Имено, лабораториските експерименти покажале дека типот на мраз што ја покрива површината на таа далечна Месечина свети кога е озрачен, што може да помогне во откривањето точно кој е составот на неговите замрзнати рамнини и подземни океани.

Месечината Европа е постојано бомбардирана од електрони со голема енергија, бидејќи силното магнетно поле на Јупитер постојано ги забрзува наелектризираните честички. Планетарниот научник Мурти Гудипати и неговите колеги од лабораторијата за реактивен погон на НАСА сакале да истражат што се случува кога електрони со висока енергија ќе ја погодат површината на Европа, па тие бомбардирале со електрони примероци на мраз богати со молекули што може да се најдат на таа месечина, пишува New Scientist.

Можеби ќе се запрашаме - па што е чудно кога Месечината сјае? Овде на Земјата, постојано сме сведоци на овој феномен. Но, нашата Месечина сјае затоа што ја рефлектира сончевата светлина ,а сјајот на Европа е предизвикан од сосема различни механизми. Замислете дека имаме Месечина која постојано е осветлена, дури и на страната што не е свртена кон Сонцето.

"Ако Европа не беше бомбардирана од високо-енергетско електронско зрачење, ќе изгледаше како нашата Месечина, односно ќе беше темна од едната страна. Но, бидејќи е изложена на радијација, Европа сјае дури и во мрак", рече Гудипати.

Кога електроните ги погодиле молекулите на мраз за време на експериментот, тие се распаднале и нивните атоми апсорбирале одредена енергија. Тогаш атомите повторно ја емитувале таа енергија во форма на светлина; создавајќи сјај со зелена боја. Светлината била посилна или послаба и ја менувала бојата во зависност од видовите молекули. На пример, ако научниците додале натриум хлорид на примерокот од мраз, сјајот би бил послаб.

"Мразот сличен на оној на Месечината во Европа испушта карактеристични спектрални потписи во видливиот регион на светлина кога се изложени на високо-енергетско електронско зрачење. Откривме дека натриум хлорид и карбонат ја намалуваат осветленоста додека епсомитот, на пример, го засилува", се вели во студијата.

Различни солени соединенија во мразот создаваат и друга боја на сјајот. Во зависност од материјалот во примерокот, тој некогаш светел зелено, а понекогаш синкаво.

„Да застаневме на површината на Европа и да погледнеме надолу, земјата ќе изгледа да свети како површината на Земјата за време на полна месечина“, рече Гудипати.

Во 2024 година, НАСА планира вселенското летало Европа Клипер,да стигне до орбитата на Јупитер и да ја проучува Европа.

"Вселенското летало Европа Клипер ќе спроведе детална студија за месечината на Јупитер ,Европа, за да утврди дали на ледената месечина може да има услови погодни за развој на живот. Леталото ќе направи 45 блиски премини над Европа за време на својата орбита околу Јупитер, пренасочувајќи ја својата орбита за да анализира друга област и конечно да ја скенира скоро целата површина на Европа“, пишува НАСА.

Гудипати рече дека постојат докази дека под замрзнатата површина на Европа се наоѓаат океани што можат да бидат погодни за развој на живот.

"Во тој случај, минералите и солите што се наоѓаат во океаните треба да достигнат до површината. Анализирајќи го составот на површината на Европа, би можеле да откриеме дали скриените океани на таа месечина на Јупитер ги имаат потребните состојки за да создадат живот".

Истражувањето наречено Laboratory predictions for the night-side surface ice glow of Europa е објавено во списанието „ Nature Astronomy“

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.