Култура

Марко Виденовиќ за настапот во „Музикферајн“: Кулминација на совршенство, волшебна ноќ во историјата на македонската култура

-Кулминација на совршенство, волшебна ноќ со која испишавме нова страница во историјата на македонската култура

Кулминација на совршенство, волшебна ноќ со која испишавме нова страница во македонската историја, за македонската култура, вели Марко Виденовиќ член на Македонската филхармонија повеќе од дваесет години за настапот во Златната сала на Музикферајн во Виена - една од најпрестижните концертни сали во светот.

Виденовиќ музицира на виола и е водач на виоли во оркестарот. Пишува поезија, компонира, а воодушевеноста од како што вели магичниот настап на Филхармонијата и солистите Ана и Игор Дурловски, врвни професионалци, ја сподели на социјалните мрежи.

„Некои седумдесетина души пристигнуваат во Виена. Малку повеќе изморени од патувањето, но многу повеќе возбудени од она што треба да го сторат на највисоко ниво. Следниот ден навидум одморени, но за една ноќ тешко кој може да се одмори, како и да е, влегуваат во една од најпрестижните концертни сали во светот, и секој од нив возбуден во очите му се гледа сето тоа, во однесувањето, низ меѓусебните разговори...искрат измешани чувства.

Јас можам да пишувам за моите чувства, но повеќе од убеден сум дека кај секој од моите колеги беше исто или барем многу слично, си го поставував прашањето, како ќе биде, дали ќе бидеме онака како што најчесто сме, на високо ниво, за жал не толку ценети од одредени личности кои по некои пишани и непишани правила треба секогаш да бидат нашиот грб, да бидат нашата поддршка? И сето ова немаше можеби ниту да го помислам доколку овој концерт беше некој од нашите редовни концерти во Скопје или во било кој град во Македонија бидејќи таму е нашата најголема поддршка, нашата публика, но тука бевме на туѓ терен, онаму каде што настапува еден од најпрестижните оркестри на сите времиња и тоа на светско ниво, Виенска филхармонија. Бевме нешто слично како македонската фудбалска репрезентација која пред петнаесетина дена гостуваше во Белгија и оствари одличен резултат.

Следно нешто беше: излегуваме на сцената на Златната сала во Виена, а таа преполна, можеби стотина празни места од близу две илјади колку што е нејзиниот капацитет. Јас умеам со зборови, ми дал Господ дарба, барем така ми кажуваат многу луѓе, малку нескромно е можеби ова од моја страна, но тоа е, сепак, ова чувство не умеам да го опишам со збор. Трепет, ежење, одговорност, трема, тресење на секој мускул... Брз поглед низ публиката, и таму еден куп познати лица од Македонија, наши колеги, пријатели, наши поддржувачи кои допатувале на своја режија за само и само да бидат со нас и да не поддржат, а во нивните очи некоја енергија која ти дава сила да полеташ.

По првиот отсвирен тон магијата почна да работи. За да биде уште поволшебно, на сцената излегуваат Ана и Игор Дурловски , е дури за ова немам зборови да опишам. Солзи кај нас на сцената, солзи во публиката, кулминација на совршеноста. На крајот остануваме повторно сами, ние уметниците од Македонската филхармонија, и се создава уште една магија. Аплауз од скоро пет-шест минути, можеби и повеќе, нормално бис и скоро две илјади среќни души. Да усреќиш еден човек е огромен успех, а замислете ако тоа го постигнете кај скоро две илјади, неописливо чувство.

Би пишувал два дена, но и ова е предолго, но сакам само да кажам дека денеска испишавме нов лист во македонската историја, за македонската култура. Жал ми е што нашата прекрасна сала во Скопје не е секогаш исполнета до последното место, но тоа не е наша вина, тоа е проблем на целиот систем, но и покрај сѐ, онаа публика која ја имаме е искрена и ни е ветер во грб. Веќе следната седмица почнуваме со нашите редовни концерти кои оваа виенска публика не би ги пропуштила, па зошто тоа да го пропушти македонската.

Македонската филхармонија е големо семејство во кое како и во секое, има проблеми и препреки, но ако се сака, сѐ може да се реши. Почнувајќи од музичарите, па преку сценските работници, нототека, администрацијата, раководителите па сѐ до хигиеничарите, секој еден е дел од овој историски успех. Нека ни е вечна Македонска филхармонија и вака да ни е најлошо!“, стои во објвата на Виденовиќ на неговиот фејсбук профил.

Македонската филхармонија со свечениот концерт во престижната Златна сала на Музикферајн во Виена, каде традиционално се одржува и прочуениот новогодишен концерт на Виенската филхармонија, го одбележа својот голем јубилеј – 80 години од основањето, а воедно и во нзакот на 30 години од дипломатските односи меѓу нашата земја и Австрија.

Настапот на Македонската филхармонија во Виена беше поддржан од Министерството за култура и туризам и од македонската Амбасада во Австрија, како дел од проектот за културна дипломатија и интернационална промоција на македонската уметност.

Тагови: Македонска филхармонија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

„Коста Трпков“ во знакот на 60 години ФМУ – младите оперски надежи блеснаа на сцената на НОБ

На 15 септември, во присуство на претседателката Гордана Сиљановска-Давкова, се одржа свечениот гала концерт „Млади оперски надежи – Коста Трпков“, посветен на 60-годишниот јубилеј на ФМУ.

Големата сцена на Националната опера и балет на 15 септември беше исполнета со прекрасни вокални интерпретации, емоции и млади музички таленти на традиционалниот гала концерт „Млади оперски надежи – Коста Трпков“, кој годинава се одржа во рамките на одбележувањето на големиот јубилеј – 60 години од основањето на Факултетот за музичка уметност – Скопје.

Свеченоста ја збогати и присуството на претседателката на Република Македонија, Гордана Сиљановска-Давкова, а настанот собра значајни гости од музичкиот и културниот живот.

Концертот понуди богата програма со дела од Леонкавало, Моцарт, Верди, Масне, Чилеа, Маскањи, Дворжак, Пучини, Лехар и Гуно, во која настапија студенти, магистранти и професори од класите по соло пеење на ФМУ.

Вечерта ја отвори проф. Д-р Горан Начевски со Прологот од операта „Паљачи“ на Руджеро Леонкавало, по што следуваше Моцартовата „Свадбата на Фигаро“ со настапите на Ангела Стојанова, Олја Алексовска и Суарта Мемети, од класата на доц. М-р Иван Наумовски, како и Фјола Лецај, од класата на проф. М-р Весна Ѓиновска-Илкова.

Публиката уживаше и во моќните интерпретации на Теодора Пејиќ и Леотрим Зејнула, магистранти од класата на проф. Д-р Горан Начевски, како и во настапите на останатите млади уметници кои ја донесоа богатата програма на јубилејниот концерт.

Еден од моментите кои особено ја одбележаа вечерта беше настапот на Иван Наумовски, кој покрај својата солистичка точка со аријата на Хомонај од „Циганскиот барон“ на Јохан Штраус, сцената ја сподели и со својата студентка Анастасија Славковска, студентка во четврта година во неговата класа.

Двајцата го изведоа познатиот Моцартов дует „Là ci darem la mano“ од операта „Дон Џовани“ – изведба која беше моќна, впечатлива и полна со емоции, со одлична вокална интеракција и силна сценска енергија. Двајцата создадоа динамичен сценски дијалог кој беше меѓу запаметливите моменти од вечерта.

Анастасија, пак, во текот на концертот настапи и со аријата „Io son l’umile ancella“ од операта „Адријана Лекуврер“ на Франческо Чилеа, покажувајќи сигурност, вокална зрелост и сценска присутност.

Младата сопранистка привлече внимание и со својот сценски изглед. За свечениот настап Анастасија блесна во елегантна креација од Елена Лука, која совршено се вклопи во гала-амбиентот на Националната опера и балет. Софистицираниот сценски изглед го заокружи нејзиното појавување и дополнително ја истакна младата уметница под светлата на големата сцена.

На сцената се претставија и други млади пејачи од класите на Горан Начевски и Весна Ѓиновска-Илкова, продолжувајќи ја традицијата на концертот „Коста Трпков“ како сцена на која студентите ги покажуваат своите вокални можности пред професионалната публика.

Целата вечер беше водена од сигурната рака на маестра Бисера Чадловска, а оркестарот на Националната опера и балет им даде професионална музичка поддршка на младите солисти.

„Коста Трпков“ и оваа година покажа дека е една од значајните сцени на кои младите пејачи добиваат можност своето знаење стекнато на ФМУ да го претстават пред голема публика – во друштво на своите професори и со поддршка на професионалниот оркестар на Националната опера и балет.

Јубилејното издание беше уште една свечена потврда на шестдецениската приказна на ФМУ – Скопје, институција која со генерации создава музичари и уметници и остава трага врз македонскиот музички и оперски живот.

Европа

Шокантен инцидент во Италија: Ученик избоде наставничка

Се обидел да го пренесува нападот во живо на социјалните мрежи.

Според неименувани извори, ученик во средно училиште во римската населба Ченточеле денес испрскал наставничка во лицето со спреј-бибер, а потоа ја избодел.

Наставничката добила итна медицинска помош. Иако нејзиниот живот не е во опасност, таа претрпела шок, наведуваат изворите, а пренесува агенцијата „ANSA“.

🔵#Roma Un 13enne ha accoltellato una insegnante, dopo averle spruzzato uno spray urticante. Il ragazzino avrebbe tentato di filmare la scena attraverso una videochiamata in diretta. A fermare l’aggressione un compagno di classe. pic.twitter.com/yXVh1Ab4d0
— Rai Radio1 (@Radio1Rai) September 18, 2026

Напаѓачот, 13-годишно момче, се обидел да го пренесува нападот во живо преку својот мобилен телефон, користејќи ја апликацијата „Телеграм“.

Според изворите, друг ученик го спречил нападот.

Извор: Б92

Тагови: Италија

Македонија

О. Карпош: „Шарен детски свет“ ќе го краси дворниот ѕид на градинката „Орце Николов“ во Карпош 4

Во детската градинка „Орце Николов“ во Карпош 4 започна изработката на муралот „Шарен детски свет“, со кој просторот наменет за најмладите ќе добие нов, креативен и весел изглед.

Автор на муралот е уметникот Драган Китановски – Драш, кој преку својата уметност ќе го збогати просторот каде што секојдневно растат, играат и учат најмладите жители на Карпош.

Во реализацијата на иницијативата денеска се приклучи и градоначалникот на

Општина Карпош, Сотир Лукровски, кој на ѕидот ќе остави свој личен белег преку сопствена креација посветена на децата. Муралот има за цел да внесе повеќе боја, креативност и позитивна енергија во просторот на градинката, создавајќи пријатна и инспиративна средина за најмладите.

Општина Карпош продолжува со иницијативи за разубавување на јавните и детските простори, создавајќи средина во која децата растат со повеќе боја, креативност и радост.