Малигно-болни пациенти талкаат по болничките ходници во потрага по термини за снимање

Старо-нови проблеми со термините за ехо и мамографија.Дел од пациентите болни од рак не можат да се снимаат итно за да се утврди дали болеста им прогресирала бидејќи на државно нема термини. 

-Три дена идам, не може ни државно, ни приватно да се најде, нема термин.

Вака пациентка на онкологија раскажува за маките. Иако претходно оперирана и третирана од рак на дојка, сега има болки, а дали болеста се вратила не може да дознае, бидејќи нема термин за обично ехо, па и мамографија што ќе покаже што ги создава болките.

На Онкологија има и роднини на пациентки кои лутаат по болничките ходници за да закажат снимања пред нивните блиски да се оперираат.

Иако два месеци дел од онколошките пациенти немаа терапија, денеска за дел од нив имаше, но и тие велат дека на државно тешко стигнуваат до термин за мамографија. Една од нив е осумдесет и шестгодишната Лилјана од Крива Паланка. Таа е задоволна од односот на лекарите и од сестрите во Скопје, ама вели оти по 10.000 денари дава месечно за превоз бидејќи во нејзинот град или во околината нема онколошки центар, а појаснува дека недостасуваат и општи лекари.

Чекањето по неколку месеци за ехо и мамографија ги принудува дел од пациентите од свој џеб да плаќаат и по повеќе од 50.000 на приватно.

За проблемот со термините за мамографија Министерот Беким Сали најави дека тој ќе бил надминат после Нова година до кога требало да стигнат нови апарати во повеќе болници, а од Клиниката за радиотерапија и онкологија пак, пратија соопштение дека новата директорка превземала огранизациски промени за подобрување на здравствените услуги. Од Клиниката појаснуваат оти се прават и нови онколошките протоколи за лекување, адаптирани на буџетот на клиниката.

Инаку додека новата Директорка во меѓувреме прави и ревизија на финансиското работење за да се утврди дали некој препродавал терапии и имало злоупотреби со парите, некои од пациентите за Канал 5 тврдат дека терапии сепак, нема за сите.

Германски амбасадор: Наскоро очекуваме нов бран бегалци од Украина

Германскиот амбасадор во Велика Британија, Мигел Бергер, денеска изјави за „Скај њуз“ дека во наредните недели очекува нов бран украински бегалци, што ќе се совпадне со ниските температури.

„Путин продолжува да го тероризира цивилното население. Ние сме многу загрижени поради тоа, бидејќи овие напади врз енергетската инфраструктура значат дека многу луѓе кои се смрзнуваат на ниски температури би можеле да бидат принудени да ја напуштат Украина“, рече Бергер, додавајќи дека очекува „нова бран на бегалци“ како резултат на тоа.

Снег веќе падна во голем број украински градови, вклучувајќи го и главниот град Киев, а жителите се борат со ниските температури и руските напади врз енергетската инфраструктура, што предизвикуваат периодични прекини на струјата, водата и греењето. Од почетокот на војната, стотици илјади украински бегалци избегаа во Германија.

Во однос на дипломатијата, Бергер вели дека Германија не гледа суштинска промена во позицијата на Русија, што не го прави оптимист за преговорите меѓу Москва и Киев: „Не само што не гледаме суштинска промена во позицијата на Русија, туку и нема подготвеност за дипломатско решавање на конфликтот“.

Синот на фудбалска легенда на 13 годишна возраст потпиша договор со Реал

Ензо Алвес Виеира потпиша договор со Реал Мадрид.

Веројатно немаше да добие простор во медиумите доколку зад името не се криеше 13-годишниот син на клупската легенда и најодликуван играч на шпанскиот гигант, Марсело. Бразилскиот лев бек играше за Реал Мадрид од 2007 до оваа година кога потпиша за Олимпијакос.

Со Реал освои 25 титули, од кои шест за најдобриот тим во шпанското првенство и пет за најдобриот тим во Лигата на шампионите. Има две деца. Енцо има 13 години, постар брат на 7-годишниот Лијам. Марка го опишува младиот фудбалер како „голем скапоцен камен“ на младиот тим на Реал. Тој игра на позицијата напаѓач.

ЕСМ:ТЕЦ Неготино утре изутрина ќе почне со активности за ставање на електраната во производство

Вечерва завршуваат сервисните и ремонтните активности на генераторот и на другата опрема во ТЕЦ Неготино, и утре во 7.30ч почнуваат пуштачките активности за ставање на електраната во функција на производство.

Во договорот со економскиот оператор кој ги изведуваше работите беше наведен 15 декември како датум за завршување на зафатите. Но, со засилен интензитет на работа на економскиот оператор, и зголемен ангажман на вработение кој во изминатите денови се вршеше под засилен надзор од генералниот директор на АД ЕСМ, Васко Ковачевски и на директорот на ТЕЦ Неготино, Небојша Стојановиќ, рокот е скратен за 10 дена. Во услови на енергетска криза тоа ќе значи економски и енергетски бенефит.

Во сервисните и ремонтните активности беа вклучени економскиот оператор Монтинг Инженеринг, вработените во ТЕЦ Неготино, АД ЕСМ, РЕК Битола и консултанти од производителот од Украина.

Генераторот е произведен во 1975г и во ТЕЦ Неготино е ставен во употреба во 1978г. Ова е прво отворање и големо ремонтирање на генераторот.

АД ЕСМ вложува максимални напори и засилено ги става во функција сите капацитети, со цел да се задоволи зголемената потреба од домашна електрична енергија, со оглед на зголемените задолжувања од страна на Владата кон АД ЕСМ за испорака на енергија кон Универзалниот снабдувач, институциите, како и бизнис секторот, соопштија од ЕСМ.

притисни ентер