како држава и партнер, му рекол Мицкоски на Јанша.

Македонија синоќа во Њујорк беше претставена и од сопругата на премиерот Христијан Мицкоски, Рози Мицкоска, на приемот што го организираше првата дама на САД, Меланија Трамп, за сопругите на светските лидери кои учествуваат на 81. Генерално собрание на ОН. Приемот бил организиран во рамките на иницијативата на Меланија Трамп „Заедничко градење на иднината“.

– Заедно, ние претставуваме прекрасен спој на култури, јазици, истории и традиции. Сите сме обединети околу една вечна вистина: иднината на нашиот свет ќе биде одредена од она што денес го правиме за нашите деца, порачала првата дама на САД на приемот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Диди излегува од затвор порано отколку што беше планирано

Американскиот рапер Шон „Диди“ Комбс треба да биде ослободен од затвор порано од првично планираното.

Неговиот датум на ослободување се менуваше неколку пати во последните месеци, а сега е повторно одложен, објавува TMZ.

Според најновите податоци од Федералното биро за затвори на САД, Комбс треба да биде ослободен на 6 февруари 2028 година. Дури минатиот месец, 2 март 2028 година беше споменат како датум на неговото ослободување, а претходно беа споменати и 21 јануари и 5 и 20 февруари истата година.

Имал проблеми во затворот

Промената на датумот доаѓа по низа проблеми што Комбс ги имал додека ја издржувал казната во Федералниот затвор Форт Дикс во Њу Џерси. Поради инцидентите, според TMZ, тој неодамна бил префрлен во затворот Аленвуд во Пенсилванија.

За време на престојот во Форт Дикс, тој наводно завршил во самица поради кршење на затворските правила. Исто така, имаше тврдења дека учествувал во тепачки и користел шверцувани мобилни телефони.

NBC News претходно објави и за наводниот преференцијален третман што Комбс го добил зад решетки. Според овие тврдења, тој им плаќал на други затвореници да го масираат, да му готват и да извршуваат секојдневни домашни работи.

Тој беше осуден на 50 месеци затвор

Да потсетиме дека во 2025 година, Диди беше прогласен за виновен по две точки од обвинението за транспорт на лица преку границите на американските држави со цел проституција, што го прекрши таканаречениот Манов закон.

Сепак, поротата го ослободи од посериозните обвиненија за рекетирање и трговија со луѓе за сексуална експлоатација.

За кривичните дела за кои беше прогласен за виновен, тој беше осуден на 50 месеци, или четири години и два месеци затвор.

Тагови: Пи Диди

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Десетици илјади на антивладини протести во Њу Делхи, бараат оставка од Моди

Десетици илјади луѓе се собраа во Њу Делхи за да протестираат против владата на Нарендра Моди, додека гневот расте низ цела Индија поради сеопфатната ревизија на избирачкиот список со која се отстранети 130 милиони имиња.

Опозицискиот сојуз на Индија, предводен од Конгресната партија, ги собра поддржувачите од целата земја на митинг во индискиот главен град.

Опозициските лидери велат дека ревизијата на избирачкиот список ѝ дава на владејачката партија Бхаратија Џаната (БЏП) на Нарендра Моди изборна предност и побараа оставка и отстранување на нејзиниот главен изборен службеник, Гјанеш Кумар.

БЏП ги отфрли обвинувањата, објавува Гардијан.

Опозицискиот лидер Рахул Ганди изјави на митингот дека Кумар „го извршил најголемиот злостор со обидот да го замолчи гласот на народот“.

Ганди рече дека обединетата опозиција нема да дозволи „демократијата во земјата да биде уништена“ и му рече на Моди дека „нема каде да бега“.

Најголемиот предизвик за режимот дојде во форма на протести предводени од млади, организирани од движење кое се нарекува себеси „Лебарки“, што доведе до оставка на еден од министрите на Моди, потсетува „Гардијан“.

Опозицијата, предводена од Ганди, ги загуби последните три циклуси општи избори од БЏП, бидејќи опозициските партии во голема мера не успеаја да се спротивстават на силната хинду националистичка реторика на БЏП, објави весникот.

Прашањето за ревидирање на избирачките списоци беше покренато минатата година, но неодамна стана национален скандал откако истрагата на весникот „Индијан експрес“ откри неправилности и несогласувања во рамките на Изборната комисија околу спроведувањето на процесот.

Милиони луѓе кои според сите стандарди треба да имаат право на глас открија дека нивните имиња недостасуваат од избирачките списоци, при што муслиманите и малцинствата се непропорционално погодени.

„Хјуман рајтс воч“ оваа недела изјави дека обвинувањата покренуваат „сериозни прашања за фер однос на идните избори во Индија“. Партијата БЏП се обиде да ги отфрли протестите на опозицијата како анархија.

Тагови: Моди Њу Делхи

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Технологија

Светски натпревар во планинарење за хуманоидни роботи- учествуваат 90 тимови

Хуманоидни роботи се искачија на планинска патека долга 3,9 километри на планината Таи во Кина, искачувајќи се на 3.100 камени скали, во првото натпреварување во качување за роботи во светот.

Покрај нив, во необичниот предизвик учествуваа и четириножни роботи и роботски егзоскелети, надминувајќи висинска разлика од 600 метри. Рутата вклучуваше стрмни падини, долги скали и остри кривини, објави CBS.

Додека набљудувачите гледаа, роботите напредуваа по планината, а некои од нив дури и стигнаа до целта. Настанот ја претвори една од најпознатите планински патеки во Кина во тест-полигон за роботи.

Dozens of robots took on more than 3,000 steps up one of China's most famous peaks Monday, many carrying eggs and watermelons in a race organizers billed as a test of real-world machine endurance, state media showed. https://t.co/Yiv7iVj1Af
— CBS News (@CBSNews) November 2, 2026

Нерамните камени скали и стрмните искачувања ја тестираа способноста на машините да одржуваат рамнотежа и да го совладаат тешкиот терен. Некои од четириножните роботи, исто така, носеа залихи од храна по патот.

На натпреварот учествуваа 90 тимови кои ги презентираа најновите достигнувања во областа на истражувањето и инженерството.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.