Македонија

Мицкоски до Филипче: ВМРО-ДПМНЕ и по 2028 ќе ја формира следната влада, за ЕУ нема да водиме мекотелна политика

И по 2028 ВМРО-ДПМНЕ и коалициските партнери ќе ја формираат следната влада.

И по 2028 ВМРО-ДПМНЕ и коалициските партнери ќе ја формираат следната влада, а не гледам како вие со вакви ненародни политики и со тоа што претставувате меко ткиво ќе можете да добиете или да повратите дел од изгубенте гласачи, рече денеска премиерот Христијан Мицкоски во одговор на прашање од пратеникот и претседател на СДСМ Венко Филипче.

Филипче го праша премиерот кој е Душан Адамовиќ, зошто е поставен за конзул во Белград и дали има лична релација со него, а изнесе критики со потпрашања за барањата за зголемување на платите, забележувајќи му дека рекол оти треба да се почитуваат законите но направил линеарно зголемување на пензиите. Упати критики и за состојбата во земјоделството, енергетиката, новиот закон за високо образование, евроинтеграциите …

Мицкоски рече дека оваа Влада ги покачила пензите и договорила раст на платите со партнерите во јавниот сектор и потенцираше дека ќе продолжи да работи во интерес и на пензионерите и на работниците.

- Жал ми е што не ја научивте лекцијата и удирате повторно по групата на луѓе кои за време на транзицијата некои ваши претходници ги оставија на улица а денеска се пензионери, и голем дел од нив станаа транзициски херои, ограбувајќи го народниот имот на граѓаните а стотици луѓе на улица како технолошки вишок и за жал пред доаѓањето на оваа влада нивните пензии беа катастрофални, а со доаѓањето на оваа влада пензиите сè уште не се во онаа кондиција онака како што заслужуваат, но колку можевме во рамки на можностите успеавме да заштедиме одредени средста и на пензионерите да им ги покачиме пензиите, рече Мицкоски.

Тој дополни дека последните податоци на Државниот завод за статистика покажуваат дека просечната плата за минатата година е зголемена за 9,6 проценти, што посочи, не е доволно и треба да се зголеми но оти тоа се можностите што сега ги имаме како економија и влада во смисла на тоа што е договорено во јавниот сектор до 2028 година до кога оваа влада има добиено мандат од граѓаните.

- После тоа ќе видиме, иако еве уште сега ви кажувам дека и по 2028 година ВМРО-ДПМНЕ и коалициските партнери ќе ја формираат следната влада, а за жал со вакви ненародни политики што ги имате и претставувате меко ткиво на македонскиот идентитет и македонската политичка сцена, со вакви мекотелни изјави и прашања што сега поставувате не гледам како ќе можете да добиете или да повратите малку од онаа супстанца што ја изгубивте кај македонските гласачи, рече Мицкоски.

Осврнувајќи се во состојбите во земјоделството потенцираше дека земјоделците цела 2025 година добиваат цени кај инпутот во негатива а кај аутпутот во позитива, како и дека од Македонија лани се извезени 450 милиони евра земјоделски производи а се увезени 220 милиони евра, што, потенцираше е 30 проценти повеќе од претходната година.

На критиките од Филипче за Предлог законот за високо образование, Мицкоски наведе дека немаме универзитет во првите 2000 според шангајската ранг листа, затоа што, како што рече, со закон што на шверцерски начин го донела поранешната министерка за образование Рената Дескоска сега може да се стане редовен професор откако ќе се објават шест труда.

- Го уништивте образованието. Денес бараме секој професор кој добива 120.000 до 140 000 денари плата, благодарение на оваа Влада, да си ја врши својата работа односно да објавува трудови во квалитетни списанија, со фактор на влијанија и кои се во базата на податоци. Треба да пишуваат затоа што ги осакатуваме децата нашите студенти и затоа најдобрите одат во Љубљана затоа што тие универзитети организираат тука саеми и им нудат стипендии. Ќе се бориме со тоа. Таа е политиката. Ќе си ги вратиме децата дома. Ако за ова треба да паднам од Влада ќе паднам, порача Мицкоски.

За критиките од опозицијата за блокада на евроинтеграцијата, Мицкоски истакна „за ЕУ нема да водиме мекотелна политика“.

- Вие сте мекото ткиво. Сè додека давате вакви изјави ќе имаме политичари од Бугарија кои ќе знаат дека имаме меко ткиво во македонскиот национален идентитет и ќе се обидуваат секогаш да играат на картата на помал отпор. Не можете да постигнете ништо со тоа. Ќе останете запаметен во историјата како човекот кој бил мекото ткиво од партијата која била мекото ткиво на македонскиот национален идентитет. Не ви го советувам тоа. Знаете што значи да останете запаметен во историјата, од Охрид сте, знаете точно што сакам да кажам, кој и како ги предавал моштите, наведе Мицкоски.

Му порача на Филипче дека Владата и во енергетика може да и одржи лекција на опозицијата и го покани да одат заедно на терен за да види реализација на приватна инвестиција од половина милијарда долари, но посочи „вие сте навикнати на македонски инвестиции во Грција во соларни електрани“.

Филипче претходно му рече на Мицкоски дека под негова директна команд, пратениците на мнозинството ги оставија работниците без заслужено зголемување на платите.

„Видовме вчера, под ваша команда, пратениците на владеачкото мнозинство не го изгласаа предлог-законот. Ги оставија работниците без зголемени плати, имаат проблеми во секојдневниот живот, не можат да врзат крај со крај. Тие не протестираат заради некаков чалам. Тие протестираат поради вистински проблем“, рече Филипче.

Претседателот на СДСМ потенцираше дека кризата се чувствува во сите сегменти вклучутелно и кај земјоделците.

Тагови: Христијан Мицкоски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Израелскиот парламент изгласа закон за даночни олеснувања за илегалните доселеници

Парламентот на Израел, Кнесетот, денес конечно одобри закон со кој се даваат даночни олеснувања за десетици нелегални населби во окупираниот Западен Брег.

Во соопштението за медиумите на Кнесетот се наведува дека пратениците гласале за законот во конечното читање, доделувајќи даночни олеснувања на нелегалните населби лоцирани во таканаречената „зона на источната линија на конфликтот“.

Детали за законот

Законот го предложија пратениците Цви Сукот од партијата Религиозен ционизам, предводена од министерот за финансии Безалел Смотрич, и Лимор Сон Хар-Мелех од крајно десничарската партија Еврејска моќ на министерот за национална безбедност Итамар Бен-Гвир, заедно со други пратеници. За него гласаа 32 гласа „за“ и 23 „против“. Според законот, жителите ќе имаат право на даночни олеснувања во текот на целата година, а доколку ги исполнуваат условите за повеќе од една бенефиција, ќе можат да изберат една од достапните.

Влегувањето во сила на законот е закажано за јануари 2027 година и ќе важи до 31 декември истата година. Законот, исто така, го овластува министерот за финансии да ја продолжи неговата важност за дополнителни периоди до две години, со одобрение од парламентарниот Комитет за финансии.

Извештај на „Мир сега“

Израелската невладина организација „Мир сега“, која се спротивставува на политиката на населување, во извештај објавен кон крајот на мај изјави дека законот ќе класифицира десетици нелегални населби како области чии жители имаат право на значителни даночни олеснувања.

Организацијата забележува дека првичниот нацрт на законот имал намера да ги прошири даночните олеснувања на сите населби, но неговиот опсег бил стеснет поради високите трошоци и забелешките на експертите. Конечната верзија се однесува на 58 нелегални населби.

Според „Мир сега“, ажурираната верзија првенствено ги опфаќа нелегалните населби каде што поддршката за религиозната ционистичка партија е особено силна.

Меѓународен статус на населбите

Меѓународната заедница ги смета населбите изградени на окупираната палестинска територија за нелегални според меѓународното право и за голема пречка за решение со две држави.

Откако ја презеде функцијата кон крајот на 2022 година, владата на Бенјамин Нетанјаху отворено се залага за значително проширување на активноста за населување. Според „Мир сега“, повеќе од 750.000 израелски доселеници живеат на окупираниот Западен Брег, вклучувајќи го и Источен Ерусалим.

Тагови: доселеници

Бизарно

Луѓе останале без кислород во затворена стаклена купола- експериментот стана кошмар (ВИДЕО)

Биосфера 2, еден од најамбициозните научни експерименти на 20 век, беше отворен во 1991 година во јужна Аризона, околу педесет минути возење северно од Тусон.

Тоа е огромна стаклена структура со површина од околу 1,27 хектари, дизајнирана како целосно затворен еколошки систем во кој луѓето би можеле да живеат без надворешна помош. Проектот е создаден со цел да се проучат екосистемите на Земјата и можностите за иден живот во вселенските колонии.

Вештачка реплика

Името на проектот не е случајно. Земјата се смета за прва биосфера, додека комплексот во Аризона требаше да биде нејзина вештачка реплика. Во стаклената купола беа изградени неколку различни единици кои имитираа природни биоми, вклучувајќи тропска дождовна шума, океан со корален гребен, мангрови, савана и пустина.

Покрај тоа, имаше живеалишта, лаборатории и земјоделски области каде што жителите мораа сами да одгледуваат храна.

Најпознатиот дел од проектот започна на 26 септември 1991 година, кога осум научници и истражувачи влегоа во целосно затворен систем.

Целта беше да се тестира можноста за самоодржлив еколошки систем во кој учесниците би живееле без надворешна храна и ресурси за време на планираниот период на изолација, потпирајќи се на претходно изградена инфраструктура и почетни резерви.

Избегнаа сериозни проблеми

Иако земјоделскиот дел произведуваше импресивни количини храна, учесниците се соочија со хроничен глад за време на дел од мисијата. Тие одгледуваа банани, папаја, ориз, пченица, кикирики и други култури, но внесот на калории беше значително помал од очекуваното, објавува Dnevno.hr.

И покрај ова, здравствените индикатори на членовите на екипажот генерално останаа добри во текот на нивниот престој.

Најголемиот проблем се појави кога нивото на кислород почна неочекувано да опаѓа. По 16 месеци, концентрацијата на кислород се намали од приближно 20,9 на 14,2%, ниво споредливо со тоа што се наоѓа на голема надморска височина.

Некои од учесниците развија симптоми слични на висинска болест, и на крајот мораше да се додаде надворешен кислород во нивните системи за да се избегнат посериозни здравствени проблеми.

Во еден момент, групата учесници во експериментот се подели на две фракции. Луѓето кои беа блиски пријатели станаа непријателски настроени и едвај зборуваа.

Во исто време, се појавија и други тешкотии. Одредени растителни видови почнаа неконтролирано да доминираат над други, бројот на мравки и лебарки нагло се зголеми, а поради помалку сончева светлина отколку што очекуваа дизајнерите, некои делови од екосистемот не функционираа како што беше планирано.

Промена на сопственост и намена

Вториот експеримент започна во март 1994 година, по бројни технички подобрувања. Новиот екипаж успеа да постигне самоодржливост во производството на храна, но проектот се соочи со финансиски и организациски проблеми што доведоа до предвремено прекинување на мисијата во септември истата година.

По завршувањето на првичните експерименти, Биосфера 2 претрпе неколку промени на сопственост и намена. Комплексот беше управуван некое време од Универзитетот Колумбија, а од 2007 година, истражувањата ги водеше Универзитетот во Аризона, кој стана негов целосен сопственик во 2011 година.

Ова го спаси објектот од можно рушење и претворање во станбен и комерцијален комплекс.

Денес, Биосфера 2 повеќе не е затворен свет во кој луѓето живеат изолирано од остатокот од планетата, туку останува единствена научна лабораторија.

Таа ги проучува климатските промени, водниот циклус, однесувањето на екосистемот и отпорноста на коралните гребени. Во последните децении, комплексот во Аризона редовно го посетуваат посетители.

Шоу биз

Актерот Белмонт Камели донира бубрег и учествуваше во спасување седум животи

Актерот Белмонт Камели, ѕвезда на серијата „Надвор од кампусот“ на „Прајм Видео“, покажа дека хероизмот не постои само на екранот.

Со својата одлука да донира бубрег, тој започна синџир на трансплантации што спасија седум животи.

Сè започна во 2018 година, кога Камели дозна дека на неговиот пријател од детството, Брендан Флаерти, итно му е потребен нов бубрег. Иако актерот не бил компатибилен донатор, тој не се откажал од својата намера да помогне и се согласил да учествува во вкрстената размена на органи.

Шест години на листата на чекање

Флаерти бил во исклучително сериозна состојба поради откажување на бубрезите и преживувал со дневна дијализа. Поминал шест години на листата на чекање. Камели подоцна споделил поразителна статистика за болеста на социјалните мрежи, заедно со фотографии од болницата.

„Секој ден, 20 луѓе умираат чекајќи трансплантација на бубрег. Пациентите на листата на чекање поминуваат во просек три и пол години пред да добијат трансплантација, а тоа е само ако имаат толку среќа“, истакна актерот.

Верижна реакција што ги зближи странците

Кога лекарите утврдија дека Камели не може да донира бубрег на пријател, му предложија да се приклучи на програма за размена на партнери. Во ваквите програми, некомпатибилните парови донатор-примател се спојуваат со други во слична ситуација.

Бубрегот на Камели ѝ беше даден на Клотилда Руиз. Нејзината ќерка исто така не можеше да донира орган на нејзината мајка, но нејзиниот бубрег беше соодветен за друг пациент. Синџирот продолжи да се шири сè додека Флаерти не доби соодветен орган од непознат донатор.

Вкупно 14 лица учествуваа во овој сложен медицински потфат - седум некомпатибилни парови составени од пациент и донатор. Секој од седумте донатори му даде бубрег на пациент во совпадната група, што резултираше со седум успешни трансплантации.

„Љубовта од ова искуство останува засекогаш“

Актерот, кој денес има 28 години, се присети на потфатот што им даде на седум пациенти нова шанса за живот. „Факт е дека повеќето од нас имаат два здрави бубрега, додека илјадници луѓе се борат секој ден со само еден неуспех. Бев благословен со можноста и привилегијата да спасам живот“, објасни Камели.

Иако не можеше директно да му помогне на својот пријател, беше воодушевен од исходот. „За среќа, по шест години напорно чекање, Брендан го доби органот што го чекаше толку долго, а мојата нова пријателка Клотилда конечно ќе има здрав бубрег и нов почеток во животот“, додаде тој.

Актерот не ја криеше својата гордост за успехот на целиот медицински тим и сите вклучени. „Многу сум благодарен што сум дел од оваа програма за размена во која учествуваат 14 лица и што седум пациенти ќе бидат благословени со нови органи и посветла иднина“, напиша тој. Размислувајќи за операцијата и закрепнувањето, тој заклучи: „Наскоро мојата болка ќе исчезне и лузните ќе исчезнат, но љубовта во моето срце од ова искуство засекогаш ќе остане“.

Тагови: бубрег