Наваро и Маск, двајца блиски советници на американскиот претседател Доналд Трамп, влегоа во отворен конфликт околу трговската политика на Америка кон Европската унија, пишува CNN.

Маск, кој ја предводи DOGE, група задолжена за намалување на федералните трошоци, на мрежата Х рече дека во саботата ѝ рекол на италијанската десничарска партија Лига дека сака целосна слободна трговија меѓу САД и Европа.

Неговата изјава дојде неколку дена откако Трамп воведе низа царини против речиси секоја земја во светот, вклучително и ЕУ.

Иако Маск досега главно молчеше за тарифите на Трамп, падот на цената на акцијата на Tesla го поттикна јавно да го нападне Наваро, кој многумина го сметаат за главен идеолог на таканаречениот „Ден на ослободувањето“ - тарифниот пакет што Трамп неодамна го објави.

Маск објави серија навреди на IX против Наваро, кој потоа возврати во интервју, пренесе Њујорк Тајмс.

Наваро изјави за CNBC дека повикот на Маск за „нула тарифи“ не го изненадува бидејќи, како што вели, тој е „само монтер на автомобили, а не производител“.

„Тој не е производител на автомобили, тој е монтер на автомобили“, рече Наваро, тврдејќи дека многу од деловите на Tesla доаѓаат од Јапонија, Кина и Тајван.

„Тој сака евтини странски делови. Тоа го прави“, рече Наваро.

Откако Наваро, економист образован на Харвард, се појави на Си-Ен-Ен и ги бранеше тарифите на Трамп, Маск го исмеваше и на мрежата Х поради неговото образование.

„Д-р по економија од Харвард не е предност, туку недостаток. Тоа резултира со проблем каде егото е поголемо од интелигенцијата“, напиша Маск.

Питер Наваро (75) е американски економист и советник на Трамп за трговија и индустрија.

Прво официјално соработуваше со Трамп за време на неговиот прв мандат, кога го предводеше новоформираниот Национален трговски совет, а потоа и Кабинетот за трговија и индустриска политика.

Во јануари минатата година, тој беше осуден на четири месеци затвор за непочитување на Конгресот, особено за одбивање да соработува со комисијата што го истражува нападот врз Капитол од страна на поддржувачите на Трамп на 6 јануари 2021 година.

Набргу по излегувањето од затвор, тој зборуваше на Конвенцијата на Републиканците во август, а Трамп повторно го назначи за советник во декември.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.