Здравје

Матичен лекар по семејна медицина раководи со Клиниката за токсикологија

Трендот продолжува. Како се менуваат Министрите за здравството, така се разрешуваат дел од директорите на државните Клиники и на нивно место доаѓаат нови. 

Од почетокот на месецов, само триесетина дена по влезот на „Алијанса на Албанците“ во владиниот состав, дел од Клиниките веќе имаат нови раководства. Со Клиниката за токсикологија како медицински директор веќе недела дена раководи Генц Селмани, матичен лекар по семејна медицина. Дел од лекарите негодуваат дека кадрите се ставаат „по партиска линија“, без при тоа да се води сметка за нивната компетентност, ама јавно за ова, да говорат не сакаат. Од Министерството за здравство кусо одговорија оти на претходниот раководител му истекол мандатот, но не кажуваат колку смени се направени по доаѓањето на Фатмир Меџити на министерстката позиција и зошто, а ниту пак какво искуство има матичниот лекар во делот на менаџирање, што сега е прв човек на Токсикологија.

Канал 5 стапи во контакт со него. Д-р Селмани вели дека сега е во постапка на специјализација по неврологија, а 12 години раководи со приватна ординација по општа медицина. Тој смета дека е компетентен, негира дека е поставен само поради меѓупартиски пазар и вели оти времето ќе покажело дали умее да се носи со предизвиците. Тој има решение за в.д директор со важност од први април, а во траење од шест месеци, меѓутоа вели дека не раководи и со Интернистичкиот ургентен центар што обично одат заедно.

-Ќе ви покаже времето, шест месеци сум именуван в.д Директор, за овие месеци верувам дека ќе покаже времето, дали сум компетентен или не сум компетентен...- Д-р Генц Селмани

Според информации на Канал 5 старо нов директор има и очната клиника, таму раководи Беким Татеши што во 2018 беше сменет.

Според неофицијални информации, договорот за влез во Владата вклучувал Алијанса да има неколку директориски места на клиниките, од кои повеќето, економски, на Гинекологија, Неврологија, Онкологија и Дерматологија.

Инаку Владата на СДСМ уште пред пет години ветуваше дека јавни здравствени установи ќе функционираат само со еден медицински директор, па економските директори нема да има, ама тоа до денес не се случи.

Економските директори кои според неофицијалните информации земаат од 1000 до 1500 евра плата, годишно „ја чинат“ државата над 450 000 евра, а никој не кажува што конкретно работат...

Свет

Туск може да стане премиер на Полска на 13-14 декември

Туск може да положи заклетва како нов полски премиер на 13 или 14 декември.

Според висок функционер во полската претседателска администрација, Доналд Туск, лидерот на Граѓанската коалиција, најголемата партија во коалицијата со парламентарно мнозинство, може да положи заклетва како нов полски премиер на 13 или 14 декември, објавија полските медиуми, пренесе БТА.

Војчех Коларски, државен секретар во претседателската администрација, вчера на Католичкото радио објави дека Доналд Туск, кандидатот за премиер предложен од парламентарното мнозинство, може да положи заклетва пред претседателот Анджеј Дуда на 13 или 14 декември.

Во согласност со програмата на долниот дом на полскиот парламент, на 11 декември, актуелниот премиер Матеуш Моравјецки ќе го одржи својот програмски говор пред комората. Неговиот предлог-кабинет потоа ќе биде подложен на гласање за доверба, кое се очекува да пропадне бидејќи мнозинството гласови во Парламентот и припаѓаат на опозицијата. Во таков случај, во текот на денот пратениците ќе предложат свој кандидат за премиер, а неговата кандидатура повторно ќе биде ставена на гласање.

Лидерите на трите опозициски партии кои освоија мнозинство во долниот дом на Парламентот на изборите на 15 октомври сакаат нивната влада да биде предводена од Туск и планираат тој да ја преземе функцијата што е можно поскоро. Нивниот кандидат ќе ја претстави својата програма на 12 декември. /МИА

Свет

Десетици слонови угинаа во националниот парк Хванге во Зимбабве поради климатските промени

Десетици слонови угинаа од жед во популарниот национален парк Хванге во Зимбабве, а заштитниците стравуваат дека повеќе ќе умрат бидејќи сушата, предизвикана од климатските промени и глобалната временска шема на Ел Нино, ги суши дупките за наводнување

Сезонскиот Ел Нино, кој предизвикува потопло и суво време во текот на целата година, е влошен од климатските дефекти, велат научниците, што е причина за загриженост на тековните разговори за климатски акции КОП28 во Дубаи.

-Се потпираме на вештачка вода, бидејќи нашата површинска вода се намали. Бидејќи слоновите зависат од вода, повеќе од нив умреа, изјави главниот еколог на Зимпаркс во националниот парк Хванге, Дафин Мадламото.

Во Хванге живеат 45 илјади слонови, а на возрасен слон му требаат 200 литри вода дневно. Но, како што изворите на вода се намалуваат, пумпите со соларна енергија во 104 бушотини или бунари не можат да црпат доволно вода./МИА

Свет

Ердоган ја обвини Франција за обезбедувањето оклопни возила на Ерменија

Турскиот претседател Реџеп Таип Ердоган ја критикуваше Франција за обезбедување оклопни возила на јужнокавкаската земја Ерменија, опишувајќи го потегот како „провокативен“, објавија азербејџанските медиуми.

-Ова е провокација. Франција треба да знае дека не и прави добро на Ерменија, туку и штети, изјави Ердоган на новинарите на враќање од посетата на Грција.

Според него, „ерменската влада треба да учи од своето неодамнешно искуство и да не подлегнува на овие провокации“.

-Би било во интерес на Ерменија да ја искористи можноста за мир и да не падне во замката поставена од земјите што ја доведуваат во заблуда, рече Ердоган.

За време на 44-дневниот конфликт, Азербејџан го врати Карабах по речиси 30 години ерменска окупација.

-Мирните односи со Азербејџан би биле најдобрата опција за Ерменија. Оние кои ѝ ставаат оружје во рацете ќе ја остават Ерменија сама во тешки времиња, додаде Ердоган. /МИА

притисни ентер