Протестите се демократска алатка, ги разбирам и поддржувам сите кои одлучиле својот револт да го искажат на протести, но не и оние кои преку трагедии се обидуваат да добијат политички поени, изјави премиерот Мицкоски, прашан за протестите по трагедијата во Кочани. Според него има такви коишто сакаат да ги политизираат протестите, бидејќи им пречи решителноста на неговата Влада да се бори до последен атом како што рече против мафијата и за подобра држава.
-Протестите се демократска алатка на изразување незадоволство, и јас сум нервозен и верувам дека и вие сте незадоволни, сите ние сме незадоволни од сето тоа што се случува и тука не треба да имаме дилема. Работите ги решаваме и ќе продолжиме да ги решаваме. Инаку апсолутно ги разбирам сите оние коишто одлучиле својот легитимен гнев, да го изразат преку демократска алатка, а тоа се протести. Но, не можам никако да ги оправдам оние политички глодари и лешинари коишто не сакаат силна Влада од ВМРО, бидејќи е браник и последниот столб, да не дозволи уништување на Македонија како држава, изјави Мицкоски.
Инспекциските контроли за легалноста на објектите продолжуваат со засилено темпо и покрај ограниченоста на ресурсите на надлежните, кажа Мицкоски. Констатирани се огромен број на нерегуларности, а Владата разгледува акционен план за прогласување мораториум за одреден период за сите објекти кои сакаат да продлжат со работа, да ги остранат неправилностите.
Министерот за транспорт Александар Николоски најави дека утре ќе бидат објавени финалните бројки и имињата на сите фирми чии лиценци ќе бидат одземени заради незаконско работење, а за истото ќе бидат информирани надлежното обвинителство и МВР. Од министерството со кое тој раководи, како што кажа, до сега се проверени над 640 лиценци од вкупно 1.100, а одземени се 97 од кои најголемиот дел се однесуваат за лиценцата „Б“ односно за изведувачи на градби од втора категорија. Дополнително, по засилените контроли во патниот превоз, единаесет превозници меѓу кои и Дурмо Турс добија казни – информираат од државниот инспекторат за транспорт. Од таму велат дека од 138 извршени контроли за три дена, констатирани се 21 неправилност кај правни и физички лица при вршење на превоз на патници и стоки.