За разлика од лани, кога Македонија се најде на 36. место на Индексот за слобода на медиумите, годинава земјава е рангирана на 42. позиција, со што бележи пад од шест места.
И покрај тоа, состојбата со медиумите е оценета како „задоволителна“ и таа се наоѓа во горниот дел од листата, која брои вкупно 180 земји, но на последното место од државите кои во однос на медиумската ситуација ја имаат оваа оценка.
Во општата оценка за Македонија, во Индексот за слобода на медиумите на „Репортери без граници“, се вели дека иако новинарите во земјава не работат во непријателска средина, широко распространетите дезинформации и недостатокот на професионализам придонесуваат за намалување на довербата на општеството во медиумите.
Извештајот исто така нотира дека националното законодавство сè уште не е усогласено со европските стандарди, а злоупотребата на т.н. SLAPP тужби (стратешки тужби против јавна партиципација) останува механизам за притисок врз критичките медиуми и новинари.
Ваквата состојба, се наведува, ги изложува независните медиуми на закани и напади.
Комуникологот Петар Арсовски смета дека последниот извештај на репортери без граници го покажува обидот на политиката да влијае врз медиумскиот дискурс.
Виновник за падот од шест места во Идексот за слобода на медиумите, СДСМ гледа во власта.
Од ВМРО ДПМНЕ враќаат, велат падот на Индексот на Репортери без граници се должи на ширењето на лажни вести и дезинформации.
И Демократската унија за интеграција се огласи со став.
-ДУИ ја потсетува Владата дека односот кон медиумите е директен одраз на зрелоста на една демократија и останува доследна на ставот дека слободата на медиумите е основен столб на правната држава и ќе ги поддржи сите процеси што водат кон медиумска транспарентност, плурализам и професионализација, согласно европските стандарди кои ги стремиме—ДУИ.
Од регионот во оваа група се само уште две две земји, Словенија, која бележи напредок за 9 места и се наоѓа на 33. место, додека Црна Гора е 37., со напредок од три позиции во однос на лани.