По информациите дека Бугарија на НАТО Самитот во Хаг ќе ја претставува премиерот Жељазков, наместо бугарскиот претседател Радев, македонскиот премиер Христијан Мицкоски очекува сепак иницијативата за средба меѓу бугарскиот и македонскиот државен врв да се случи. Мицкоски вели дека доколку има каква било иницијатива за средба меѓу македонската претседателка и бугарскиот премиер и тоа треба да се прифати. Тој потврди дека нема да патува за Хаг, но убеден е дека претседателката Сиљановска Давкова ќе прифати да се сретне со Жељазков. Според премиерот, потегот на официјална Софија да го испрати премиерот, наместо претседателот, претставува необична политичка егзибиција, но секоја шанса за да се слушнат македонските аргументи и предизвици, според него, треба да се искористи.

- Јас ќе се видам и ќе побарам состанок со претседателката, ако има било каква иницијатива, на ниво на премиер со претседател мислам дека и тоа треба да го прифатиме, без разлика што не сум јас таму.Тоа е мојот став и убеден сум дека тоа ќе биде став и на претседателката. Мора да бидеме проактивни и да покажеме дека не е проблемот во тоа што неколку стотини наши граѓани велат дека бугарскиот им е мајчин јазик, туку дека има многу поголем проблем, а тоа е политика стара децении, изјави Мицкоски.

-Таму гледаме една егзибиција, можеби е таков начинот на функционирање на бугарската политичка сцена. Во Вашингтон, на Самитот, присутен беше премиерот каде што јас бев присутен. Логично е да ротираат претседателот и премиерот, барем таква е праксата. Затоа годинава е претседателката Сиљановска таму. И логично беше од страна на Бугарија да биде испратен претседателот и тој беше најавен, во последен момент беше испратен премиерот. Јас ќе се видам и ќе побарам состанок со претседателката, ако има било каква иницијатива, на ниво на премиер со претседател мислам дека и тоа треба да го прифатиме, без разлика што не сум јас таму, изјави Мицкоски.

Можноста за македонско-бугарска средба стана актуелна минатиот месец кога Мицкоски откри дека постои предлог од првиот човек на ЕС Антонио Кошта, претседателите Сиљановска и Радев да седнат на маса во Хаг и да ги вкрстат аргументите во присуство на претставници од ЕУ, САД, како и генералниот секретар на НАТО, Руте, но досега од официјална Софија немаше одговор на иницијативата.

Во меѓувреме, шефовите на дипломатиите Муцунски и Георгиев вчера оствариле телефонски разговор, во кој според соопштението од МНР се потврдени истите позиции од двете страни. Бугарскиот министер како што соопштија во Софија потенцирал дека Бугарија нема да има нови услови надвор од францускиот предлог.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.