76 годишен маж беше смртно прегазен на булеварот „Гоце Делчев“, во близина на пешачкиот премин. Во него удрила џип БМВ Х5 со кумановски регистраски таблички, а зад воланот, според информациите, била 42 годишна кумановка. Идентитетот на загинатиот пешак и на возачот официјално засега остануваат непознати, а МВР повеќе инфомрации најавува за утре.
Големата трагедија која се случи тука на булеварот „Гоце Делчев“ во полиција била пријавена некаде околу 11.25 минути, по што лекар од Итната медицинска помош констатирал смрт кај пешакот.
На местото на несреќата е извршен увид. По наредба на јавен обвинител ќе се изврши обдукција на телото на починатиот, а од жената возач се земани примероци од крв и урина за да се утврди дали била под дејство на алкохол или дрога.
„ Со наредба на јавниот обвинител ќе бидат обезбедени и снимките од видео надзорот на околните објекти со цел да се утврдат причините за несреќата. Дежурниот јавен обвинител издаде наредба и за технички преглед на автомобилот.“ – велат од обвинителството
Ова е трета жртва на скопскиот асфалт, за само една недела. Прво 22 годишен возач на пешачки на „Партизанска“ смртно ја прегази 24 годишната Викторија Николова од Радовиш. За овој случај на возачот му беше определен 30 дневен притвор, а причините за трагедијата се уште се утврдуваат...
Доцна синоќа околу полноќ, пак, животот го загубил и 48 годишен возач од скопско Стајковци, кој на крстосницата на булеварот „Видео Смилевски Бато“ се судрил со друго возило со кое управувал 21 годишен возач. Во несреќата со тешки телесни повреди се здобило и малололетно девојче кое било во возилото со починатиот.