„Сакам да кажам една работа многу јасно. Направивме гест на доверба во однос на визите. Што се однесува до Франција, визите се откажани затоа што го почитуваме зборот. Денеска, нашиот збор не се почитува“, рече тој.
„Очекувам вистинска посветеност од овие две влади (Косово и Србија) да напредуваат во наредните недели. Ова е услов за мир во целиот регион“, продолжи тој. Некои медиуми во Косово и Албанија објавија дека Макрон во Тирана изјавил дека Франција ја суспендирала одлуката за визна либерализација, јавува Радио Слободна Европа.
Сепак, француската новинска агенција АФП пишува дека со својата изјава Макрон само „му се закани на Косово дека ќе ја укине одлуката за визите". Одлуката за визна либерализација за Косово треба да стапи на сила на 1 јануари следната година. Инаку, во Тирана, Макрон зборуваше и за политичката ситуација меѓу Косово и Србија.
На прес-конференцијата тој истакна дека го следи порастот на тензиите меѓу Косово и Србија и побара двете страни да преземат чекори за деескалација на ситуацијата. „Одговорност на (српскиот претседател Александар) Вучиќ е недвосмислено да ги осуди нападите од 24 септември бидејќи тоа придонесува за враќање на мирот на границата“, е убеден тој.
„И она што го очекуваме од властите во следните фази, од двете страни, е едноставно: реорганизација на изборите во општините со српско мнозинство, учество на Србите на избори и во институции, создавање Заедница на општини со српско мнозинство, кое ќе го спроведат косовските власти. Очекувам Вучиќ да покаже одговорност, а истото го очекувам и од претседателот и премиерот на Косово“, заклучи тој.