Марк Карни: Од гувернер до премиер на Канада со визија за економска стабилност - Канал 5

Свет

Марк Карни: Од гувернер до премиер на Канада со визија за економска стабилност

Марк Карни, поранешен гувернер на Банката на Англија, победи на канадските избори и стана нов премиер на земјата. 

Марк Карни: Од гувернер до премиер на Канада со визија за економска стабилност

Минатиот месец тој положи заклетва откако неговиот претходник Џастин Трудо поднесе оставка, по што беа распишани предвремени избори. Вчера, Канаѓаните повторно излегоа на гласачките места и мнозинството од нив го даде гласот за Либералната партија.

Карни беше првиот не-Британец на чело на британската централна банка во нејзината над 300-годишна историја. Претходно ја водеше Канада низ финансиската криза во 2008 година како гувернер на Банката на Канада. За разлика од повеќето политички кандидати, тој никогаш не извршувал политичка функција. Сепак, на почетокот на март убедливо победи во внатрепартиската трка на Либералната партија за наследник на Џастин Трудо, а сега е избран и со волјата на граѓаните.

Во кампањата, Карни се повика на своето искуство во управувањето со глобални економски кризи, надевајќи се дека Канаѓаните ќе го препознаат како лидер способен да се спротивстави на американскиот претседател Доналд Трамп, кој поведе трговска војна против Канада. Иако работел во Њујорк, Лондон и Токио, Карни е роден во оддалечениот Форт Смит, на Северозападните територии на Канада. Неговите предци потекнуваат од ирската грофовија Мејо, поради што поседува и ирско државјанство, покрај канадското. Британско државјанство стекнал во 2018 година, но неодамна изјави дека планира да се откаже од него, сметајќи дека премиерот треба да има исклучиво канадско државјанство.

Син на директор на средно училиште, Карни со стипендија се запишал на Харвард, каде што играл хокеј на мраз. Во 1995 година докторирал економија на Универзитетот во Оксфорд, истражувајќи како домашната конкуренција може да ја зголеми националната конкурентност – тема повторно актуелна поради американските царини.

„Марк беше исклучително способен студент, брзо усвојуваше нови пристапи и перспективи“, изјави неговата поранешна менторка Мег Мајер во соопштение од Универзитетот во Оксфорд по неговата изборна победа.

Во 2003 година, Карни го напушти приватниот сектор за да стане заменик-гувернер на Банката на Канада, а потоа беше и заменик-министер за финансии. Во 2007 година, непосредно пред почетокот на глобалната финансиска криза, беше назначен за гувернер на Банката на Канада. Неговото лидерство беше пофалено за ублажувањето на последиците од рецесијата. За разлика од традиционално воздржаните централни банкари, тој отворено најави дека каматните стапки ќе останат ниски најмалку една година по нивното драстично намалување, поттикнувајќи инвестиции во економијата.

Сличен пристап примени и во Обединетото Кралство како гувернер на Банката на Англија, каде што ја модернизираше институцијата и ја зголеми нејзината јавна видливост. Воведе пракса за намалување на бројот на состаноци за каматните стапки и објавување на записници веднаш по одлуките. Исто така, ја воведе „политиката на идно насочување“ (forward guidance), ветувајќи дека нема да ги зголемува стапките додека невработеноста не падне под 7%. Поради нејаснотии околу оваа политика, еден пратеник го нарече „недоверлив дечко“, прекар што го следеше со години.

Пред референдумот за независност на Шкотска во 2014 година, Карни предупреди дека независна Шкотска би можела да го загуби пристапот до британската фунта. Пред Брегзит, тој укажа дека излегувањето од ЕУ може да предизвика рецесија. По одлуката за Брегзит, кога фунтата нагло падна, Карни се обиде да ја смири јавноста, уверувајќи дека финансискиот систем ќе продолжи да функционира. Подоцна, Банката на Англија дополнително ги намали каматните стапки и ја обнови програмата за откуп на обврзници.

Во март 2020 година, пред пандемијата на коронавирусот, Карни повторно ги намали каматните стапки, проценувајќи дека економскиот шок ќе биде привремен.

Во текот на кариерата, тој стекна искуство во односите со Доналд Трамп, кој повторно е американски претседател и воведе високи царини за Канада, дури и предложи нејзина анексија. Како претседател на Комисијата за финансиска стабилност (FSB) од 2011 до 2018 година, Карни одигра клучна улога во меѓународниот одговор на политиките на Трамп. Учествуваше на бројни состаноци на Г20 и имаше директен увид во однесувањето на Трамп на глобалната сцена.

Иако првично беше воздржан, во последните денови Карни поотворено го коментира Трамп, споредувајќи ги неговите изјави за Канада со „коментарите на Волдеморт“. „Кога ќе размислите што стои зад тие навредливи коментари на претседателот, гледате колку се опасни. Нема ни да ги повторам, но знаете на што мислам“, рече Карни. Тој порача дека Канада ќе одржува противмерки „сè додека Американците не покажат почит и не преземат веродостојни обврски за слободна и фер трговија“.

Либералите, според медиумите, со децении се обидувале да го привлечат Карни во политиката, но тој долго време одбивал, еднаш дури и прашувајќи новинар: „Зошто да не станам кловн во циркус?“ Ситуацијата се промени во јануари, кога Трудо поднесе оставка по излегувањето од владата на министерката за финансии Кристија Фриланд, што предизвика внатрепартиска криза.

Иако Фриланд му беше пријателка и противкандидат во борбата за лидерство, Карни убедливо победи, презентирајќи се како најискусен во управувањето со кризи. „Знам како да управувам со кризи“, рече тој за време на соочувањето минатиот месец. „Во вакви ситуации, потребно е искуство во преговори и управување со кризи.“

Покрај цврстиот став кон Трамп, Карни претстави и низа домашни политики. Познат е како застапник за еколошка одржливост – во 2019 година беше назначен за пратеник на ОН за климатски промени, а во 2021 година ја основа Глазговската финансиска алијанса за нето нула емисии. Една од најконтроверзните теми на администрацијата на Трудо беше данокот на јаглерод, кој конзервативците ветуваа дека ќе го укинат. Карни, веднаш по стапувањето на должност, одлучи да го укине данокот од 1 април. „Ова ќе им помогне на Канаѓаните под притисок од трошоците“, изјави тој.

Во кампањата се залагаше за зајакнување на Канада како „чиста и конвенционална“ енергетска сила и за забрзување на одобрувањата за големи инфраструктурни проекти. На прашањата за можните конфликти меѓу енергетската политика и климатските цели, тој се опиша како „прагматичар“.

Во однос на имиграцијата, Карни поддржува ограничување на сегашните имиграциски цели за да се заштитат капацитетите на здравствениот и станбениот систем. Како најголем предизвик, тој го истакна зачувувањето на економскиот раст на Канада и покрај намалената трговија со САД. /МИА

Тагови: канада Марк Карни

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Расел Бренд се соочува со нови тужби- загрозено му е богатството од 17 милиони евра

Расел Бренд (51) вчера беше прогласен за виновен по едно обвинение за силување и три обвиненија за сексуален напад во Краунскиот суд Саутерк во Лондон . 

Расел Бренд се соочува со нови тужби- загрозено му е богатството од 17 милиони евра

Казната сè уште не е објавена и ќе биде одредена за неколку дена, додека актерот моментално е во притвор.

Покрај повеќегодишната затворска казна, тој се соочува со сериозни финансиски последици. Според извештаите на медиумите, вклучувајќи го и „Гардијан“, други жртви би можеле да го тужат Бренд за отштета. Неговото богатство се проценува на околу 17 милиони евра, но оваа сума не е официјално потврдена и би можела значително да се намали поради можни граѓански тужби, пишува „Промифлеш“.

Се очекуваат и бројни барања за отштета

Една жена веќе бара до 120.000 евра во Високиот суд во Лондон, а против него е поднесена уште една тужба во САД. Се очекува дека и други жени би можеле да поднесат слични барања. Обвинителот во Лондон го обвинува Расел дека сексуално ја нападнал во 2008 година во неговата вила во Лос Анџелес.

Судските документи, што ги виде „Гардијан“, наведуваат дека тој насилно ја соблекол нејзината облека и долна облека и ја турнал на креветот. Потоа, наводно против нејзина волја, тој се обидел да изврши орален секс врз неа. Жената рекла дека успеала да избега и подоцна ѝ е дијагностицирано посттрауматско стресно растројство (ПТСН).

Таа ја поднела тужбата во 2025 година, а Расел оттогаш ја нарекол „фундаментално нечесна“. Постапката по таа тужба била прекината за време на тековното судење бидејќи наводниот инцидент се случил надвор од надлежноста на англиските кривични судови. Оваа жена не била една од четирите обвинители во кривичната постапка.

Сомнителни приходи и нови истраги

Не е познато колку пари Расел Бренд моментално поседува или колку од неговите средства му се достапни. Тој остварил приход од комедија, телевизија, радио, холивудски филмови, книги и онлајн формати.

Откако бил демонетизиран на YouTube во септември 2023 година, Дејли Меил проценил дека заработувал околу 1 милион евра годишно на таа платформа. Во меѓувреме, Метрополитенската полиција сè уште истражува уште две обвинувања за силување. Документацијата за тие случаи веќе е предадена на Канцеларијата на британскиот државен обвинител.

Тагови: Расел Бренд

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

НАТО и Германија демонстрираат сила на истокот на Европа- големата воена вежба ќе трае до декември (ВИДЕО)

Во Литванија започнаа воените вежби на Бундесверот, во кои учествуваат повеќе од шест илјади војници, а ќе траат до 3 декември.

НАТО и Германија демонстрираат сила на истокот на Европа- големата воена вежба ќе трае до декември (ВИДЕО)

„Во вежбите „Штит на слободата 26-II“ и „Голем орел 26“ учествуваат единици на литванската 45-та оклопна бригада Литванија и 37-ма моторизирана пешадиска бригада Саксонија на германската 10-та оклопна дивизија“, се вели во соопштението, јавува LRT.

Заедно со литванските и германските војници, борбена обука ќе поминат и војници од мултинационалната борбена бригада на НАТО од Германија, Холандија, Норвешка, Чешка, Хрватска, Белгија и Луксембург, како и литванска воена единица.

Главната цел на маневрите е да се зголеми борбената готовност на војниците, да се вежба команда и контрола и планирање на операции, како и да се зајакне соработката со сојузниците.

Литванската војска појасни дека вежбата „Штит на слободата 26-II“ ќе се одржи на воениот полигон Руднинкај, додека вежбата „Голем орел 26“ ќе се одржи на воениот полигон „Генерал Силвестрас Жукаускас“ во близина на градот Пабрада.

Воените возила ќе бидат во активна употреба во текот на целата воена вежба.

Најголем сообраќај на конвои се очекува од граничниот премин Калварија на 6 и 7 ноември, а од Клајпеда на 10 и 12 ноември.

Локалните жители се предупредени за можни прекини во сообраќајот и се замолени строго да ги следат упатствата на воената полиција.

Русија во последните години постојано изразува загриженост за активностите на НАТО долж нејзините западни граници.

Кремљ истакна дека Москва не претставува закана за никого, но дека нема да ги игнорира дејствијата што се потенцијално опасни за нејзините интереси.

Тагови: воена вежба НАТО

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Џејми Оливер најави дека се повлекува од телевизиите

Познатиот британски готвач Џејми Оливер, кој со децении подготвуваше оброци пред милионска публика, го објави своето пензионирање од телевизијата. 

Џејми Оливер најави дека се повлекува од телевизиите

Оливер вели дека има различни планови за иднината и сака да се врати на своите корени, пишува heute.at.

На почетокот на својата кариера, Оливер сакал само да готви, но откако бил откриен од телевизијата, станал глобално познат. Сега, по речиси три децении, тој размислува за потивок живот. „Ме украдоа од кујната за да станам „Џејми Оливер““, рече 51-годишниот готвач во австриската радио емисија Ö3 „Појадок во мојата куќа“.

Тој се сети како работел во лондонскиот ресторан „Ривер Кафе“ кога бил забележан од екипа на Би-Би-Си. Набрзо следела емисијата „Голиот готвач“, која му го променила животот. „Чувствувам дека би сакал да се повлечам од јавноста“, отворено рече тој во разговор со водителката Клаудија Стокл.

Тој сака повторно да се врати на шпоретот

Оливер има јасен план за иднината. „Во следните неколку години, имам намера да се повлечам од некои од улогите што ги имав, како што е телевизиската работа“, објави тој. Неговата цел е помалку телевизија и одговорност, а повеќе време за готвење. „Кога ќе наполнам 60 години, сакам да се вратам во кујната на ресторанот и да готвам за 50 луѓе“, објасни тој.

Сепак, неговото заминување од јавноста нема да биде веднаш. Оваа година, тој го рестартираше својот синџир ресторани „Џејмис италијанец“, кој банкротираше во 2019 година, со нова локација во Лондон. Тој вели дека банкротот го научил на важни лекции за трошоците за кирија, управувањето со персоналот и важноста на одржливиот бизнис модел.

Тагови: Џејми Оливер

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер