Вчерашната средба на Мицкоски и Таравари, закажана по превирањата во коалицијата „Вреди“ и тврдењата за соработка на Таравари со ДУИ, како што брифираа од владината прес-служба за МИА, поминала во конструктивен дух, а во текот на месецов ќе се знае иднинатата за функционирањето на АА. Од Владата информираа дека премиерот на средбата ги потврдил претходно изнесените позиции.

Мицкоски, вчера изјави дека Таравари треба да одбере една од двете опции - „патот на реформи и владеење на правото, борба за праведно општество и институции кои функционираат“ или ќе им се придружи на „оние политички сили кои со години ја криминализираат и уништуваат државата“.

-Генерално би сакал да слушнам како размислува во делот на последните случувања во јавноста. По мене има, две опции за избор. Едната е оваа што ја нуди оваа Влада, на реформи, на промени, на испорака за граѓаните и втората опција е онаа која што години наназад, повеќе од две децении ја криминализираше државата, ги уништуваше институциите и практично ја клекна државата и граѓаните. Тоа е изборот, нема трета опција. Би сакал да слушнам од господинот Таравари која опција за него е, бидејќи јас не гледам трета опција, изјави премиерот Мицкоски, на новинарско преашање при посетата на Штип.

Тој оцени дека „со или без господинот Таравари Владата е стабилна, цврста и со големо мнозинство и оти останува на него и неговите сопартијци да одлучат за една од двете опции“.

Со Таравари, како што рече Мицкоски, во политиката комуницираат долго време и за него како човек има позитивно мислење, но, нагласи „никого во животот не сум молел, ниту пак имам намера да молам“.

- Но, во политиката образот е нешто што го имаш или го немаш. Тука нема флуидни варијанти. Или имаш или немаш. Или држиш до зборот или не држиш до зборот. Јас мислам дека во неговиот случај најмалку три пати сум покажал и сум го држел зборот. И кога имало моменти, кога можеби имало и дилема во рамките на раководството на партијата. Затоа задкулисни игри се провидни игри, лесно се идентификуваат и познаваат и најчесто ваквите задкулисни игри им се удираат од глава на оние кои што ги прават, изјави Мицкоски.

Претходно, во изјава во која ја најави средбата со Таравари, Мицкоски рече дека сака јасно да слушне „дали е точно дека има договор помеѓу партијата на Таравари и ДУИ“ за поддршка на изборите и порача дека за него тоа е неприфатливо.

Арбен Таравари, пак, вчера изјави дека остануваат на одлуката донесена на Претседателството на партијата на Локалните избори во октомври да настапат со посебни советнички листи но дека ќе го слушне и ставот на премиерот по што ќе проценат како партија како ќе продолжат понатаму.

- Тоа што сме го поминале на Претседателство дека Алијанса за Албанците ќе има посебни советнички листи и најверојатно сопствени кандидати за градоначалници во општините каде излегуваме. Така што ќе го слушнеме и премиерот и потоа ќе процениме како продолжуваме понатаму, рече Таравари, на новинарско прашање на настан во Тетово.

По објавата на Таравари за настап со посебни советнички листи на локалните избори, неговите партнери од коалицијата Вреди, Алтернатива, Беса и Демократско движење, обвинија дека преговара со лидерот на ДУИ Али Ахмети, како и дека самиот се исклучил од Вреди. Таравари не учествуваше на состанокот на Алтернатива, Беса и Демократско движење на кој објавија дека коалицијата ќе дејствува како еден политички субјект. Според последните објави во медиумите, пратеникот Беким Ќоку ќе биде новиот координатор на пратеничката група на „Вреди“, која ќе биде составена од девет пратеници, но до Собранието се уште не е доставено официјално известување.

Досегашниот координатор на пратеничката група на Вреди Халил Снопче, кој доаѓа од крилото на Алијансата на Албанците, предводено од Арбен Таравари, во изјава за медиумите минатата недела истакна дека тој се уште е координатор на пратеничката група на „Вреди“ од 14 пратеници, бидејќи се уште не е формирана нова пратеничка група.

- Доколку со девет потписи се обратат до Собранието дека имаат формирано нова пратеничка група, тогаш по автоматизам ние ќе дејствуваме со наша пратеничка група од петмина пратеници, рече Снопче.

Во Коалицијата „Влен“ од Алијансата за Албанците се пет пратеници - Мимоза Муса, Ријад Шаќири, Садик Сулејмани, Салим Сулејмани и Халил Снопче, а од трите други партии кои одлучија да делуваат како еден политички субјект - од „Беса“ пратениците Аднан Азизи и Калтрина Беќири, од Демократско движење - Мерита Колчи Коџаџику, Саранда Имери-Стафаи и Фериде Хаџиу, од Алтернатива - Африм Гаши, Беким Сали и Имрлије Салиу-Фетаи и Беким Ќоку од Самоопределувањето на Албин Курти.

Претседателот на Демократската унија за интеграција Али Ахмети на новинарско прашање дали има некаков договор со Таравари за локалните избори, рече дека во текот на неделава ќе бидат повикани сите органи на партијата и ќе бидат разгледани сите прашања.

-Сè уште нема финални разговори. ДУИ сè уште не ги повикала раководните тела на партијата. Во текот на неделава ќе бидат повикани највисоките партиски тела, ќе бидат разгледани сите ситуации. Секако, го цениме смелиот чекор на Таравари, бидејќи тој многу порано сфати дека оваа влада не е ништо повеќе од антиалбанска влада, нагласи Ахмети.

Лидерот на ДУИ рече дека дека ја цени одлуката на Таравари да се одвои од „Влен“.

-Сè уште не е изградена никаква стратегија. Господинот Таравари ми се чини дека рече „јас не сум роден во влада“, и во моментот кога ќе стане неприфатлив, може да си замине. Но, ова се прашања на господинот Таравари, тоа не се прашања на ДУИ, ниту на „Европскиот фронт“, тоа се внатрешни прашања што господинот Таравари кој треба да ги менаџира, рече Ахмети.

Евентуалното излегување на Таравари од владејачката коалиција во јавноста отвори дебата и за предвремени парламентари избори. Претседателката Гордана Сиљановска – Давкова вчера на новинарско прашање одговори дека нема потреба од предвремени избори.

Говорејќи како професор, таа посочи дека дека предвремени избори се потребни во услови на парализирани институциите, кога не можат да функционираат или кога владејачкото мнозинството е на границата на потребните 61.

- Да, има проблеми но институциите се справуваат со нив. Ќе има редовни локални избори кои го отсликуваат расположението на граѓаните. Понекогаш се лакмус за тестирање и на успешноста на власта, но апсолутно нема потреба од парламентарни избори, рече таа одговорајќи на прашање на медиумите.

Сиљановска - Давкова дополни дека истите оние кои сега повикуваат на предвремени избори беа најголемите противници на предвремени избори кога навистина имаше причина за тоа.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.