Меркел, која беше остро критикувана од украинскиот амбасадор во Германија, Андриј Мелник на почетокот на јуни за оправдување на нејзината долгогодишна политика кон Русија без трошка самокритика, даде изјава за германското радио додека Русија продолжува да ја бомбардира Украина, сакајќи да окупира делови од југот и истокот во војна која ја промени безбедносната состојба во Европа и пошироко.
„Стана јасно дека нема да бидам уште долго време во канцеларијата, па едноставно морам да признаам дека одредени обиди минатата година веќе немаа влијание“, изјави Меркел за германскиот медиум Redaktionsnetzwerk Deutschland.
Познато е дека Меркел во нејзините 16 години владеење одржуваше контакти со Путин дури и во тешки времиња и се трудеше да се погрижи оваа комуникација никогаш да не згасне.
Војната започна на 24 февруари, а Меркел не ја отфрла можноста Путин да чекал таа да ја напушти функцијата за да ја нападне соседна Украина.
„Можно е и тоа да влијаело, но имало и други фактори како „изборите во Франција, повлекувањето на армијата од Авганистан и доцнењето на спроведувањето на Договорот од Минск“, рече Меркел.
Таа поднесе оставка по минатогодишните избори, откако беше на чело на Германија од 2005 до 2021 година.
„Путин повеќе не сакал да одржи самит за Украина во нормандиски формат“, рече таа за преговорите насочени кон воспоставување мир во источна Украина, каде што проруските бунтовници започнаа бунт во 2014 година со руска поддршка.
Преговорите во нормандиски формат вклучуваа претставници на Русија, Украина, Германија и Франција.
„Од друга страна, исто така, не успеав да создадам европско-руски формат за разговори за европската безбедност“, признава Меркел.
Запрашана дали би била подготвена да посредува во руско-украинската војна, на која не и се гледа крајот, таа рече дека „тоа прашање во моментов не е во фокусот“.