Балкан

Марко Ѓуриќ: Доколку Европа не го заврши процесот на проширување, ризикува да стане тематски парк

Ѓуриќ оцени дека доколку Европа не го заврши процесот на проширување на својот континент, ризикува да ја изгуби својата важност.

Министерот за надворешни работи на Србија, Марко Ѓуриќ оцени дека доколку Европа не го заврши процесот на проширување на својот континент, ризикува да ја изгуби својата важност и да стане, како што вели, еден вид тематски парк, каде што „можете да уживате во туризмот и да се забавувате“.

„За нашиот континент да го врати своето заслужено место на светската сцена, ние Европејците мора да ја прифатиме целата визија за обединета Европа, а вистинското единство не е можно без Балканот“, рече Ѓуриќ во интервју за шпанскиот весник „Мундо“, пренесоа српските медиуми. Интервјуто е даде за време на неговата штотуку завршена официјална посета на Шпанија.

На прашањето што според него се случило за Србија повеќе да не биде фаворит да биде следната земја-кандидат за членство во ЕУ, Ѓуриќ одговори дека Србија вредно работи на спроведување на сите потребни реформи, со цел да ги заврши сите законски измени до крајот на 2026 година.

„Србија привлече 65 проценти од сите инвестиции во Југоисточна Европа и, згора на тоа, ја стабилизираше својата макроекономска состојба до степен до кој го намаливме односот на јавниот долг кон БДП од 79 проценти на 45 проценти денес. Затоа, верувам дека Србија навистина може да придонесе за европскиот економски раст, бидејќи нашата годишна стапка на раст е значително над европскиот просек и не се бориме за членство за да добиеме повеќе пари од Брисел“, рече Ѓуриќ.

Од друга страна, тој верува дека понекогаш постојат политички или идеолошки позиции во некои земји-членки кои влијаат на темпото на процесот на пристапување.

„Мислам дека ако Европа не го заврши процесот на проширување на својот континент, ризикува да ја изгуби својата релевантност и, искрено, ризикува да стане еден вид тематски парк каде што можете да уживате во туризмот и да се забавувате“, рече Ѓуриќ.

На прашањето дали мисли дека Србија е во неповолна позиција затоа што се перцепира како блок заедно со остатокот од Западен Балкан, Ѓуриќ одговори дека Србија не е себична во своите амбиции и не е против земјите од регионот да се приклучат кон ЕУ.

Тој додаде дека негова главна цел во овој период е да придонесе за стабилноста на својата земја, обидувајќи се да создаде средина на добрососедство.

На прашањето дали е изненаден што американскиот претседател Доналд Трамп воведе царини од 35 проценти за Србија, Ѓуриќ одговори дека земјата активно соработува со американската администрација за да се реши прашањето за царините, но, како што вели, тоа не е единствениот фокус на односите со САД.

„Пред две недели бев во Вашингтон и имав одлична средба со државниот секретар Марко Рубио. Се договоривме за долгорочен стратешки дијалог меѓу Србија и САД на крајот од оваа година, покрај потпишувањето на договор за стратешко партнерство во енергетскиот сектор минатата година.“

На прашањето каква е моменталната позиција на Србија во врска со војната во Украина, шефот на српската дипломатија посочи дека Србија води избалансирана надворешна политика и одржува дијалог и разговори со сите заинтересирани страни.

Тој истакна дека Србија ги поддржува принципите на Повелбата на Обединетите нации во врска со територијалниот интегритет и суверенитетот на сите независни држави, вклучително и Украина.

„Но, ние ја водиме и нашата надворешна политика, во согласност со нашите национални интереси. Србија испрати значителна хуманитарна помош до народот на Украина и прими илјадници Украинци во Србија. Ние заземаме принципиелна позиција во овој конфликт. Затоа, во меѓународните организации секогаш сакаме тој да се реши што е можно поскоро. И претседателот Вучиќ ѝ понуди на Србија да биде домаќин на секаков вид формални или неформални разговори за тоа како да се решат тензиите. Не се плашиме од зборот мир“, рече Ѓуриќ.

Тој нагласи дека српската влада е отворена за дијалог кога станува збор за студентските протести, и дека протестите не ги водат исклучиво студенти, ниту, вели тој, студентите се обединети по ова прашање, додавајќи дека има и студенти во провладиниот камп пред Народното собрание во Белград.

„Владата постојано ја покажуваше својата подготвеност да ги слушне некои од барањата што првично ги постави. Понатаму, владата поднесе оставка во април. Имаме нова, токму затоа што сакавме да се справиме со барањата на демонстрантите“, рече Ѓуриќ.

Тој потсети дека претседателот на Србија, Александар Вучиќ, постојано повикува на дијалог со разни опозициски групи.

„Последниот пат, пред една недела. И, за жал, овие барања беа одбиени. Од друга страна, видовме сцени на насилство или напади врз полицајци во седишта на СНС и собири што го кршат законот, што е парадокс, бидејќи тие бараат поголемо владеење на правото, но не се подготвени да се придржуваат кон неговите основни елементи. Владата покажа воздржаност, употребата на полицијата беше ограничена на случаи кога демонстрантите го блокираа патот. А српскиот народ не ги сака блокадите. Анкетите покажуваат дека поддршката за претседателот расте. Таа е малку под 50 проценти“, рече Ѓуриќ.

На прашањето кои се причините претседателот Вучиќ да пишува писма до „Фајненшл тајмс“ и „Гардијан“ за да го изрази своето мислење за протестите, Ѓуриќ одговори дека Србија многу се труди да го подобри својот имиџ.

Кога го прашаа што мисли за изјавата на хрватскиот премиер Андреј Пленковиќ, кој рече дека „Србија е на работ на граѓанска војна“ поради протестите, шефот на српската дипломатија одговори дека Србија има многу почит кон сите свои соседи, додавајќи дека не смета дека е соодветно да се коментира внатрешната состојба на своите соседи на тој начин.

Тагови: Марко Ѓуриќ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

СДСМ: За труењето во Гостивар СДСМ поднесе кривична пријава против Клековски, Андоновска, Лазов, Амети

Помина повеќе од еден месец, цел град Гостивар беше отруен со загадена вода.

Прес конференција на СДСМ, Јон Фрчкоски, член на Извршниот одбор

Речиси 5.000 граѓани завршија во болница. Здравствена катастрофа и тотален распад на институциите.

Одговорност од власта, од здравствените институции досега нема. Од никого.

А нема ниту чиста вода во Гостивар.

Четири недели власта на Мицкоски си поигрува со најскапото нешто - здравјето на луѓето.

Јавното обвинителство молчи, ги игнорира повиците да преземе конкретни чекори.

Ние тоа нема да го дозволиме. Нема да дозволиме ова да се заташка.

Одговорните за здравствената катастрофа, за труењето на цел еден град и загрозување на здравјето на 5.000 луѓе мора да сносат одговорност, политичка и кривична.

Не може да се сведе одговорноста само на локално ниво, сите инволвирани мора да одговараат.

СДСМ денеска поднесе Кривична пријава за сите системски пропусти, непостапувања, непреземања на законските надлежности од страна на здравствените и инспекциските институции.

Кривичната пријавата е против:

-Сашко Клековски – Министер за здравство во Владата на Мицкоски.

-Марија Андоновска – Директорка на Институтот за јавно здравје.

-Кирил Лазов - Директор на Државен санитарен и здравствен инспекторат (ДСЗИ).

-Шпенди Амети, Директор на Центар за јавно здравје (ЦЈЗ) – Тетово.

Основани се сомненијата дека во периодот од јуни 2026 година па се до денес, во својство на службени или одговорни лица во институциите со кои раководат, не презеле дејствија и мерки за заштита на здравјето и спречување на последиците од загадувањето на водата во Гостивар.

Не се придржувале кон прописите за заштита на луѓето и животната средина и луѓето. Се задоцнило со реакциите, 22 дена граѓаните на Гостивар пиеле отровна вода со фекалии, дури Центарот за јавно здравје соопштил дека водата е исправна за пиење.

Иако по 200 граѓани дневно се пријавувале со здравствени тегоби 5 дена никој не презел ништо, да ја утврди причината, да реагира.

Се задоцни и со прогласување на епидемијата.

Се криеја информации за водата од граѓаните, никогаш не беше објавена анализа или извештај.

Сите овие непостапувања доведоа до сериозни и тешки последици за здравјето на граѓаните на Гостивар.

Со ова пријавените сториле неколку кривични дела кои се гонат по службена должност.

Нема поголем скандал, ниту поголема неодговорност од вакво поигрување со животот на граѓаните.

Го повикуваме Јавното обвинителство да постапи, да ги преземе сите дејства за утврдување на фактите и доказите за наведените во оваа кривична пријава.

Одговорност мора да има.

Скопје, 10.08.2026

СДСМ

Македонија

Сообраќајка меѓу камион со дрва и три автомобили на патот Гостивар-Стража

Три автомобили и камион натоварен со дрва учествува утрово во сообраќајна несреќа на патот Гостивар - Стража.

Четири возила, меѓу кои и камион натоварен со дрва, се судрија денеска на патниот правец Гостивар – Стража, соопштија од Министерството за внатрешни работи. Сообраќајната несреќа предизвика значително отежнување на сообраќајот и создаде долги колони во двата правци.

Според првичните информации од терен, во несреќата учествувале три патнички автомобили и еден камион што превезувал дрва. Од силината на ударот, дел од товарот на камионот се растурил по коловозот, дополнително блокирајќи го минувањето на останатите возила на оваа фрекфентна делница.

Додека трае расчистувањето на коловозот и преместувањето на оштетените возила, сообраќајот се одвива наизменично по една коловозна лента, што создаде подолги колони автомобили во насока кон Кичево и кон Гостивар.

Од СВР Тетово за МИА информираат дека несреќата била пријавена утрово околу 7:40 часот. Повредените се наоѓале во едно од возилата, а по незгодата се пожалиле на здравствени проблеми и биле пренесени во гостиварската болница за лекарска помош.

„По незгодата, три малолетни лица и една жена кои биле во едно од автомобилите се пожалиле на здравствени проблеми и биле упатени во гостиварската болница за укажување медицинска помош“, изјави портпаролот на СВР Тетово, Фатмир Реџепи.

Македонија

Општина Ѓорче Петров ја одбележа 25-годишнината од загинувањето на бранителите кај Љуботенски Бачила

По повод 25-годишнината од загинувањето на македонските бранители кај месноста Љуботенски Бачила, во Општина Ѓорче Петров на локации каде се наоѓаат спомен-обележјата денеска беше одржана комеморација.

Со највисоки почести беше одбележан споменот на хероите кои во 2001 година ги положија своите животи, бранејќи ја татковината, мирот и слободата.

На настанот присутни беа делегација од општината предводена од градоначалникот Александар Стојкоски, претставници на државните институции, припадници на Армијата и безбедносните сили, семејствата на загинатите бранители, како и бројни граѓани.

- Повторно сме собрани на ова местото на сеќавањето, пред споменикот кој засекогаш сведочи за храброста, пожртвуваноста и љубовта кон татковината на нашите сожители Раде Јанковски, Ивица Златевски, Томе Димовски, Томислав Настевски и Ацо Ангеловски, како и на нашите браќа Томе Бадаровски, Гоце Чанкуловски, Бранко Јанев и Маријанчо Бошковски. Десетти август е ден кој не смее да се заборави, но и ден кога Македонија молчи од почит и се поклонува пред своите херои - рече градоначалникот на Општина Ѓорче Петров, Александар Стојкоски во обраќањето на споменикот во Волково.

Тој упати посебна порака до семејствата на загинатите бранители, нагласувајќи дека нивната болка е и болка на целото општество.

-Ниту еден збор не може да ја надомести загубата на син, сопруг, брат или татко. Но, постои нешто што како држава, општина и како народ сме должни да ви го ветиме - нивните имиња никогаш нема да исчезнат од нашата колективна меморија, и како и досега, со грижа и почит ќе продолжиме да се однесуваме кон нивните поколенија - рече Стојкоски.

Градоначалникот се обрати и до припадниците на Армијата и безбедносните сили, истакнувајќи ја нивната улога во зачувувањето на слободата и суверенитетот.

-Македонскиот народ отсекогаш знаел дека слободата не е подарок, туку дека таа се заслужува, се брани и се чува. Нашите бранители тоа најдобро го покажаа - додаде Стојкоски.

На крајот од обраќањето, Стојкоски повика на трајно зачувување на споменот за бранителите и на нивната жртва.