Медицински сестри претепани во кругот на Клинички, тепачот добил само прекршочна пријава

Вознемирена и со видливи модринки околу окото, 53 годишната медицинска сестра Сузана Јанева раскажа како пред два дена со нејзина колешка насилно биле претепани на паркинг во комплексот државни клиники. 

Нападот се случил кога двете сестри барале паркинг место.. Во едната која била надвор од возилото, најпрвин со својот автомобил удрил 25 годишник од тетовско Џепчиште кој бил позади нив, а потоа и физички ја нападнал.

-Во моментот кога се исправав тој ме фати за вратот и со бокс ме удри во главата, во делот кај окото. Почна за нозе да ме тргне, да ме влече. Колешката излезе да не раздвои, но не можеше и нејзе ја фати за коса и така настана една мешаница со клоци, со боксови почна да не удира и нејзе и мене. – Сузана Јанева – Медицинска сестра.

Напаѓачот веднаш си заминал од местото а двете медицински сестри од поликлиниката Јане Сандански кои требало да заминат на обука на државна, повикале полиција. Успеале да му ја запишат регистрацијата на возилото и така подоцна бил пронајден. Тој дал изјава во полициска станица како и двете сестри, но непријатното изненадување за нив следува откако настанот се завршува само со прекршочна пријава против насилникот.

-Јас бев изненадена не од полициските инспектори и службеници, туку од начинот на кој обвинителот сето тоа го прими и го класифицираше како нарушување на јавен ред и мир што за мене не е нормално некој вака да те истепа и да си помине со минимална казна. – Сузана Јанева – Медицинска сестра.

Настанот како што раскажа сестра Сузана, за кој како што вели пред камерата на Канал 5, собрала храброст да јавно да зборува со цел да не се молчи за вакво насилство, е заведен и во полицискиот билтен на МВР. Оттаму објаснуваат дека за пријавата против насилникот е консултиран јавен обвинител. Побаравме став и од обвинителството, зошто и покрај видните повреди кај сестрата што јавно зборуваше, не се утврдени елементи на кривично дело.

-Согласно дотогаш утврдените факти и констатираната состојба на лице место, произлезе дека станува збор за прекршок против јавниот ред и мир. Меѓутоа, за конкретниот настан утврдувањето на целосната фактичка состојба е во тек. Доколку оштетените приложат или МВР обезбеди други докази кои упатуваат дека станува збор за кривично дело, Јавното обвинителство ќе постапи согласно своите законски надлежности.- ЈОРМ.

Засега насилникот останува само со прекршочна пријава за целиот инцидент кој се случил среде ден во присуство на голем број сведоци а ниту еден не се осудил да им помогне. Според прекршокот за кој се терети напаѓачот му се заканува само парична казна до 800 евра, а медицинските сестри велат дека размислуваат сами да ја добијат правдата и да поднесат кривична пријава.

Градски паркинг со санкции за 122 непрописно паркирани возила на зелени јавни површини

Во текот на изминатата недела (18.05 - 25.05.2022 година) со специјалните возила пајак се отстранети вкупно 122 возила од јавните површини, информираат од ЈП Градски паркинг. 

Непрописно паркираните возила се отстранети по налог на сообраќајната полиција по основ на сторени прекршоци за паркирање на коловоз, велосипедска патека, пешачки премин, тротоар, зелена површина, спротивно на сообраќајните знаци, како и по повик од трето лице.

Јавното претпријатие „Градски паркинг" апелира до граѓаните да го чуваат зеленилото и другите јавни површини, а своите возила да ги паркираат исклучиво на означените паркиралишта. Апелираме сите корисници на услугите за паркирање, навреме да го регулираат плаќањето за паркинг-услугата. Плаќањето за паркинг услугата може да се изврши преку СМС порака или со греб картичка.

Претседателката на ЕБОР, Одил Рено-Басо во посета на Македонија

Рено-Басо ќе учествува и на Скопскиот економски и финансиски форум, каде ќе има обраќање и ќе зборува за одржливиот раст и транзицијата на ниски вредности на јаглероден диоксид.

Претседателката на Европска банка за обнова и развој (ЕБОР) Одил Рено-Басо во вторникот, 31 мај, првпат ќе престојува во посета на нашата држава, при што ќе оствари средби со премиерот, министерот за финансии, банки од приватниот сектор и инвеститори.

Рено-Басо ќе учествува и на Скопскиот економски и финансиски форум, каде ќе има обраќање и ќе зборува за одржливиот раст и транзицијата на ниски вредности на јаглероден диоксид.

Како што најавија од ЕБОР, таа ќе потпише нов кредитен договор со Стопанска банка под новата ЕБОР програма насловена „Одржливо поттикнување на МСП" во износ од ЕУР 4 милиони, кредитна линија која ќе ги поддржува малите и средни претпријатија (МСП).

-ЕБОР е главниот инвеститор во Македонија, која е важна дестинација за инвеститорите, за нас, но и за целиот регион на Западен Балкан, соопшти Одил Рено-Басо.

Таа додава дека со нетрпение ги очекува дискусиите за нивните следни проекти со властите, вклучувајќи го и натамошно подобрување на транспортот и развој на приватниот сектор.

-ЕБОР стои до Македонија во напорите на земјата да ја подобри енергетската безбедност и да направи декарбонизација на економијата, два предизвика кои се мошне важни во моменталниот геополитички и економски контекст, посочува Одил Рено-Басо.

Претседателката на ЕБОР доаѓа во посета на земјата еден месец после посетата на потпретседателот за политика и партнерство на ЕБОР Марк Боуман, кој исто така беше во Скопје.

Дел од инвестициските проекти во земјата, кои се разгледуваат за поддршка, се изградбата на делот на интерконекцијата на гас меѓу Македонија и Грција, делот од автопатот меѓу Скопје и косовската граница, подобрување на менаџментот со цврст отпад во земјата, како и поголем број на кредитни линии за локалните банки за подобрување на енергетската ефикасност, кои ќе бидат понатаму пласирани на МСП. Кредитите на ЕБОР ќе имаат и грант компонента обезбедена од донаторите од ЕУ, Обединетите Нации, Швајцарија, Шведска, САД, Норвешка, Луксембург и други донатори.

-Енергетската ефикасност е област каде ЕБОР и донаторите работат да и помогнат на Македонија во транзицијата на земјата кон ниски вредности на јаглероден диоксид. Банката веќе има направено поголем број инвестиции во електричната мрежа и новите енергетски извори, правејќи ја земјата енергетски побезбедна и помалку зависна од увоз на гориво, се наведува во соопштението на ЕБОР.

ЕБОР е главен институционален инвеститор во Македонија. До денес има инвестирано над ЕУР 2,2 милијарди, во 161 проект во земјата.

Реконструирана пешачката патека на улица „Љубљанска" во Карпош

Со асфалтирањето на третиот дел од пешачката патека на улица „Љубљанска", на потегот од улицата „Разловечко востание" до булевар „Илинден", целосно е реконструирана пешачката патека, на вкупна површина од 1300 квадратни метри.

Како што информираат од прес-службата на Град Скопје, на овој потег, исто така ќе бидат поставени заштитни столпчиња, со цел зголемување на безбедноста за пешаците и спречување на непрописно паркирање возила на пешачката патека.

Посочуваат дека досега се поставени 94 заштитни столпчиња на реконструираната пешачка патека на улицата Љубљанска, на потегот од од булеварот „Партизански одреди" до улицата „Разловечко востание".

– Реконструкцијата на пешачката патека продолжува од другата страна на улицата „Љубљанска", во насока од булеварот „Илинден" до „Сити Мол", на површина од 1000 квадратни метри. Со обновувањето на пешачката патека се олеснува движењето на пешаците на овој потег и се зголемува безбедноста за учесниците во сообраќајот, соопштуваат од Град Скопје.

притисни ентер