Македонија

Македонската и руската научна заедница ја засилуваат соработката

Меѓународниот образовен простор интензивно се развива. Прогресивната заедница се стреми да создаде глобална стратегија за образование на човекот, без оглед на местото на живеење и едукациското ниво. 

Денес е невозможно да се обезбеди конкурентност на високообразовната институција и нејзините дипломирани студенти на светскиот пазар на труд, без активна интеракција со странски партнери. И нашите земји ги обединува разбирањето дека модерното образование треба да стане меѓународно, а универзитетското мултикултурно, порачаа учесниците на настанот во Македонската академија на науките и уметностите (МАНУ), со кој претпладнево и официјално почнаа Деновите на руската наука.

Според високите претставници на македонската и руската академска заедница, статусот на државите во светот, директно зависат од научниот напредок и новите технологии. Но, науката треба да демонстрира и убедливи резултати од своите истражувања кои може да бидат основа за политички одлуки, за што, пак, се важни постојаните контакти на научниците и нивната професионална интеракција со оние кои донесуваат одлуки и ги спроведуваат на меѓународната сцена.

Како што беше речено, македонските и руските научници отсекогаш имале и имаат плодна соработка. Постои голем интерес за нејзино интензивирање, за реализирање заеднички проекти и истражувања, а обновливите извори на енергија, безбедната храна и заштитата на животната средина се само некои од областите во кои се гледа значителен потенцијал.

-Руската наука го задолжи светот. Во историјата засекогаш ќе останат впишани големите имиња на руските научници, пронаоѓачи, истражувачи, писатели,…, од кои многумина се и добитници на Нобеловата награда. Но, Русија и денес го препознава значењето на науката и има стратегија за нејзина поддршка, истакна во своето обраќање претседателот на МАНУ, Љупчо Коцарев и најави дека се подготвува нов договор меѓу Руската академија на науките (РАН) и МАНУ.

Според рускиот амбасадор во земјава, Сергеј Александрович Баздникин, за Русија науката е еден од врвните приоритети, а во фокусот се напредните научно-истражувачки центри и талентираните млади луѓе.

-Со МАНУ и со руските висоообразовни институции денес отвораме низа онлајн предавања на експерти од двете земји за современите научни достигнувања. Изборот на дисциплини не е случаен: вештачка интелигенција, биохемија и молекуларна биологија, земјоделски науки и ветеринарни науки. Во овие области развивме плодна соработка. Убеден сум дека Деновите на руската наука ќе придонесат за унапредување на нашите традиционални партнерски врски, а Амбасадата ќе продолжи да дава поддршка на соработката, нагласи Баздникин.

На свеченото отворање се обратија и академик Виктор Антонович Садовничиј, претседател на Рускиот Сојуз на ректори и ректор на Московскиот државен универзитет „М.В. Ломоносов", проф. д-р Сергеј Владимирович Позјабин, ректор на Московската државна академија за ветеринарна медицина и биотехнологија „К.И. Скрјабин", проф. д-р Евгениј Владимирович Рудој, ректор на Новосибирскиот државен аграрен универзитет и проф. д-р Велимир Стојковски, почесен конзул на Руската Федерација во Охрид.

Претседателот на Руската Федерација, Владимир Путин ја прогласи 2021-ва за Година на науката и технологијата. По тој повод е предвидено да се организираат 86 настани кои ќе овозможат запознавање на пошироката јавност со руската наука на достапен и информативен начин. Еден од настаните се и Деновите на руската наука кои ќе траат до 21 октомври. Во рамки на Деновите ќе се одржат четири предавања од различни научни области: вештачка интелигенција, биохемија и молекуларна биологија, земјоделски науки и ветеринарни науки. За овие теми ќе зборуваат академик Љупчо Коцарев, проф. д-р Велимир Стојковски, проф. д-р Евгениј Варисович Камалдинов и проф. д-р Лариса Александровна Гнездилова.

Фудбал

Холандски фудбалер прегазил 4- годишно дете, додека пијан возел со 200 км/час

Холандскиот фудбалер Раи Влоет (27) предизвикал тешка сообраќајна несреќа во која усмртил четиригодишно момче.

Во ноември 2021 година, фудбалерот на руски Урал пијан удрил во задниот дел на возилото во кое се наоѓало четиричлено семејство со брзина од околу 200 километри на час. За жал, четиригодишното момче кое седело на задното седиште, како последица од тешките повреди починало во болница.

Влоет подоцна признал дека пиел на забава: „Бев на забава во Амстердам, уште имаше корона, забавата заврши рано. Требаше да преноќам во Амстердам, но донесовме нова одлука, да одам во Ротердам .Без размислување почнав да возам, ногата ми беше на педалата за гас кога ја наместив контролата на патување и потоа се случи несреќата“.

По несреќата, со преглед е утврдено дека Влоет испил двојно повеќе од законски дозволеното количество алкохол. Не сакал да признае во полиција дека го управувал возилото, пишува холандскиот АД, додавајќи дека неговото сведочење ја вознемирило мајката на несреќното момче, која му викала: „Како побогу да продолжиме? Сѐ ни одзеде!"

Освен затворска казна, државното обвинителство бара и четиригодишна забрана за возење. Влоет во својата кариера настапувал за ПСВ, Камбур, ФК Ајндховен, НАЦ Бреда, Кјасо, Фросиноне, Хераклес и Астана, а од 2022 година е член на руски Урал. Настапувал за помладите селекции на Холандија, а за У-21 на три настапи постигнал два гола.

Живот

Млада Американка влегла во автомобил, по два месеци ѝ го нашле телото во количка за пазарување

Телото на исчезнатата 21-годишна девојка од Чикаго е пронајдено врзано и завиткано во чаршафи во количка за пазарење.

Роза Чакон последен пат била видена надвор од нејзиниот дом на 18 јануари, а нејзиното тело било пронајдено во уличка во Чикаго на 15 март. Во саботата семејството и месната заедница организирале бдение во чест на починатата девојка која тој ден требало да го прослави својот 22 роденден.

"Ми недостига моето дете. Обично кога ќе си оди ќерка ни се слушаме. Се јавува утредента, се јавува еден час по заминувањето, дома е, безбедна е, убаво е и топло. Но ништо не сме слушнале“, изјавил таткото Хозе Лусио за ABC7. Нејзината мајка се присетила на последните зборови што 21-годишната девојка ѝ ги кажала.

"Ќе се вратам, мамо. Се возам со Uber назад", рекла мајката, која исто така се вика Роза Чакон. На снимката од безбедносната камера на семејната куќа се гледа како девојката влегува во автомобилот Uber. Семејството тврди дека таа им кажала дека кај себе немала лична карта ниту капут, пренесува Индипендент.

Сè уште не е јасно дали стигнала до целта. Телото било пронајдено на три километри од местото каде што последен пат била видена околу 10:45 часот на 15 март, а нејзиното семејство го идентификувало телото по тетоважите. „Не знам како имаат срце да убијат некого таков“, вели мајката на жртвата.

Инспекторите наскоро треба да ја утврдат точната причина за смртта. Семејството истакнува дека полицијата во Чикаго не направила доволно за да ја пронајде, па морале да ангажираат приватни истражители да помогнат во потрагата. Полицијата понудила награда од 15.000 долари за информација која ќе доведе до апсење и осуда во случајот.

Свет

ОН: Разорните климатски промени доаѓаат побргу од очекуваното

Разорните климатски промени се случуваат побрзо од очекуваното, а светот се движи кон границата на затоплување од 1,5 степени Целзиусови што ќе ја достигне за нешто повеќе од десет години, објавија ОН.

Температурите забележани во последните години предизвикаа бројни разорни бури и поплави, топлотни бранови што ги уништуваат земјоделските култури и катастрофални суши во различни делови на светот.

Но, на следните генерации најтоплиот период од 2020-тите ќе им биде релативно кул, дури и ако емисиите на фосилни горива што ја затоплуваат планетата брзо опаѓаат, се вели во извештајот на советодавниот панел на ОН за климата. „Резиме за креаторите на политики“ од 36 страници е синтеза на шест главни извештаи од 2018 година до денес, составени од Меѓувладиниот панел за климатски промени (IPCC).

Извештајот е брутален потсетник дека, иако човештвото има алатки за да спречи климатска катастрофа, сè уште не ги користи тие алатки.

На почетокот на 2030-тите, светот би можел да ја достигне зацртаната цел за ограничување на зголемувањето на температурата на 1,5 степени Целзиусови во споредба со прединдустрискиот период, што ќе влијае во блиска иднина. Но, шефот на ИПЦЦ изјави за АФП дека верува дека не е доцна да се сменат работите и го нарече извештајот „порака на надеж“.

„Имаме знаење, технологија, алатки, финансирање, во основа сè што е потребно за да се надминат климатските проблеми за кои сме свесни толку долго“, рече Хоесунг Ли во видео интервјуто. „Но, во моментов ни недостига клучна работа - силна политичка волја еднаш засекогаш да ги решиме овие прашања.“

Генералниот секретар на ОН, Антонио Гутереш, реагирајќи на извештајот, рече дека богатите земји кои се стремат кон јаглеродна неутралност до 2050 година или подоцна треба да ги забрзаат своите цели и да ги остварат најдоцна до 2040 година за да ја „деактивираат климатската темпирана бомба“.

„Човештвото е на тенок мраз и тој мраз брзо се топи“, рече шефот на Обединетите нации во видео пораката откако панелот на IPCC го објави својот најнов извештај. Гутереш го спореди со „водич за опстанок на човештвото“.

IPCC јасно посочи дека придобивките за општеството и светската економија од ограничувањето на глобалното затоплување под два степени Целзиусови ги надминуваат економските трошоци. Деветдневните преговори, кои се одржаа во Интерлакен, Швајцарија, беа обележани со несогласувања околу фосилните горива, убедливо најмоќниот двигател на глобалното затоплување.

притисни ентер